1 VATESALONIKA 5

₁Loko ti ri ta masiku ni mikarhi, a swi hi fanelanga, vamakwerhu, ku mi tsalela. ₂Hikuva ma swi tiva swinene, na n'wina, leswaku siku ra Hosi ri ta humelela ri kotisa khamba ra vusiku. ₃Hikuva siku va nga ta ku: “Ku rhurile, ku tsakiwile!” Hilaha ku onhaka loku nga languteriwangiki ku nga ta va wela ehenhla, kukota mbeleko loko yi humelela la tikeke, va nga ka va nga poni. ₄Kambe loko mi ri n'wina vamakwerhu, a mi le munyameni, siku rero ri nga mi weli hi xitshuketo kukotisa khamba. ₅Hinkwenu mi vana va ku vonakala, mi vana va nhlekanhi; a mi va vusiku, hambi va munyama. ₆Hikwalaho-ke, hi nga tshuki hi etlela kukota van'wana, kambe a hi hitekeni, hi ri karhi hi tikhoma. ₇Hikuva lava etlelaka, va etlela nivusiku ni lava pyopyaka, va pyopya nivusiku. ₈Kambe hina hi nga va nhlekanhi, a hi tihlayiseni, kutani hi ambala xisirhelelo xa xifuva, ku nga ku pfumela ni rirhandzu, hi havaxela ni xihuku xa ku tshemba ku hlayiseka. ₉Hikuva Xikwembu a xi hi vekelanga ku kariha, kambe ku ri ku hi fuwisa ku hlayiseka hi Hosi ya hina, Yesu Kriste, ₁₀la hi feleke leswaku, hambi hi hanyanya, hambi hi etlele, hi hanya swin'we na yena. ₁₁Hikwalaho khongotelanani, mi akisana, kukotisa leswi mi swi endlaka.

₁₂Ha mi khongela, vamakwerhu, leswaku mi va ni xichavo eka lava nga ni ntirho exikarhi ka n'wina, lava mi risaka eHosini, lava mi tiyisaka; ₁₃mi va ni xichavo eka vona ngopfungopfu hi rirhandzu, hikwalaho ka ntirho wa vona. Akisanani swin'we hi ku rhula.

₁₄Kambe, vamakwerhu, ha mi khongotela, hi ri: Layani lava nga fambiki hi nawu, mi chavelela lava karheleke timbilu, mi tiyisa lava tsaneke, mi va lehisela mbilu hinkwavo. ₁₅Mi vona leswaku ku nga tshuki ku va na loyi a rihisaka swo biha hi leswo biha; kambe lavani hi masiku leswo saseka eka un'wana ni un'wana exikarhi ka n'wina, ni ka hinkwavo.

₁₆Tsakani hi masiku.

₁₇Mi nga rhuteli ku khongela.

₁₈Etimhakeni hinkwato, mi khensa; hikuva hi swona leswi Xikwembu xi swi rhandzaka, ha Yesu Kriste.

₁₉Mi nga timi Moya.

₂₀Mi nga sandzi vuprofeta.

₂₁Ringani hinkwaswo, mi tiyisela eka leswo saseka.

₂₂Chavani hinkwaswo leswi fanaka ni leswo biha.

₂₃Xikwembu xa ku rhula a xi mi basise swinene, xi mi endla lava hetisekeke hinkwenu, leswaku hinkwaswo leswi nga eka n'wina, moya, ni mbilu, ni miri, swi hlayiseriwa ku vuya ka Hosi ya hina, Yesu Kriste, swi basile. ₂₄La mi vitaneke wa tshembeka, u ta swi endla.

₂₅Vamakwerhu, hi khongeleleni.

₂₆Rungulani vamakwavo hinkwavo hi ku ntswontswa loku tengeke.

₂₇Ndza mi khongela hi Hosi leswaku epistola leyi, yi hlayeriwa vamakwerhu hinkwavo.

₂₈Tintswalo ta Hosi ya hina, Yesu Kriste, a ti ve na n'wina.