Ta Yehu, hosi ya Israele loko a dlaya Yoramu na Ahaziya.
1Muprofeta Elixa a vitana un'wana wa vana va vaprofeta, a ku eka yena: “Tibohe xisuti, u teka xikutswana lexi xa mafurha, u ya eRamoto wa Giliyadi. 2Kutakuloko u fikile kona u ta lava Yehu, n'wana Yoxafati, n'wana Nimxi, kutani u ta nghena u n'wi byela a yima exikarhi ka vamakwavo, u n'wi yisa ekamareni leyi nga exikarhi, 3u ta teka xikutswana xa mafurha, u xi chela enhlokweni ya yena, u ku: ‘Yehovha u vurisa sweswo, a ku: Ndzi ku cherile hi mafurha leswaku u va hosi ya Israele.’ Kutani u ta pfula nyangwa, u tsutsuma u nga yimi.” 4Kavaloko jaha leri, nandza wa muprofeta, ri suka ku ya eRamoto wa Giliyadi.
5Kuteloko ri fikile, ri kuma tindhuna ta nyimpi ti tshamile, kutani ri ku: “Ndzi ni rito ku ku byela, wee hosi!” Yehu a hlamula, a ku: “U vula mani exikarhi ka hina hinkwerhu.” Yena a ku: “Ndzi vula wena, hosi.” 6Kutani Yehu a pfuka a nghena ekamareni, nandza wa muprofeta a chela mafurha enhlokweni ya yena, a ku: “Yehovha, Xikwembu xa Israele u vurisile, a ku: ‘Ndzi ku cherile hi mafurha leswaku u va hosi ya Israele, etikweni ra Yehovha. 7U ta dlaya va yindlu ya Akabu, hosi ya wena, ndzi ta tirihisela eka Yezabele hikwalaho ka ngati ya malandza ya mina, vaprofeta, ni hikwalaho ka ngati ya malandza hinkwawo ya Yehovha. 8Yindlu hinkwayo ya Akabu yi ta herisiwa, ndzi ta susa munhu un'wana ni un'wana wa yona, hambi lonkulu, hambi lontsongo, etikweni ra Israele; 9ndzi ta endla hi yindlu ya Akabu kukotisa leswi ndzi swi endleke hi yindlu ya Yerobuwamu n'wana Nebati, ni yindlu ya Baaxa n'wana Ahiya. 10Loko a ri Yezabele, timbyana ti ta n'wi dya ensin'wini ya Yizriele; a ku nga vi na munhu la nga ta n'wi lahla.’ ” Kavaloko nandza wa muprofeta a pfula nyangwa a tsutsuma.
11Yehu a huma eka malandza ya hosi ya yena, kutani ma ku eka yena: “Ku lulamile xana? Munhu loyi wa rihuhu u tele yini eka wena xana?” A va hlamula, a ku: “Ma tiva swinene munhu loyi ni mavulela ya yena.” 12Vona va ku: “Mavunwa! Hi byele leswi nga swona!” Yena a ku: “U ndzi byerile swo karhi ni swo karhi, u te: ‘Yehovha u vurisile sweswo, a ku: Ndzi ku cherile hi mafurha leswaku u va hosi ya Israele.’ ” 13Hi nomu lowu, un'wana ni un'wana a teka nguvu ya yena, va ti veka ehansi ka yena ehenhla ka xitulu; va yimba nanga, va ku: “Hosi i Yehu!”
14Yehu, n'wana Yoxafati, n'wana Nimxi, a endla makungu ku ya lwa na Yoramu. Kambe Yoramu a a hlayisa Ramoto wa Giliyadi a ri ni Vaisraele hinkwavo hikwalaho ka Hazaele, hosi ya Siriya. 15Ntsena hosi Yoramu a a tlherile eYizriele ku ya hola timbanga leti Vasiriya va n'wi tlhaveke loko a lwa na Hazaele, hosi ya Siriya, Yehu a ku: “Loko ku ri ku ehleketa ka n'wina, ku nga tshuki ku huma munhu ni un'we emutini ku ya tivisa mahungu eYizriele.” 16Kavaloko Yehu a khandziya egolonyini ya yena, a suka ku ya eYizriele, hikuva Yoramu a a ri kona esangwini; kutani Ahaziya, hosi ya Yuda, a ngirimerile kona, a ya vona Yoramu.
