Ta muprofeta Yehu, ni ta Yoxafati loko a lulamisa tihuvo ta tiko.
1Yoxafati, hosi ya Yuda, a tlhela hi ku rhula endlwini ya yena eYerusalema. 2Kavaloko Yehu, n'wana Hanani, muprofeta, a huma a ya hlangana na yena, a ku eka hosi Yoxafati: “Xana lowo biha u fanekele ku pfuniwa-ke, xana u rhandza lava vengaka Yehova-ke? Hikwalaho ka swona, Yehovha u ku karihele. 3Ntsena u kumiwile u ri ni timhaka letinene, hikuva u susile etikweni swifaniso swa Axera, u lavile Xikwembu hi mbilu hinkwayo ya wena.”
4Yoxafati a tshama eYerusalema; kambe a engeta a huma, a famba exikarhi ka tiko, ku suka eBerexeba ku ya fika entshaveni ya Efrayimi, kutani a tlherisela vanhu eka Yehovha, Xikwembu xa vatata wa vona. 5A veka vaavanyisi etikweni, emitini hinkwayo ya makhokholo ya Yuda, emutini wun'wana ni wun'wana. 6A ku eka vaavanyisi: “Tivoneleni leswi mi nga ta swi endla, hikuva a mi avanyisi mi rhumiwa hi vanhu, kambe mi rhumiwa hi Yehovha, kutani u na n'wina loko mi ri karhi mi avanyisa. 7Sweswi, xichavo xa Yehovha a xi ve ehenhla ka n'wina; tivoneleni hilaha mi nga ta endla hakona, hikuva eka Yehovha, Xikwembu xa hina, a ku na vumbabva hambi ku ri ku ya hi nghohe ya vanhu, ni ku amukela tinyiko.”
8Ni le Yerusalema, Yoxafati a veka Valevhi van'wana exikarhi ka vaprista, ni le xikarhi ka tihosana ta tindlu ta vatatana va Israele, etimhakeni ta Yehovha, ni le timhakeni ta ku hambana ka vanhu; hikuva a va vuyile eYerusalema. 9A va lerisa, a ku: “Mi ta endlisa sweswo hi ku chava Yehovha, mi va ni ku tshembeka, ni timbilu leto basa. 10Emhakeni yin'wana ni yin'wana leyi nga ta tisiwa eka n'wina hi vamakwenu lava akeke emitini ya vona, loko yi ri mhaka ya ku dlawa, ni ya nawu, hambi ya ku lerisa, kumbe ya marito, kumbe ya ku letela, mi ta va kombisa leswinene, leswaku va nga tshuki va dyohela Yehovha, ni leswaku mi nga kariheriwi swin'we ni vamakwenu. Mi ta endlisa sweswo leswaku mi nga tshuki mi va ni nandzu. 11Amariya, muprista lonkulu, u vekiwile ehenhla ka n'wina ku vulavula timhaka hinkwato ta Yehovha; na Zebadiya, n'wana Iximaele, hosana ya yindlu ya Yuda, u lerisiwile timhaka hinkwato ta hosi; kutani valanguteri lava nga ta mi pfuna, hi vona Valevhi. Tiyani timbilu, mi va mi tirha, kutani Yehovha u ta va ni munhu lonene!”
