Ku xeweta.
1Petro, muapostola wa Yesu Kriste;
Eka lava hlawuriweke, lava hangalakeke, va nga lava luveleke ematikweni ya Ponto, na Galatiya, na Kapadokiya, na Asiya, na Bitiniya, 2va nga lava hlawuriweke hi ku tiviwa emahlweni hi Xikwembu Tatana, va ri karhi va kwetsimisiwa hi Moya, leswaku va ta yingisa Yesu Kriste, ni ku xuviwa hi ngati ya yena:
Tintswalo ni ku rhula a swi mi talele!
Ku khensa ku hlayiseka.
3A ku khensiwe Xikwembu Tata wa Hosi ya hina Yesu Kriste, la nga hi tswala ra vumbirhi hi tintswalo ta yena letikulukumba, leswaku hi va ni ku tshemba loku hanyaka hi ku pfuka ka Yesu Kriste exikarhi ka vafi, 4hi ta nyikiwa ndzhaka leyi nga boriki, leyi nga nyamisiwiki, yi nga vuniki, leyi hlayiseriweke hina ematilweni, 5hina hi laveleriwaka hi matimba ya Xikwembu, hi ku pfumela, leswaku hi ta nyikiwa ku hlayiseka loku lunghiseriweke ku humelela enkarhini wa makumu.
6Hi lexi mi xi tsakelaka, hambi sweswi ma ha ri enhlomulweni, hikwalaho ka miringo ya ku tala, hi nkarhi wu nga ri wungani, hilaha swi mi fanelaka, 7leswaku ku ringiwa ka ku pfumela ka n'wina loku hundzisaka nsuku lowu lovaka, (kasi na wona wu ringetiwa hi ndzilo) ku ta mi hundzukela ku dzunisiwa, ni xichavo, ni ku kwetsima, siku ku nga ta humelela Yesu Kriste; 8loyi mi n'wi rhandzaka hambi mi nga n'wi vonanga, loyi mi tsakaka ha yena hi ku tsaka loku nga vulekiki, loku kwetsimaka, hambi mi nga si n'wi vona ku ta fika sweswi, kambe mi endla hi ku pfumela; 9mi ri karhi mi amukela hakelo ya ku pfumela ka n'wina, ku nga ku hlayiseka ka mimoya ya n'wina.
10Ku hlayiseka loku ku lavisisiwile ni ku kambisisiwa hi vaprofeta lava profeteke tintswalo leti mi humeleleke; 11va ri karhi va kamba xana nkarhi hi wihi, ni lowo yini lowu kombiweke hi Moya wa Kriste, lowu ngi wu ri ka vona, wu ri karhi wu endle vumbhoni bya nhlomulo wa Kriste, ni ku kwetsima loku nga ta wu landzela. 12Kutani va kombisiwile leswaku a va titirhelanga, kambe va tirhele hina, etimhakeni leti mi ti byeriweke sweswi, hi lava mi dyondziseke hi Moya lowo Kwetsima lowu rhumiweke, wu huma etilweni, ti nga timhaka leti tintsumi ti navelaka ngopfu ku ti hlometela.
Vapfumeri va khongoteriwa ku tihlawula.
13Hikwalaho, na n'wina, tiboheni swisuti swa ku twisisa ka n'wina mi hanya hi ku tikhoma, mi tshemba hi mukhuva lowu hetisekeke tintswalo leti mi nga ta nyikiwa tona siku Yesu Kriste a nga ta humelela; 14mi va vana va ku yingisela, lava nga yiki hi ku navela ka n'wina ka khale, mi nga si tiva nchumu. 15Kambe hilaha la mi vitaneke a hlawulekeke, na n'wina, mi hlawuleka emikhuveni ya n'wina hinkwayo, 16hikuva ku tsariwile leswaku: “Hlawulekani, hikuva ndzi hlawulekile.”
17Kutani loko mi khongela, mi vula Tatana loyi a nga yiki hi nghohe, kambe a avanyisa un'wana ni un'wana hi mitirho ya yena, hanyani hi ku chava enkarhini wa ku xwa ka n'wina la emisaveni. 18Ma swi tiva leswaku mi kutsuriwile emikhuveni ya n'wina ya swahava, leyi mi yi dyondzisiweke hi vatata wa n'wina, 19ku nga ri hi leswi bolaka, hi silivhere, kumbe nsuku, kambe ku va hi ngati leyi pfumariwaka ya xinyimpfana, lexi nga riki na xivati ni xisandzu, a nga Kriste; 20loyi a nga tiviwa hi Xikwembu misava yi nga si tumbuluka, kutani a kombisiwa hi mikarhi ya ku hela hikwalaho ka n'wina, 21lava pfumeleke ha yena eka Xikwembu, lexi n'wi pfuxeke eku feni, xi va xi n'wi nyika ku kwetsima, leswaku ku pfumela ka n'wina ni ku tshemba ka n'wina ku va ka Xikwembu.
22Kutani leswi mi basiseke mimoya ya n'wina hi ku yingisa ntiyiso hi Moya, leswaku mi va ni rirhandzu leri nga kanganyisiki, rhandzanani hi ku tiya hi timbilu leti tengeke; 23mi va lava tswariweke ra vumbirhi, ku nga ri hi mbewu leyi bolaka, kambe ku ri hi leyi nga boriki, hi rito leri hanyaka ra Xikwembu, leri tshamaka hi masiku. 24Hikuva “nyama hinkwayo yi kotisa byanyi, kutani ku kwetsima hinkwako ka yona kukotisa xiluva xa byanyi; byanyi byi omile, kutani xiluva xa byona xi wile; 25kambe rito ra Hosi ri tshama hilaha ku nga heriki”; kutani hi rona rito leri mi ri byeriweke eEvhangelini.
