1 SAMIELE 29

₁Vafilista va hlengeleta tinyimpi ta vona hinkwato eAfeke; kutani Vaisraele a va govile ekusuhi ni xihlovo lexi nge Yizriele. ₂Tihosi ta Vafilista a ti hundza hi madzana ni mavandla hi makume ya madzana; kutani Davhida ni vanhu va yena a va famba endzhaku, va ri na Akixi. ₃Kutani tihosi ta Vafilista ti ku: “Vaheveru lava i yini xana?” Akixi a ku eka tihosi ta Vafilista: “A hi Davhida loyi ingi a ri nandza wa Sawulo, hosi ya Israele, loyi ngi a ri na mina masiku layo tala, hambi ma ri malembe; a ndzi kumanga nchumu eka yena, ku suka siku leri a fikeke eka mina ku fika namuntlha.”

₄Tihosi ta Vafilista ti n'wi karihela, ti ku eka yena: “Tlherisa munhu loyi, a a muke ekaya ka yena laha u n'wi akiseke kona, a nga ka a nga fambi eku lweni na hina, leswaku a nga tshuki a hundzuka nala wa hina eku lweni. Hikuva u ta kumisa ku yini tinswalo eka hosi ya yena, loko ku nga ri hi tinhloko ta vanhu lava xana? ₅A hi Davhida loyi va nga hlamulana eku cineni, va n'wi dzunisa, va ku:

₆Kavaloko Akixi a vitana Davhida a ku eka yena: “Yehovha, wa hanya! U munhu la lulameke, a ndzi ta rhandza ku ku vona u huma u va u nghena na mina enyimpini, hikuva a ndzi kumanga ku biha eka wena ku suka siku leri u ngheneke eka mina ku fika namuntlha; kambe tihosi a ti ku tsakeri? ₇Sweswi, tlhela u muka hi ku tsaka leswaku u nga endli nchumu lowo biha emahlweni ka tihosi ta Vafilista.” ₈Davhida a ku eka Akixi: “Ndzi endle yini xana? U kume yini eka nandza wa wena, ku sungula siku leri ndzi teke mahlweni ka wena, ku fika namuntlha, leswaku ndzi siveriwa ku ya lwa ni valala va hosi, mufumi wanga xana?” ₉Akixi a hlamula, a ku eka Davhida: “Ndza swi tiva, hikuva u lulamile emahlweni ka mina kukotisa ntsumi ya Xikwembu. Ntsena tihosi ta Vafilista ti ku: ‘A nga ka a nga tlhandluki na hina eku lweni.’ ₁₀Sweswi, pfuka nimpundzu ni malandza ya hosi ya wena lama teke na wena; mi ta pfuka nimpundzu, kutani kutakuloko ri sungula ku xa, mi ta suka.” ₁₁Sweswo Davhida a pfuka nimpundzu ni vanhu va yena, va suka wa ha ri mixo, va tlhelela etikweni ra Vafilista. Kambe Vafilista va tlhandlukela eYizriele.