1 SAMIELE 4

₁Israele a huma ku ya hlangana ni Vafilista ni ku lwa na vona, kutani va gova ekusuhi na Ebenezere; vona Vafilista a va gova eAfeke. ₂Vafilista va tilunghisa ku ya hlangana na Israele, kutani ku lwa ku va kona hinkwako. Israele a hluriwa hi Vafilista lava dlayeke vanhu eku lweni ni le nhoveni, va lava ku fika 4 000. ₃Tiko ri tlhela ri nghena emixaxeni, kutani vakulukumba va Israele va ku: “Xana Yehovha u hi tshikele yini hi hluriwa hi Vafilista namuntlha xana? A hi yeni Xilo, hi ya lava areka ya ntwanano wa Yehovha, a yi te xikarhi ka hina, yi hi ponisa emavokweni ya valala va hina.” ₄Kavaloko tiko ri rhuma vanhu eXilo, kutani va tisa areka ya ntwanano wa Yehovha wa mavandla, la tshamaka xikarhi ka tikerubu. Na vona vana vambirhi va Heli, Hofini na Finiyasi, a va ri kona, ni areka ya ntwanano wa Xikwembu.

₅Kakuloko areka ya ntwanano wa Yehovha yi nghena emixaxeni, Vaisraele hinkwavo va ba huwa leyikulu ngopfu, misava yi ko yi tsekatseka. ₆Vafilista va yingisa rito ra huwa leyi, kutani va ku: “Mpfumawulo wa huwa leyikulu emixaxeni ya Vaheveru i yini xana?” Kutani va byeriwa leswaku areka ya Yehovha yi tile emixaxeni. ₇Kutani Vafilista va chava, hikuva a va ku: “Xikwembu xi tile emixaxeni.” Va engeta va ku: “Hi le khombyeni! Hikuva a swi nga ri tano tolo ni tolweni. ₈Hi le khombyeni! I mani la nga ta hi kutsula emavokweni ya swikwembu leswi swi matimba xana? Hi swona swikwembu leswi nga ba Vaegipta hi makhombo ya tinxakaxaka emananga. ₉Tiyani, Vafilista, mi va vavanuna, leswaku mi nga tshuki mi fumiwa hi Vaheveru, kukotisa leswi va fumiwaka hi n'wina. Lwanani hi vunhenha!” ₁₀Kutani Vafilista va lwa, kutani va Israele va hluriwa kutani va balekela un'wana ni un'wana entsongeni wa yena; khombo ri va lerikulu; ku wa vavanuna va Israele lava hlomeke va 30 000.

₁₁Areka ya Xikwembu yi tekiwa, na vona vana vambirhi va Heli, Hofini na Finiyasi, va dlawa.

₁₂Munhu wa Benjamini a tsutsuma, a sukile eku lweni, kutani a fika eXilo siku rolero, tinguvu ta yena ti handzuriwile, ni misava yi ri enhlokweni ya yena. ₁₃Kakuloko a fika, Heli a tshamisile exitshan'weni, a langutele tlhelo ra ndlela, hikuva mbilu ya yena a yi rhurhumela hikwalaho ka areka ya Xikwembu. Kuteloko munhu loyi a fikile a byela emutini timhaka, kutani muti hinkwawo wu ba huwa. ₁₄Heli a twa mpfumawulo wa huwa, a ku: “Mpfumawulo wa nkitsikitsi lowu, i yini xana?” Kavaloko munhu a hatlisa a ta, a byela Heli timhaka hinkwato. ₁₅Heli a a ri ni malembe ya 98, mahlo ya yena a ma file, a a nga voni nchumu. ₁₆Munhu loyi a ku eka Heli: “Ndzi sukile eku lweni, ndzi balekile kona namuntlha.” ₁₇Heli a ku: “Mahungu ya wena hi wahi, n'wananga?” La tiseke mahungu a hlamula, a ku: “Israele u balekile emahlweni ka Vafilista na swona tiko ri le khombyeni lerikulu, vana vambirhi va wena, Hofini na Finiyasi va file, kutani areka ya Xikwembu yi tekiwile.” ₁₈Kakuloko a vula areka ya Xikwembu, Heli a wa hi xikosi, a ri exitshan'weni xa yena, kusuhi ni nyangwa, nhamu ya yena yi tshoveka, kutani a fa, hikuva a a ri munhu wa khale, wo tika. A a avanyisile Israele hi malembe ya 40.

₁₉N'wingi wa yena, nsati wa Finiyasi a a tikile, a ri ekusuhi ni ku veleka; kakuloko a twa mahungu leswaku areka ya Xikwembu yi tekiwile, ni leswaku n'wingi wa yena, ni nuna wa yena va file, a korhamela hansi kutani a veleka, hikuva ku luma ku n'wi sungule kan'we. ₂₀Kuteloko a ri ekusuhi ni le ku fa, vavasati lava ngi va ri ekusuhi na yena, va ku eka yena: “U nga chavi, hikuva u velekile wanuna.” ₂₁Kambe a nga hlamulanga nchumu, ni ku n'wi languta. A thya n'wana vito ra Ikabodo, hikuva a ku: “Ku twala ku sukile eIsraeleni”; a ku ri hikwalaho ka areka ya Xikwembu leyi tekiweke, ni hikwalaho ka n'wingi wa yena ni nuna wa yena. ₂₂A ku: “Ku twala ku sukele Israele, hikuva areka ya Xikwembu yi tekiwile.”