Rirhandzu ni ku tshemba ka muapostola.
1Sweswi, varhandziwa, loko hi ri ni ku tshembisiwa kuloko, a hi tihlantsweni thyaka hinkwaro ra miri ni ra moya, hi ri karhi hi hetisa ku hlawuleka ka hina exichabyeni xa Xikwembu.
2Hi amukeleni, hikuva a hi endlanga munhu swo biha; a hi onhanga munhu; a hi dyelelanga munhu. 3A ndzi vurisi sweswo ku mi sandza hikuva ndzi tshama ndzi vula leswaku etimbilwini ta hina, hi va swin'we eku feni ni le ku hanyeni. 4Loko ndzi vulavula na n'wina ndzi ni ku tshemba lokukulu; ndzi tidzunisa ngopfu ha n'wina; ndzi taleriwe hi ku chavelela, ndzi tsakile hi ku tlurisisa emaxangwini hinkwawo ya hina.
5Hikuva mpfhuka hi fika eMakedoniya, miri wa hina a wu wisanga niswitsongo, hi ri karhi hi xaniseka hinkwako; ku va ni ku lwa ehandle, ku va ku chava endzeni. 6Kambe Xikwembu lexi chavelelaka lava titsongahataka xi hi chavelele hi ku fika ka Tito; 7kutani a hi ku fika ka yena ntsena, kambe hi ku chavelela loku mi n'wi chaveleleke, hilaha a hi byeleke ku navela lokukulu ka n'wina, ni ku rila ka n'wina, ni laha mi ndzi chivirikelaka, timhaka hinkwato ti vuya ti ndzi tsakisa ngopfu.
Pawulo a tsakela ntirho wa epistola yo rhanga ya yena.
8Hikuva hambi ndzi mi vavisile hi epistola ya mina, a ndza ha tisori ha swona, hambiloko ndzi tisorile hikuva ndzi vona leswaku epistola yoleyo yi mi vavisile, hambi wu ri nkarhi wu nga ri wungani. 9Sweswi, ndzi tsakile, swi nga ri leswaku mi khomisiwa tingana, kambe swi ri leswaku tingana ta n'wina ti humese ku hundzuka; hikuva mi tele tingana hi mukhuva lowu rhandziwaka hi Xikwembu, kutani hi mukhuva wolowo, a hi mi endlanga swo biha, hambi yi ri emhakeni yin'we. 10Hikuva ku khomiwa hi tingana hi mukhuva lowu rhandziwaka hi Xikwembu ku humesa ku tisola loku nga ni ku hanya ku nga loku nga soriwiki; kambe ku khomiwa hi tingana hi mukhuva wa misava, ku humesa rifu. 11Hikuva maswivo, loko mi tele tingana sweswi hi mukhuva lowu rhandziwaka hi Xikwembu, mi hatlisile ngopfu ku tihlamulela ku phofula lokukulu ku va kona, ni ku tshuka lokukulu, ni ku navela lokukulu, ni ku chivirika lokukulu, ni ku laya lokukulu. Mi vonakisa eka hinkwaswo leswaku a mi nga ri na nandzu emhakeni leyi.
12Kambe ndzi mi tsalele sweswo, ku nga ri hikwalaho ka loyi a onheke hambi ku ri hikwalaho ka loyi a onheriweke, kambe a ku ri leswaku mi kombisiwa rirhandzu ra hina eka n'wina emahlweni ka Xikwembu. 13Hikwalaho hi chaveleriwile hi ku chavelela ka n'wina, kambe hi tsakisiwe ku tlurisisa hi ku tsaka ka Tito, hikuva moya wa yena wu kume ku wisa ha n'wina hinkwenu. 14Hikuva hambi ndzi tidzunisile ha n'wina emahlweni ka yena, a ndzi khomiwanga hi tingana; kambe hilaha hi mi byeleke swinene timhaka hinkwato, na kona ku tidzunisa ka hina ha n'wina eka Tito; ku kumiwile wu ri ntiyiso swinene. 15Hikokwalaho, loko a anakanya ku yingisa ka n'wina hinkwenu, ni hilaha mi n'wi rhurheleke hi xichavo ni ku rhurhumela, rirhandzu ra yena eka n'wina ri engetelekile. 16Kunene ndzi tsakile, hikuva ndza mi tshemba eka hinkwaswo.
