2 VAKORINTO 1

₁Pawulo, muapostola wa Yesu Kriste, hi ku rhandza ka Xikwembu, na Timotiya makwerhu;

Eka kereke ya Xikwembu, leyi nga eKorinto, ni vakwetsimi hinkwavo va le tikweni hinkwaro ra Akaya;

₂Tintswalo ni ku rhula a swi ve na n'wina, swi huma eka Xikwembu, Tata wa hina, ni ka Hosi Yesu Kriste.

₃A ku khensiwe Xikwembu, Tata wa Hosi ya hina, Yesu Kriste, Tatana wa tintswalo, Xikwembu xa ku chavelela hinkwako, ₄lexi hi chavelelaka emakhombyeni hinkwawo ya hina, leswaku lava nga emakhombyeni, hambi ma ri wahi ni wahi, hi ta tiva ku va chavelela hi ku chavelela loku na hina hi chaveleriwaka hakona hi Xikwembu; ₅hikuva kukota leswi maxangu ya Kriste ma hi taleleke, na kona, ku chaveleriwa ku hi talele ha Kriste! ₆Hambi hi ri maxangwini, hileswaku ku ve ku chavelela ka n'wina, ni ku hlayiseka ka n'wina; ku hlayiseka loku ku tirha loko mi ri karhi mi yingisela ku vaviseka loku hi vavisekaka hakona na hina; hambiloko hi chaveleriwa, hileswaku ku ve ku chavelela ka n'wina. Kutani ku tshemba ka hina eka n'wina ku tiyile, ₇hi ku tiva leswaku, kukota leswi mi nga ni ku averiwa eku vavisekeni, mi ta va na kona eku chaveleriweni.

₈Kunene, vamakwerhu a hi rhandzi leswaku mi nga swi tivi leswaku loko ma ri maxangu lama hi humeleleke Asiya, hi tshikileriwile ngopfungopfu ku tlurisa matimba ya hina, hi kondza hi helela hi ku tshemba ka vutomi bya hina. ₉Kambe ku avanyisiwa ka ku fa ku ve ka hina leswaku hi nga titshembi, kambe hi tshemba Xikwembu lexi pfuxaka vafi, ₁₀xi nga xona lexi hi hanyiseke eku feni lokonghasi, xa ha ri karhi xa hi hlayisa. Kutani hi tshembile leswaku xi ta tshama xi hi hanyisa, hi ri karhi hi pfuniwa hi mikhongelo ya n'wina; ₁₁leswaku tintswalo teto hi ti laveleriweke hi vanhu lavo tala, ti ta khensiwa hi lavo tala hikwalaho ka hina.

₁₂Hikuva ku tidzunisa ka hina ku le vumbhonini bya ripfalo ra hina; hikuva hi hanyile ematikweni, ngopfu exikarhi ka n'wina, hi mbilu leyi pfumalaka mano, hi ri ni vunene bya Xikwembu, byi nga ri vutlhari bya nyama, kambe ti ri tintswalo ta Xikwembu. ₁₃Hikuva a hi mi tsaleri timhaka tin'wana, loko ti nga ri leti mi ti hlayaka, leti mi ti tivaka; teto ndzi tshembaka leswaku mi ta va mi ti tiva ku yisa eku heteleleni. ₁₄Kukota leswi mi swi pfumelaka hitlhelo rin'wana, leswaku hi hina hi nga ku dzunisiwa ka n'wina, kukotisa leswi na n'wina mi nga ta va ku dzunisiwa ka hina hi siku ra Hosi Yesu.

₁₅Kuteloko ndzi ri karhi ndzi tshembile sweswo, a ndzi rhandzile ku ta eka n'wina eku sunguleni, mi ta nyikiwa tintswalo ta vumbirhi. ₁₆Kutani ngi ndzi ta khaluta, ndzi ya eMakedoniya; kutakuloko ndzi tlhela eMakedoniya, a ndzi ta vuya hi le ka rikwenu, mi ta va n'wina mi ndzi heleketaka loko ndzi ya eYudiya. ₁₇Xana loko ndzi anakanya sweswo a ndzi vungunya xana, kumbe loko ndzi kanela mhaka yoleyo, ndzi kanela hi nyama xana, leswaku leswi nga ina ni e-e, swi kumiwa eka mina xana? ₁₈Kambe Xikwembu xi tiva leswaku marito ya hina eka n'wina a ma hundzukanga, leswaku ma ve ina ni e-e; ₁₉hikuva N'wana wa Xikwembu, Yesu Kriste la vuriweke exikarhi ka n'wina hi hina, na Silvano, na Timotiya, a nga endlanga leswi nga ina ni e-e; kambe a swi ri ina eka yena. ₂₀Hikuva ku hlayela ka Xikwembu hinkwako, hi loku nga ina eka xona, ni leswi nga Amen eka xona, leswaku Xikwembu xi dzunisiwa ha hina.

₂₁Kutani la hi tiyisaka na n'wina eka Kriste, ₂₂loyi a hi toteke, i Xikwembu, xi nga xona lexi hi fungheke, lexi hi nyikeke xirhangana xa Moya etimbilwini ta hina.

₂₃Kutani ndzi vitana Xikwembu, yi va mbhoni ya moya wa mina, leswaku a ku ri ku mi tsetselela, loko ndzi nga si ta eKorinto. ₂₄Na sweswi, swi nga ri leswaku hi ni ku fuma ehenhla ka ku pfumela ka n'wina, kambe hi mi tirhela leswi mi tsakisaka, hikuva kunene mi yime swinene hi ku pfumela.