2 TIHOSI 6

₁Vana va vaprofeta va ku eka Elixa: “Yindlu leyi hi tshamaka eka yona, emahlweni ka wena, a yi hi eneri. ₂A hi yeni eYordani, hi ta teka un'wana ni un'wana mhandze, hi aka kwala yindlu yin'wana.” Yena a ku: “Fambani.” ₃Un'wana wa vona a ku eka yena: “Wa nga famba ni malandza ya wena.” Kutani a ku: “Ndzi ta famba.” ₄Kavaloko a famba na vona. Kuteloko va fikile eYordani, va tsema mirhi. ₅Kambe kakuloko un'wana a tsema mhandze, xihloka xi guleka xi wela ematini, Kutani a huwelela, a ku: “Yo! N'wini wanga! Kambe a xi lombiwile!” ₆Munhu wa Xikwembu a ku: “Xi wele kwihi-ke?” Kuteloko a n'wi kombisile, Elixa a tsema rikunyi, a ri hoxa kona, a papamisa xihloka. ₇Kutani a ku: “Xi teke.” A tshambuluta voko, a xi teka.

₈Hosi ya Siriya a yi lwa ni Vaisraele; yi endla makungu ni malandza ya yona, yi ku: “Mixaxa ya mina yi ta va ko karhi.” ₉Kambe munhu wa Xikwembu a tivisa hosi ya Israele, a ku: “Chava ku hundza endhawini leyo karhi, hikuva Vasiriya va ngirimela kona.” ₁₀Kutani hosi ya Israele yi rhuma vanhu endhawini leyi munhu wa Xikwembu a n'wi byeleke ku yi langutela. Mhaka leyi, a yi humelelanga kan'we, hambi ku ri kambirhi.

₁₁Mbilu ya hosi ya Siriya yi tsekatsekisiwa ha swona, kutani yi vitana malandza ya yona, yi ku eka wona: “Xana mi nga ka mi nga ndzi byeli leswaku i mani eka hina la yimaka ni hosi ya Israele xana?” ₁₂Un'wana wa malandza ya yena a ku eka yena: “A hi swona, hosi, n'wini wanga, kambe Elixa, muprofeta la nga etikweni ra Israele, u byela hosi ya Israele marito lawa u ma vulaka endlwini leyi u etlelaka eka yona.” ₁₃Kutani hosi yi ku: “Fambani mi ya vona laha a nga kona, ndzi ta rhuma vanhu va ya n'wi khoma.” Kavaloko va ta n'wi byela, va ku: “Waswivo, u le Dotani.”

₁₄Kutani a rhuma tihanci ni tigolonyi, ni ntlawa lowukulu, va famba nivusiku va rhendzela muti. ₁₅Nandza wa munhu wa Xikwembu a pfuka nimixo a huma, kutani maswivo, tinyimpi ti rhendzele muti, ti ri ni tihanci ni tigolonyi. Kutani nandza a ku eka munhu wa Xikwembu: “Yo! Hosi yanga. Hi ta endla yini-ke?” ₁₆Yena a ku: “U nga chavi, hikuva lava nga na hina va tele va tlula lava nga na vona.” ₁₇Kutani Elixa a khongela, a ku: “Yehovha, wanga n'wi hanyanyisa, a swi vona.” Kavaloko Yehovha a pfula mahlo ya nandza, kutani a vona ntshava yi tele hi tihanci ni tigolonyi ta ndzilo, swi rhendzele Elixa exikarhi.

₁₈Vasiriya va ngirimela eka Elixa, kutani a khongela Yehovha, a ku: “Wa nga ba mahlo ya tiko leri hi riphume.” Kutani Yehovha a ba mahlo ya vona hilaha Elixa a nga vula hakona. ₁₉Kutani Elixa a ku eka vona: “A hi yona ndlela, ni muti a hi wona; ndzi landzeni ndzi ta mi fikisa eka munhu loyi mi n'wi lavaka.” Kutani a va yisa eSamariya. ₂₀Kuteloko va nghenile eSamariya, Elixa a ku: “Oho! Yehovha! Va hanyanyise leswaku va vona.” Kutani Yehovha a va hanyanyisa va vona, kutani maswivo, a va ri exikarhi ka muti wa Samariya.

₂₁Kuteloko hosi ya Israele yi va vona, yi ku eka Elixa: “Xana ndzi va dlaya, ndzi va dlaya, tatana?” Elixa a ku: “U nga va dlayi. ₂₂Xana u dlaya lava u va khomaka hi banga ra wena ni vurha bya wena-ke? Va nyike swakudya ni mati va dya, va nwa; kutani a va tlhele va muka eka hosi ya vona.” ₂₃Kavaloko hosi ya Israele yi va endlela xifihlulo lexikulu, va dya, va nwa, kutani a lelana na vona, va tlhela, va muka eka hosi ya vona. Kutani mavandla ya Siriya a ma ha tlhelanga ma nghena etikweni ra Israele.

₂₄Endzhaku ka sweswo, Bene-Hadada, hosi ya Siriya, a hlengeleta nyimpi ya yena hinkwayo, a tlhandluka ku ya hlasela Samariya a wu rhendzela. ₂₅Kutani ndlala leyikulu swonghasi yi va kona emutini wa Samariya, ni nhlomulo lowukulu, leswaku nhloko ya mbhongolo yi xaviwa hi tixikele ta 80 ta silivhere, ni ku avanyisa ka vumune ka kab ya macimba ya magugurhwana, hi ntlhanu wa tixikele ta silivhere.

₂₆Kakuloko hosi ya Israele yi hundza erirhangwini, wansati a ta a huwelela, a ku eka yena: “Ndzi ponise wee, hosi yanga!” ₂₇Hosi yi ku eka yena: “Loko Yehovha a nga ku ponisi, ndzi ta ku ponisa ha yini-ke? Xana hi leswi humaka exivuyeni kumbe exikhuvutelweni?” ₂₈Hosi yi engeta yi ku eka yena: “U na yini?” Wansati a ku: “Wansati loyi, u ndzi byerile, a ku: ‘Ndzi nyike n'wana wa wena, hi dya namuntlha; mundzuku hi ta dya n'wana wa mina.’ ₂₉Kutani hi swekile n'wana wa mina, hi dya; siku leri tlhandlamaka ndzi n'wi byerile ndzi ku: ‘Neha n'wana wa wena, hi dya,’ kavaloko a fihla n'wana wa yena.” ₃₀Hosi, kuteloko yi twile marito ya wansati loyi, yi handzula tinguvu ta yona, kutani kakuloko yi hundza erirhangwini tiko ri vona leswaku yi ambele nguvu leyo khwaxa emirini, endzeni. ₃₁Kutani yi ku: “Xikwembu a xi ndzi be hi matimba loko nhloko ya Elixa, n'wana Xafati, yi tshama ehenhla ka yena namuntlha!” ₃₂Elixa a a tshamile endlwini ya yena kutani vakulukumba va tshamisile na yena; kavaloko hosi yi rhuma nandza un'wana eka yena. Loko ntsumi yi nga si fika eka yena, Elixa a ku eka vakulukumba: “Vonani, n'wana wa mudlayi loyi, u rhumile munhu ku ndzi tsema nhloko! Vonani! Loko ntsumi yi fika, pfalani nyangwa, mi n'wi susumeta hi rivanti: xana a mi twi swigingi swa hosi ya yena leyi n'wi landzaka?” ₃₃Kakuloko a ha vulavula na vona, ntsumi yi ngirimela eka yena, yi ku: “Waswivo, khombo leri, ri huma eka Yehovha; xana ndza ha langutela yini eka Yehovha?”