1 VATESALONIKA 1

₁Pawulo, na Silvano, na Timotiya;

Eka kereke ya Vatesalonika leyi nga eka Xikwembu Tatana, ni le ka Hosi ya hina Yesu Kriste;

Tintswalo ni ku rhula a swi ve na n'wina, swi huma eka Xikwembu, Tata wa hina, ni ka Hosi ya hina Yesu Kriste.

₂Hi khensa Xikwembu hi masiku hikwalaho ka n'wina hinkwenu, hi ri karhi hi mi anakanya emikhongelweni ya hina; ₃a hi tshiki ku ehleketa ntirho wa ku pfumela ka n'wina, ni nyuku wa rirhandzu ra n'wina, ni ku chivirika ka ku tshemba ka n'wina eka Hosi Yesu Kriste, emahlweni ka Xikwembu, Tata wa hina; ₄hi ri karhi hi tiva, vamakwerhu lava rhandziwaka hi Xikwembu, ku hlawuriwa ka n'wina. ₅Hikuva Evhangeli ya hina a yi tangi eka n'wina hi marito ntsena, kambe yi tile hi matimba ni Moya lowo Kwetsima, ni ku khorwisa lokukulu, hi laha mi tivaka hakona mahanyelo ya hina eka rikwenu hikwalaho ka n'wina. ₆Kutani, na n'wina mi hundzukile vaetisi va hina ni va Hosi, hi ku amukela Rito hi ku tsaka ka Moya lowo Kwetsima mi ri emaxangwini lamakulu, ₇kutani mi tiendle xikombiso eka hinkwavo lava nga pfumela eMakedoniya ni le Akaya. ₈Hikuva rito ra Hosi, loko ri suka eka rikwenu, ri pfumile, ku nga ri eMakedoniya ni le Akaya ntsena, kambe ku pfumela ka n'wina eka Xikwembu ku twakarile hinkwako, kwalaho a swa ha faneri leswaku hi vula nchumu hakona. ₉Hikuva vanhu va rungula maenghenelo ya hina eka rikwenu, ni hilaha mi nga hundzukela hakona eka Xikwembu, mi fularhela swifaniso ku tirhela Xikwembu lexi hanyaka, xa ntiyiso; ₁₀ni ku langutela ematilweni N'wana wa xona, loyi xi n'wi pfuxeke eku feni, a nga Yesu, la hi kutsuleke eku kariheni loku nga ta ta.