Ta ku aka ka yindlu ya Solomoni.
1Solomoni a aka ni yindlu ya yena; a heta yindlu ya yena hinkwayo hi malembe ya khume na manharhu. 2A sungula ku aka yindlu ya Lebanoni leyi ngi yi ri exihlahleni, ku leha ka yona a swi ri swisungunhu swa dzana, ku anama ka yona, swisungunhu swa ntlhanu wa makume, ni ku tlakuka ka yona, swisungunhu swa makume manharhu. Yi akiwile ehenhla ka tinxaxa ta mune ta timhandze ta kedari, mapulangi ya kedari a ma ri ehenhla ka timhandze. 3A yi fuleriwile hi murhi wa kedari, ku ri ehenhla ka makamara ya matlhelo lama akiweke ehenhla ka timhandze; tona a ti ri mune wa makume na ntlhanu, khume na ntlhanu hi rixaxa rin'wana ni rin'wana. 4A ku ri ni tinxaxa tinharhu ta mafasitere lama langutaneke. 5Tinyangwa hinkwato ni marimba ya tona a ti ri ni matlhelo ya mune lama ringanaka etinxaxeni letinharhu ta makamara, tinyangwa a ti langutene.
6A endla ni rikupakupa ra timhandze; ku leha ka rona a swi ri swisungunhu swa ntlhanu wa makume, ku anama ka rona, swisungunhu swa makume manharhu, rikupakupa rin'wana a ri ri emahlweni ka lero sungula; rona a ri ri ni timhandze ni swikhandziyo emahlweni ka rona. 7A endla ni rikupakupa ra xiluvelo laha a avanyisaka timhaka kona, ri ri rikupakupa ra ku avanyisa; ri akiwe hi kedari ku suka ehansi ku fika ehenhla. 8Yindlu ya yena, laha a tshamaka kona, a yi akisiwe xi sweswo exivaveni xin'wana, endzeni ka rikupakupa. A akela n'wana Faro, loyi a nga n'wi teka ku va nsati wa yena, yindlu leyi fanaka ni rikupakupa leri.
9Tindlu leti hinkwato ti akiwile hi maribye layo saseka lama vatliweke hi mpimo, ma sahiwile etlhelweni ni le ndzeni ni le handle ku suka emasungulweni ku fika exirhendzevutaneni xa le henhla; ni ku suka ehandle ku fika exivaveni lexikulu. 10Wona masungulo ma akiwile hi maribye layo saseka lamakulu, ma ri maribye ya swisungunhu swa khume, ni maribye ya swisungunhu swa ntlhanu na swinharhu. 11Ni le henhla ka wona a ku ri ni maribye layo saseka lama vatliweke hi mipimo ni murhi wa kedari. 12Xivava lexikulu a xi akiwile hi tinxaxa tinharhu ta maribye lama vatliweke ni rixaxa rin'we ra mapulangi ya kedari; a swi ri tano exivaveni xa le xikarhi ka Yindlu ya Yehovha, ni le rikupakupeni ra yindlu.
Ta timhandze timbirhi letikulu ta koporo; ni lwandle ra koporo ni swigotso swin'wana swa tempele.
13Kutani hosi Solomoni a rhuma ku ya vitana Hiramu, a ta hi le Tiri; 14a a ri n'wana wa nsati wa noni wa rixaka ra Neftali, kambe tata wa yena a a ri munhu wa Tiri, mufuri wa koporo; Hiramu a tele vutlhari, ni ku twisisa, ni vutivi bya ku tirha tinxaka hinkwato ta mitirho ya koporo. A fika eka hosi Solomoni, a tirha mitirho ya yena hinkwayo.
