Alitari, ni lwandle ra koporo, ni swigotso swa tempele.
1Kutani a endla alitari ya koporo; ku leha ka yona a swi ri swisungunhu swa 20, ni ku anama ka yona swisungunhu swa 20; ni ku tlakuka ka yona, swisungunhu swa 20.
2A chulula ni lwandle ra koporo; a ri ri ra swisungunhu swa 10, ku suka etlhelo rin'wana ku fika etlhelo rin'wana; a xi ri xirhendzevutana; ku tlakuka ka rona a swi ri swisungunhu swa ntlhanu, kutani ngoti ya swisungunhu swa 30 yi kota ku ri rhendzela hinkwaro. 3Swifaniso swa tihomu a swi ri ehansi ka rona ematlhelweni hinkwawo, a swi ri khume hi swisungunhu; tihomu leti a ti endla tinxaxa timbirhi, ti chuluriwile swin'we na rona. 4A ri vekiwile ehenhla ka tihomu ta 12; tinharhu ta tona ti langute en'walungwini, tinharhu ti langute evupeladyambu, tinharhu ti langute edzongeni, tinharhu ti langute evuxeni; lwandle a ri ri ehenhla ka tona, kutani micila hinkwayo ya tona a yi ri exikarhi. 5Ku tsindziyela ka rona a xi ri xandla xin'we, nomu wa rona a wu fana ni nomu wa ndzheko, ri fana ni khon'wa; ri enela tibati ta 3 000.
6A endla ni mikamba ya khume; a veka ntlhanu wa yona tlhelo ra xinene, ni ntlhanu tlhelo ra ximatsi; a va hlantswa kona mitirho ya holokosta; rona lwandle ri pfuna vaprista ku hlamba kona.
7A endla ni tikandelari ta khume ta nsuku hi nawu wa tona; a ti veka etempeleni, leta ntlhanu exineneni ni ta ntlhanu eximatsini.
8A endla ni matafula ya khume a ma veka etempeleni, ya ntlhanu a ma veka exineneni, ni ya ntlhanu eximatsini. A endla ni mindzheko ya dzana ya nsuku.
9Kutani a endla xivava xa vaprista, ni xivava lexikulu, ni timbanti ta swona; a nameka timbanti hi koporo. 10Loko ri ri lwandle, a ri veka etlhelo ra xinene ra yindlu evuxeni ri languta edzongeni.
11Huramu a endla timbita ni tifoxolo ni mikambana. Huramu a heta ntirho wa yindlu ya Xikwembu lowu a wu endleleke Solomoni: 12timhandze timbirhi ni tinhloko timbirhi ta swirhendzevutana leti ngi ti ri etinhleni ta timhandze; ni mitirho mimbirhi leyi lukiweke ku funengeta tinhloko letimbirhi ta swirhendzevutana leti ngi ti ri etimhandzeni, 13ni magirenada ya 400 ya mitirho mimbirhi leyi lukiweke, tinxaxa timbirhi ta magirenada eka ntirho wun'wana ni wun'wana ku funengeta tinhloko letimbirhi ta swirhendzevutana leti ngi ti ri etinhleni ta timhandze; 14a endla ni switikirheto, ni mikamba ehenhla ka swona; 15ni lwandle leri nga rin'we, ni tihomu ta 12 leti ngi ti ri ehansi ka rona; 16ni timbita, ni tifoxolo, ni tiforoko, ni swigotso hinkwaswo swa swona. Huramu-Abi a swi endlela hosi Solomoni hi koporo leyi vangamisiweke, swi ri swa yindlu ya Yehovha. 17Hosi yi va lerisa ku swi chulula ebanyini ra Yordani, emisaveni ya vumba, exikarhi ka Sukoti na Sereda. 18Solomoni a endla swigotso leswi, swi tele ngopfungopfu, hikuva a va lavisisanga ku tika ka koporo.
19Solomoni a endla ni swingolongondzwana hinkwaswo swa yindlu ya Xikwembu: yi nga alitari ya Xikwembu, ni matafula ku veka swinkwa ehenhla ka wona; 20ni tikandelari ta nsuku lowunene, ni mavoningo ya tona, lawa va ma lumekaka hi nawu emahlweni ka vukwetsimelo, 21ni swiluva ni mavoningo, ni swikero swa mavoningo, swi ri swa nsuku lowunene ngopfu; 22ni mikwana, ni mindzheko, ni mikombe, ni timbita ta ndzilo, swi ri swa nsuku lowunene. 23Loko yi ri nyangwa ya yindlu, ni timbanti ta yona ta le ndzeni, enyangweni ya xikwetsimisiso, ni timbanti ta yindlu enyangweni ya tempele, ti ri ta nsuku.
