1 PETRO 5

₁Ndzi khongotela vakulukumba lava nga eka n'wina, mina ndzi nga nkulu na vona, ni mbhoni ya ku vaviseka ka Kriste, ni la nga ni ku averiwa eku kwetsimeni loku nga ta humelela; ndzi ri: ₂Risani ntlhambi wa Xikwembu lowu nga na n'wina mi wu langutela, ku nga ri hi ku sindzisiwa, kambe ku va hi ku swi rhandza; ku nga ri hikwalaho ka bindzu lero biha, kambe ku va hi ku chivirika; ₃mi nga ri lava fumaka ndzhaka ya Hosi, kambe mi va swikombiso swa ntlhambi. ₄Kutani loko murisi lonkulu a ta humelela, mi ta amukela harhi leyi nga boriki ya ku kwetsima.

₅Na n'wina lavantshwa, tivekeni ehansi ka lavakulu, mi ambala ku titsongahata, mi ri karhi mi tiveka ehansi ka van'wana, hikuva “Xikwembu xi alela lava tikurisaka, kambe xi tsetselela lava titsongahataka.” ₆Hikwalaho titsongahateni ehansi ka voko ra matimba ra Xikwembu, leswaku xi ta mi tlakusa hi nkarhi lowu faneleke; ₇mi ri karhi mi rhula ku vilela hinkwako ka n'wina ehenhla ka yena, hikuva timhaka ta n'wina ti na yena.

₈Tikhomeni, mi hiteka; hikuva nala wa n'wina, a nga Diyavulosi wa mi wonga kukota nghala leyi vombaka, yi lava loyi yi nga n'wi dyaka. ₉N'wi ariseni hi ku tiya eku pfumeleni, mi ri karhi mi tiva leswaku maxangu ya n'wina, i man'we ni lama humelelaka vamakwenu lava nga emisaveni.

₁₀Kambe Xikwembu xa tintswalo hinkwato, lexi hi vitaneleke eku kwetsimeni ka xona loku nga heriki ha Yesu Kriste, kutakuloko mi twile ku vaviseka hi mikarhinyana, xi ta mi endla lava hetisekeke, xi mi tiyisa, xi mi nyika matimba, mi nga tsekatseki; ₁₁eka xona a ku ve ku kwetsima ni matimba hi masiku lama nga heriki. Amen!

₁₂Ndzi mi tsalele marito ma nga ri mangani ha Silvano loyi ndzi n'wi ringanisaka leswaku i makwerhu la tshembekeke, ndzi ri karhi ndzi mi khongotela, ni ku tiyisa vumbhoni leswaku tintswalo ta xiviri ta Xikwembu, hi toleto mi yimeke eka tona.

₁₃Nhlengeletano ya lava hlawuriweke leyi nga eBabilona, na Marka, n'wananga, va mi rungula.

₁₄Xewetanani hi ku ntswontswana ka rirhandzu. Ku rhula a ku ve na n'wina hinkwenu, lava nga eka Yesu Kriste! Amen!