15A endla timhandze letimbirhi letikulu ta koporo. Ku leha ka mhandze yin'wana a swi ri swisungunhu swa khume na ntlhanu na swinharhu; ni ngoti ya swisungunhu swa khume na swimbirhi yi ringana ku rhendzela yin'wana. 16Kutani a chulula swirhendzevutana swimbirhi swa koporo ku swi veka ehenhla ka timhandze. Ku tlakuka ka xin'wana a swi ri swisungunhu swa ntlhanu, ni ku tlakuka ka xin'wana a swi ri swisungunhu swa ntlhanu. 17A ku ri ni swikhaviso leswi lukiweke hi ntirho lowu fanaka ni tiketana eka swirhendzevutana leswi ngi swi ri ehenhla ka timhandze, a ti ri ta ntlhanu na timbirhi eka xin'wana, ni ta ntlhanu na timbirhi eka xin'wana. 18A endla ni tinxaxa timbirhi ta magirenada ti rhendzela swikhaviso, swi funengeta swirhendzevutana leswi nga ehenhla ka timhandze; a endlela sweswo xirhendzevutana xin'wana. 19Swirhendzevutana leswi ngi swi ri ehenhla ka timhandze, erikupakupeni swi endliwe swi fana ni makhon'wa, a swi ri ni swisungunhu swa mune. 20Swirhendzevutana leswi ngi swi ri ehenhla ka timhandze letimbirhi a swi rhendzeriwa hi magirenada ya madzana mambirhi ehenhla ka swikhaviso; magirenada ya madzana mambirhi a ma rhendzela hi tinxaxa xirhendzevutana xin'wana ni xin'wana. 21Kutani a yimisa timhandze letimbirhi enyangweni ya Yindlu. Kuteloko a yimisile mhandze ya xinene a yi thya vito ra Yakini (u ta tiyisa); ni loko a yimisile mhandze ya ximatsi a yi thya vito ra Bowazi (matimba ma na Yena). 22Ehenhla ka timhandze, emakun'wini ka tona, a ku ri ni ntirho lowu fanisaka makhon'wa. Va heta sweswo ntirho wa timhandze.
23Kutani a chulula lwandle ra koporo, xi ri xirhendzevutana ematlhelweni hinkwawo; ku suka etlhelo rin'wana ku fika etlhelo rin'wana a swi ri swisungunhu swa khume, ni ku enta ka rona swisungunhu swa ntlhanu ngoti ya swisungunhu swa makume manharhu a yi ringana ku ri rhendzela hinkwaro. 24Ri rhendzeriwa hi marhakarhaka ehansi ka nomu wa rona, ematlhelweni hinkwawo, khume hi xisungunhu, ma rhendzela lwandle hinkwako, marhakarhaka ma lulamisiwa hi tinxaxa timbirhi leti chuluriweke swin'we na rona. 25Ri vekiwile ehenhla ka tihomu ta khume na timbirhi; tihomu tinharhu a ti languta en'walungwini; tinharhu ti languta evupeladyambu, tinharhu ti languta edzongeni tinharhu ti languta evuxeni; lwandle a ri ri ehenhla ka tona; micila hinkwayo yi ri exikarhi. 26Ku tsindziyela ka rona a xi ri xandla xin'we; nomu wa rona a wu fana ni nomu wa ndzheko lowu fanaka ni khon'wa; ri eneta tibati ta magidi mambirhi.
27Kutani a endla khume ra switikirheto swa koporo; ku leha ka xin'wana ni xin'wana a swi ri swisungunhu swa mune, ni ku anama, swisungunhu swa mune, ni ku tlakuka, swisungunhu swinharhu. 28Maendlelo ya switikirheto hi lawa: a swi ri ni matlhelo lama lulameke, lama khavisiweke emakun'weni ya wona.