17Mulanguteri la ngi a ri endlwini leyi tlakukeke eYizriele, kuteloko a vonile nyimpi leyikulu ya Yehu yi ta, a ku: “Ndzi vona nyimpi leyikulu.” Kutani Yoramu a ku: “Rhuma mukhandziyi wa hanci a ya hlangana na vona, a va vutisa, a ku: ‘Ku ni ku rhula xana?’ ” 18Mukhandziyi wa hanci a suka, a ya hlangana na Yehu, a ku: “Hosi yi vutisa, yi ku: ‘Ku ni ku rhula xana?’ ” Yehu a hlamula, a ku: “U ni mhaka yihi ni ku rhula-ke? Hundzela endzhaku ka mina.” Kutani mulanguteri a tivisa hosi, a ku: “Ntsumi yi fikile eka vona, kambe a yi vuyi.” 19A rhuma mukhandziyi wa hanci wa vumbirhi, kutani a ya fika eka vona, a ku: “Hosi yi vutisa, yi ku: ‘Ku ni ku rhula xana.’ ” Yehu a hlamula, a ku: “U ni mhaka yihi ni ku rhula-ke? Hundzela endzhaku ka mina.” 20Mulanguteri a tivisa hosi, a ku: “U fikile eka vona, kambe a nga vuyi, ntsena mafambele ma fana ni mafambele ya Yehu, n'wana Nimxi, hikuva a fambisa hi matimba.”
21Kutani Yoramu a ku: “Pana golonyi!” Va pana golonyi ya yena; kutani Yoramu, hosi ya Israele a huma na Ahaziya, hosi ya Yuda, un'wana ni un'wana a ri egolonyini ya yena; va ya hlangana na Yehu, va n'wi kuma ensin'wini ya Naboto, wa Yizriele. 22Kuteloko Yoramu a vonile Yehu a ku eka yena: “Ku ni ku rhula, wee Yehu xana?” A hlamula, a ku: “Ku rhula ku nga va kwihi loko mikhuva ya mbhisa ya Yezabele, mana wa wena, ni ku tala ka vuloyi bya yena swa ha ri kona?” 23Yoramu a hundzuka a tlhela hi ku tsutsuma, a ku eka Ahaziya: “Ku ni ku xengiwa, wee Ahaziya!” 24Kavaloko Yehu a teka vurha bya yena, a tlhava Yoramu exikarhi ka makatla, nseve wu ya huma embilwini, kutani Yoramu a wa egolonyini ya yena.
25Yehu a ku eka Bidikara, ndhuna ya yena: “N'wi tlakule u n'wi cukumeta ensin'wini ya ndzhaka ya Naboto wa Yizriele; hikuva u nga tsundzuka leswaku, kakuloko mina na wena a hi khandziyile tihanci hi landza swin'we Akabu tata wa yena Yehovha a vula rito leri ehenhla ka yena: 26‘Kukotisa loko ndzi vonile tolo ngati ya Naboto, ni ngati ya vana va yena, ndzi ta ku tlherisela sweswo ensin'wini yoleyo,’ ku vula Yehovha. Sweswi, n'wi tlakule u n'wi cukumeta ensin'wini yoleyo hilaha Yehovha a nga vula hakona.”
27Ahaziya, hosi ya Yuda, kuteloko a swi vonile, a tsutsuma hi ndlela ya yindlu ya ntanga, kambe Yehu a n'wi hlongola a ku: “N'wi tlhaveni, na yena,” kutani va n'wi tlhava egolonyini ya yena eku tlhandlukeni ka Guri, lowu nga ekusuhi na Yibiliyamu; a tsutsuma a ya eMegido, a fa kona. 28Malandza ya yena ma n'wi vuyisela eYerusalema, ma n'wi lahla esirheni ra yena ni vatata wa yena, emutini wa Davhida. 29Ahaziya a a sungurile ku fuma etikweni ra Yuda hi lembe ra khume na rin'we ra Yoramu, n'wana Akabu.
Ku fa ka Yezabele.
30Kutani Yehu a fika eYizriele. Yezabele, kuteloko a swi twile, a titota mahlo, a bombisa nhloko ya yena, kutani a languta hi fasitere. 31Kakuloko Yehu a nghena enyangweni, a ku: “Ku ni ku rhula xana, wee Zimri, mudlayi wa hosi ya wena?” 32Yehu a tlakusa mahlo ya yena tlhelo ra fasitere, a ku: “I mani la yimaka na mina? I mani xana?” Kavaloko malandza mambirhi kumbe manharhu ma tshinelela fasitere ma languta tlhelo ra yena; kutani a ku: 33“N'wi hoxeni ehansi!” Va n'wi hoxa, kutani ngati ya yena yi phyandlukela ekhumbini ni le tihancini, kutani ti n'wi phyandlasa hi mikondzo ya tona. 34Kavaloko a nghena, a dya, a nwa, kutani a ku: “Hlayisani murhuketeriwa loyi, mi n'wi lahla, hikuva i n'wana wa hosi.” 35Va famba va ya n'wi lahla, kambe va kuma pala ra yena ntsena, ni mikondzo ni swandla. 36Va vuya, va ya tivisa Yehu, kutani a ku: “Hi rona rito ra Yehovha leri a nga ri vula hi nandza wa yena, Eliya wa Tixibe, loko a ku: ‘Emasin'wini ya Yizriele, timbyana ti ta dya nyama ya Yezabele. 37Ntsumbu wa Yezabele wu ta fana ni vulongo emasin'wini, etikweni ra Yizriele, leswaku va nga ka va nga vuli: Hi yena Yezabele!’ ”
