Ku hiseka ni ku tinyiketa ka Pawulo.
1Ngi mi yingisela kutsongo vuhunguki bya mina; ina-ke, ma ndzi yingisela. 2Hikuva ndza mi rhandza hi rirhandzu ra Xikwembu, hi leswi ndzi mi lovoleleke enuneni un'we, ku mi humesela eka Kriste, mi kotisa wanhwana la nga riki na nandzu. 3Kambe ndzi tshukile leswaku, kumbexana swi ta kotisa loko nyoka yi ringile Evha hi mano ya yona, ni ka n'wina mianakanyo ya n'wina yi nga onhaka, yi lahlekeriwa hi vunene bya Kriste. 4Hikuva loko ku fika un'wana eka n'wina, a mi dyondzisa Yesu un'wana, a nga ri loyi hi mi dyondziseke yena, ni Moya wumbe, wu nga ri lowu mi wu amukeleke, ni Evhangeli yimbe, yi nga ri leyi mi yi amukeleke, a mi ta swi yingisa swinene.
5Kambe ndzi ringanisa leswaku a ndzi vanga lontsongo ha nchumu, ni loko ku ri hi xilo xin'we, eka valavo va nga vaapostola lavakulu. 6Kungakuloko ndzi nga tlharihanga hi marito, a swi tano hi ku tiva; kambe hi tivikanile exikarhi ka n'wina hi matlhelo hinkwawo, ni le swilweni hinkwaswo.
7Xana ndzi dyohile loko ndzi titsongahatile leswaku mi ta tlakusiwa xana, hi leswi ndzi mi byeleke Evhangeli ya Xikwembu ndzi nga hakeriwi? 8Ndzi tekerile tikereke tin'wana, hi ku teka leswi ti ndzi pfunaka ha swona ku mi tirhela, kutani, hambiloko ndza ha ri exikarhi ka n'wina, ndzi ri ku pfumaleni, a ndzi tikelanga munhu; 9hikuva vanhu lava pfaka eMakedoniya, va ndzi pfunile hi leswi ndzi nga swi pfumala. Ndzi chavile ku mi tikela ha nchumu, ni sweswi ndza ha ta endlisa xisweswo. 10Vunene bya Kriste lebyi nga eka mina byi ta ndzi yimela, ndzi nga ka ndzi nga tekeriwi nkarhi wolowo wa ku tidzunisa hi lexi ndzi nga na xona ematikweni ya Akaya. 11Hikwalaho ka yini-ke? Xana hi leswi ndzi nga mi rhandziki xana? Swo tiva hi Xikwembu. 12Kambe leswi ndzi swi endlaka, ndzi ta engeta ndzi swi endla, leswaku loko va ri lava lavaka nkarhi, ndzi va pfumarisa wona, leswaku emhakeni leyi va tidzunisaka ha yena, va kumiwa va ri lava fanaka na hina. 13Hikuva vanhu lavo tano, i vaapostola vo hemba, vatirhi va mano lava ambalaka nghohe ya vaapostola va Kriste. 14Kambe a swi hlamarisi, hikuva Satana na yena, u ambala nghohe ya ntsumi ya ku vonakala. 15Loko swi ri tano, hi nga ka hi nga hlamari loko malandza ya yena ma ambele nghohe ya malandza ya leswo lulama; kambe makumu ya vona ma ta fana ni mitirho ya vona.
Pawulo u tidzunisa eku tsaneni ni le ku xanisakeni ka yena.
16Ndzi engeta ndzi ku: Munhu a nga tshuki a vula leswaku ndzi hungukile, hambi swi nga ri tano, ndzi rhurheleni hambi ndzi hungukile, na mina ndzi ta tidzunisa kutsongo. 17Lexi ndzi nga tidzunisaka ha xona, a ndzi xi vuri hi mukhuva wa Hosi, kambe ndzi vurisa leswo ngi ndzi hungukile. 18Sweswi kukota lavo tala lava tidzunisaka enyameni, na mina ndzi ta tidzunisa. 19Hikuva n'wina mi nga lavo tlhariha, mi yingisela swihunguki. 20Swi nga tsandza ni loko munhu a mi fuma, ni loko a mi dya, ni loko a mi tekela, ni loko munhu a mi phakata, ma n'wi yingisela. 21Ndzi vurisa sweswo hi tingana, kukotisa loko ngi hi tsanile; kambe hinkwaswo leswi munhu a nga chaviki ku swi vula (ndzi vula sweswo hi vuhunguki), na mina a ndzi nga chavi ku swi vula.
22Xana i Vaheveru? Na mina ndzi yena. Xana i Vaisraele? Na mina ndzi wa vona. Xana i vatukulu va Abrahama? Na mina ndzi yena. 23Xana i malandza ya Kriste? (Ndzi vulavula hi vuhunguki) ndza va tlula kwalaho; ndzi va tlula hi mitirho, ni timbanga ngopfu; ni le makhotsweni, ndzi le kule na vona; ni le eku feni, ku tele. 24Ndzi biwile hi tinhonga hi Vayuda kantlhanu, ku biwa kun'wana ni kun'wana ku endla mune wa makume, ku pfumaleka loku hetelelaka; 25ndzi biwile hi mikhavi kanharhu; ndzi khandliwile hi maribye kan'we, ndzi onhakeriwe hi byatso kanharhu; ndzi xwile siku rin'we ni vusiku byin'we exidziveni xa lwandle; 26ndzi ve tiendzweni leto tala; ndzi lave ku lova emilambyeni; ndzi lave ku lova exikarhi ka makhamba, ndzi lave ku lovisiwa hi varikwerhu; ndzi lave ku lovisiwa hi vamatiko; ndzi lave ku lova emitini; ndzi lave ku lova emananga; ndzi lave ku lova elwandle; ndzi lave ku lovisiwa hi vamakwavo va mavunwa, 27ndzi ri ku vavisekeni ni le mikarhalweni, ndzi pfumale ni vurhongo hi masiku, ndzi twe ndlala ni torha, ndzi tsoniwe swakudya kanyingi, ndzi twe xirhami, ndzi hlakalelwe hi tinguvu. 28Hambi ku nga hlayiwi makhombo lama humaka ehandle ndzi rhendzeriwe hi masiku hinkwawo hi mikanakano ya tikereke hinkwato. 29Un'wana loko a tsanile, na mina a ndzi tsananga xana? Un'wana loko a khunguvanyeka, a hileswaku na mina ndzi tshwile xana?
30Loko va nga ku, ku tidzunisa ku kona; mina ndzi ta tidzunisa eku tsaneni ka mina. 31Xikwembu lexi nga Tata wa Hosi ya hina, Yesu Kriste, xi nga xona lexi khensiwaka hilaha ku nga heriki, xa swi tiva leswaku a ndzi hembi. 32Siku ndzi nge Damaska, ndhuna ya hosi Areta a ndzi rindza emutini wa va Damaska, a rhandza ku ndzi khoma; 33kambe va ndzi xikisa erirhangwini hi fasitere, ndzi ri enguleni, kutani ndzi phonyokisa xisweswo emavokweni ya yena.
