Ta Yoxafati, hosi ya Yuda.
1Yoxafati, n'wanakwe, a fuma ematshan'weni ya yena, a tiya mbilu hikwalaho ka Israele; 2a veka mavandla emitini hinkwayo ya makhokholo ya Yuda, a ya veka ni le tikweni ra Yuda ni le mitini ya Efrayimi leyi nga tekiwa hi Asa, tata wa yena.
3Yehovha a va na Yoxafati, hikuva a fambile etindleleni to sungula ta Davhida, tata wa yena; a nga lavanga va Baali, 4hikuva a a lava Xikwembu xa tata wa yena, a famba emilawini ya xona, ku nga ri hi mukhuva wa Vaisraele. 5Kutani Yehovha a tiyisa vuhosi evokweni ra yena, va Yuda hinkwavo va luva eka Yoxafati; a va ni rifuwo lerikulu ni ku twala lokukulu. 6Mbilu ya yena yi tiyisiwa etindleleni ta Yehovha a ko a susa switsunga ni swifaniso etikweni ra Yuda.
7Hi lembe ra vunharhu ra ku fuma ka yena, a rhuma tindhuna ta yena, a ri Bene-Hayili, na Obadiya, na Zakariya, na Netanele, na Mikaya ku ya dyondzisa emitini ya Yuda; 8a rhuma na vona Valevhi, a a ri Xemaya, na Netaniya, na Zebadiya, na Asahele, na Xemiramoto, na Yonatani, na Adoniya, na Tobiya, na Tobi-Adoniya, va ri Valevhi; ni vaprista Elixama na Yehoramu a va ri na vona. 9Va dyondzisa etikweni ra Yuda, va ri ni buku ya nawu wa Yehovha; va ya hi miti hinkwayo ya Yuda, va dyondzisa tiko.
10Xichavo xa Yehovha xi va eku fumeni ka matiko hinkwawo lama rhendzeleke Yuda hi le xikarhi, kutani a va humanga nyimpi ku lwa na Yoxafati. 11A ku ri ni Vafilista van'wana lava tiseleke Yoxafati mihlengo ni mali ya ndzuvo; hambi va ri Maarabu va n'wi tisela swifuwo leswitsongo, ma ri makhuna ya 7 700 ni swiphongo swa 7 700. 12Yoxafati a ya emahlweni hi ku kula, a fika eku hetisekeni; a aka tindlu ta vuhosi ni miti ya xuma etikweni ra Yuda. 13A a ri ni mitirho leyo tala emitini ya Yuda, ni vanhu va nyimpi, ti ri tinhenha eYerusalema.
14Hi wona ntsengo wa vona hi tindlu ta vatata wa vona. Eka Yuda, tindhuna ta khume ra madzana; Adina a yi ri ndhuna leyikulu, a a ri ni tinhenha ta 300 000; 15kusuhi na yena, ndhuna Yohanani, a a ri ni vavanuna va 280 000; 16kusuhi na yena, Amasiya, n'wana Zikri, la tinyiketeke Yehovha hi ku rhandza ka yena, a a ri ni tinhenha ta 200 000.
17Eka va Benjamini: Eliyada, wanuna wa matimba, la ngi a ri ni vavanuna lava tamelaka mavurha ni tinhlungula, va 200 000; 18kusuhi na yena Yozabadi, la ngi a ri ni vavanuna lava hlomaka va 180 000. 19Hi vona lava tirheleke hosi, ehandle ka lava vekiweke hi hosi emitini ya makhokholo, etikweni hinkwaro ra Yuda.
