Ta ku cheriwa ka Sawulo hi mafurha, a bvumbha ni vaprofeta.
1Kutani Samiele a teka rimhondzo ra mafurha, a ri chela enhlokweni ya Sawulo, kutani a n'wi ntswontswa a ku: “Xana Yehovha a nga ku chelanga hi mafurha leswaku u va hosi ehenhla ka ndzhaka ya yena xana? 2Namuntlha loko u ta famba u hambana na mina, u ta kuma vanhu vambirhi kusuhi ni sirha ra Rahele, endzilakaneni wa Benjamini, eSelesaka, va ta ku eka wena: ‘Timbhongolo leti ngi u ti lava, ti kumiwile, kutani tata wa wena u rivele mhaka ya timbhongolo, kambe u vavisekela n'wina, a ku: “Ndzi ta endla yini hikwalaho ka n'wananga?” ’ 3U ta suka kona, u ya emahlweni, kutani u ta fika enkuhlwini wa Taboro: u ta hlanganisiwa kona ni vanhu vanharhu lava tlhandlukelaka eka Xikwembu, eBetele, un'wana a rhwele swimbutana swinharhu, un'wana a rhwele swinkwa swinharhu, un'wana kambe a rhwele xikutsu xa vhinyo; 4va ta ku rungurisa ku hanya ka wena, kutani va ta ku nyika swinkwa swimbirhi, u ta swi amukela emavokweni ya vona. 5Endzhaku ka swona u ta fika eGibeya-Elohimi, laha ku nga ni yindlu ya valanguteri va tiko ra Vafilista. Kutakuloko u nghena kona, emutini, u ta hlangana ni ntlawa wa vaprofeta lava ngirimelaka va suka exivandleni lexi tlakukeke va ri ni timbila, ni ngoma, ni nanga, ni haripa, va ri karhi va bvumbha. 6Kutani Moya wa Yehovha wu ta ku khoma, u ta bvumbha na vona, u ta hundzuriwa u va munhu un'wana. 7Kutakuloko swikombiso leswi swi ku humelela, u ta endla leswi nga ta va emahlweni ka wena, hikuva Xikwembu xi na wena. 8Kambe u ta ndzi rhangela ku ya Giligala, kutani ndzi ta ta eka wena ku ta humesa tiholokosta ni ku humesa magandzelo ya ku khensa; u ta ndzi langutela masiku ya ntlhanu na mambirhi, ndzi ko ndzi fika eka wena, hi kona ndzi nga ta ku byela leswi u nga ta fanela ku swi endla.”
9Kuteloko Sawulo a fularhele Samiele, Xikwembu xi n'wi hundzuluxa mbilu, kutani swikombiso hinkwaswo leswi, swi n'wi humelela hi siku lero. 10Kuteloko va fika eGibeya, waswivo, ntlawa wa vaprofeta wu ta hlangana na yena kutani Moya wa Xikwembu wu n'wi khoma, a bvumbha exikarhi ka vona. 11Hinkwavo lava nga n'wi tiva khale, kuteloko va n'wi vona a ri karhi a bvumbha swin'we ni vaprofeta, vanhu lava va byelana va ku: “Ku humelele yini eka n'wana wa Kixi xana? Sawulo u le xikarhi ka vaprofeta xana?” 12Kutani un'wana wa kona a hlamula, a ku: “Tata wa vona i mani xana?” Hikwalaho rito leri ri hundzuke xivuriso, va ku: “Xana Sawulo u le xikarhi ka vaprofeta?” 13Kuteloko Sawulo u tshikile ku bvumbha, a ya exivandleni lexi tlakukeke.
14Kutani makwa tata wa Sawulo a ku eka Sawulo ni ka nandza wa yena: “A mi yile kwihi xana?” A ku: “A hi ya lava timbhongolo, kambe leswi hi nga ti vonangiki, hi yile eka Samiele.” 15Kutani makwa tata wa Sawulo a ku: “Ndzi tivise leswi Samiele u mi byeleke swona.” 16Sawulo a ku eka yena: “U hi khorwisile leswaku timbhongolo ti kumiwile.” Kambe loko yi ri emhakeni ya vuhosi, a nga n'wi byelanga leswi Samiele a swi vuleke.
Ta ku hlawuriwa ka Sawulo hi vuhlolotwana emahlweni ka tiko.
17Kutani Samiele a hlengeleta tiko emahlweni ka Yehovha eMispa; 18a ku eka vana va Israele: “Yehovha, Xikwembu xa Israele, a ku: ‘Ndzi humesile Israele Egipta, ndzi mi ponisile emavokweni ya Vaegipta ni le mavokweni ya tihosi hinkwato, leti ngi ti mi xanisa.’ 19Kambe n'wina, namuntlha, mi sandzile Xikwembu xa n'wina, xona lexi nga mi ponisa emakhombyeni hinkwawo ya n'wina, ni le ku xanisekeni ka n'wina, kutani mi te eka xona: ‘Kunene, u ta veka hosi ehenhla ka hina!’ Sweswi humelelani emahlweni ka Yehovha hi tinyimba ta n'wina ni madzanadzana ya n'wina.”
20Samiele a tshineta tinyimba hinkwato ta Israele, kutani nyimba ya Benjamini yi kombisiwa; 21kutani a tshineta nyimba ya Benjamini hi tindlu, kutani yindlu ya Matri yi kombisiwa; kutani Sawulo, n'wana Kixi a kombisiwa. Kutani va n'wi lava, kambe a nga kumiwanga. 22Va engeta va vutisisa Yehovha, va ku: “Xana a ku tanga munhu un'wana?” Yehovha a ku: “Maswivo, u tumberile etinhundzwini.” 23Kavaloko va tsutsuma, va ya n'wi teka kona, kutani a yima exikarhi ka vunyingi; kambe a tlula tiko hinkwaro, a te hlwa exikarhi ka vona. 24Samiele a ku eka tiko hinkwaro: “Langutani loyi Yehovha a n'wi hlawuleke! A ku na munhu etikweni hinkwaro la fanaka na yena.” Kutani tiko hinkwaro ri huwelela hi ku tsaka, ri ku: “A ku hanye hosi!”
25Kavaloko Samiele a byela tiko timhaka ta vuhosi, kutani a ti tsala ebukwini, a yi veka emahlweni ka Yehovha. Kutani Samiele a tlherisa tiko hinkwaro ekaya, un'wana ni un'wana endlwini ya yena.
26Na yena Sawulo a ya ekaya ka yena eGibeya, kutani vavanuna lava tshembekaka, lava Xikwembu xi va oloviseke timbilu, va famba na yena; 27kambe vanhu van'wana lavo biha a va ku: “Xana loyi a nga hi ponisa ku yini-ke?” Kutani va n'wi sandza, a va n'wi tiselanga ndzuvu. Kambe Sawulo a nga vulanga nchumu ha swona.
