Ta Asa, hosi ya Yuda.
1Abiya a etlela ni vatata wa yena, va n'wi lahla emutini wa Davhida; kutani Asa, n'wana wa yena, a fuma ematshan'weni ya yena. Enkarhini wa yena, tiko ri etlela hi malembe ya khume.
2Asa a endla leswinene ni leswi lulameke emahlweni ka Yehovha, Xikwembu xa yena. 3A susa tialitari ta valuveri, ni switsunga, a faya swifaniso, a mbundzuxa swifaniso swa Axera. 4Kutani a lerisa va Yuda ku lava Yehovha, Xikwembu xa vatata wa vona, ni ku hlayisa milawu ni swileriso. 5A susa switsunga ni timhandze ta dyambu emitini hinkwayo ya Yuda. Kutani tiko ri etlela emahlweni ka yena.
6A aka miti ya makhokholo etikweni ra Yuda, hikuva tiko a ri etlele; a ku vanga na tinyimpi etikweni ra yena malembe lawa, hikuva Yehovha a n'wi nyikile ku wisa. 7A ku eka va Yuda: “A hi akeni miti leyi, hi yi rhendzela hi rirhangu, yi va ni makhokholo, ni timbanti, ni tinghole ta tona; tiko ra ha ri kona emahlweni ka hina, hikuva hi lavile Yehovha, Xikwembu xa hina; hi n'wi lavile, kutani u hi nyikile ku wisa ematlhelweni hinkwawo.” Kavaloko va aka, va tsaka. 8Asa a a ri ni nyimpi ya vavanuna va 300 000 va Yuda, lava tamelaka switlhangu ni mafumu, ni va 280 000 va Benjamini lava tamelaka tinhlungula, va karhi va copa hi vurha hinkwavo a ti ri tinhenha.
9Kutani Zera, wa Mukuxi, a huma nyimpi ku lwa na vona, a a ri ni vanhu va 1 000 000, ni tigolonyi ta 300, a fika eMarexa. 10Asa a huma nyimpi ku ya hlangana na yena, kutani va tilunghisela ku lwa enkoveni wa Sefata, ekusuhi na Marexa. 11Asa a khongela Yehovha, Xikwembu xa yena, a ku: “Oho Yehovha! Handle ka wena, a ku na un'wana la kotaka ku pfuna la nga riki na matimba loko a pfukiwa hi Lowa matimba. Hi pfune wee Yehovha, Xikwembu xa hina! Hikuva hi tshemba wena, kutani hi humile nyimpi hi vito ra wena ku ta lwa ni vunyingi lebyi. Hi wena Yehovha Xikwembu xa hina; u nga tshuki u hluriwa hi munhu!”
12Kutani Yehovha a hlula Vakuxi emahlweni ka Asa ni le mahlweni ka va Yuda; kutani Vakuxi va tsutsuma. 13Asa ni tiko leri ngi ri ri na yena, va va hlongorisa ku fika eGerara, kutani ku dlayiwa Vakuxi lavo tala swonghasi, ku nga poni na un'we, hikuva va herisiwile emahlweni ka Yehovha ni le mahlweni ka nyimpi ya yena. Kutani va Yuda va kuma xuma lexo tala ngopfu; 14va hlasela miti hinkwayo leyi nga ekusuhi na Gerara, hikuva ku chava ka Yehovha a ku va khomile, va phanga miti hinkwayo hikuva a yi ri ni xuma lexikulu ngopfu. 15Va hlasela ni matshanga ya mitlhambi, kutani va famba ni tinyimpfu leto tala ngopfu, ni tikamela; va tlhelela eYerusalema.