29Ematlhelweni a ku ri ni tinghala, ni tihomu, ni tikerubu ehenhla ka swikhaviso, a ku ri ni xirhendzevutana ehenhla; ni le hansi ka tinghala ni tihomu, a ku ri ni swiluva leswi xaxametiweke, leswi lengalengaka. 30Xikhato xin'wana ni xin'wana a xi ri ni mune wa masondzo ya koporo, ni tiakisele (eixo) ta koporo; etinhleni ta mune ta xona, a xi ri ni timhondzo. Timhondzo ti chuluriwile ehansi ka nkamba etlhelweni ra swiluva. 31Nomu wa xona endzeni ka xirhendzevutana, ehenhla ka xona, a wu ri wa xisungunhu xin'we, ni nomu wa xirhendzevutana a wu ri wa xisungunhu ni hafu; enon'wini wa xona a ku khavisiwile; matlhelo ya swikhato a ma ri ni mune wa tinhla, swi nga ri swirhendzevutana. 32Masondzo ya mune a ma ri ehansi ka matlhelo, ni mavoko ya masondzo a ma tiyisiwa exitikirhetweni; ku tlakuka ka sondzo rin'wana ni rin'wana a xi ri xisungunhu ni hafu; 33wona masondzo a ma fana ni masondzo ya golonyi; tiakisele (eixo) ta wona, ni mabanti, ni swipoko, ni matshuri ya wona, hinkwaswo a swi ri swa koporo. 34A ku ri ni timhondzo ta mune etinhleni ta mune ta xikhato xin'wana ni xin'wana; timhondzo ta xikhato a ti huma eka xona. 35Ehenhla ka xikhato a ku ri ni xirhendzevutana xa hafu ya xisungunhu hi ku tlakuka; ni le henhla ka xikhato, tiakisele (eixo) ta xona ni matlhelo ya xona a swi huma eka xona. 36Evutshan'weni bya mavoko ya xona ni le matlhelweni, a endla tikerubu, ni tinghala, ni micindzu hi mipimo ya swona, ni swiluva leswi xaxametiwaka ematlhekweni hinkwawo. 37A endlisa sweswo switikirheto swa khume: hinkwaswo swi chuluriwile hi mpimo wun'we ni xifaniso xin'we.
38Kutani a endla mikamba ya khume ya koporo; nkamba wun'wana ni wun'wana a wu enela tibati ta mune wa makume; nkamba wun'wana ni wun'wana a wu ri wa mune wa swisungunhu; nkamba wun'wana ni wun'wana a wu ri exitikirhetweni, ku eneta swikhato swa khume. 39Kutani a veka swikhato swa ntlhanu etlhelweni ra xinene ra Yindlu ni swikhato swa ntlhanu etlhelweni ra ximatsi ra Yindlu. Rona lwandle a ri veka etlhelweni ra xinene ra Yindlu, evuxeni, ku langutana ni le dzongeni.
40Hiramu a endla mikamba ni tifoxolo, ni mikambana; Hiramu a heta ntirho hinkwawo lowu a wu endleleke hosi Solomoni, wu ri wa yindlu ya Yehovha: 41Ti ri timhandze timbirhi, ni mabundzu mambirhi ya swirhendzevutana leswi nga etinhleni ta timhandze; ni mitirho mimbirhi leyi lukiweke leyi funengetaka mabundzu mambirhi ya swirhendzevutana leswi nga etinhleni ta timhandze, 42ni ya mune wa madzana magirenada ya mitirho leyi lukiweke, tinxaxa timbirhi ta magirenada eka wun'wana ni wun'wana, swi ri swo funengeta mabundzu mambirhi ya swirhendzevutana leswi nga etinhleni ta timhandze; 43ni swikhato swa khume, ni mikamba ya khume leyi nga eswitikirhetweni; 44ni lwandle leri nga rin'we, ni tihomu ehansi ka lwandle; 45ni timbita, ni tifoxolo, ni mikambana, ni swingolongondzwana hinkwaswo leswi Hiramu a swi endleleke hosi Solomoni hi koporo leyi vangamisiweke, swi ri swa Yindlu ya Yehovha.
46Hosi yi swi chulula etlhelweni ra Yordani, evumbeni bya misava exikarhi ka Sukoti na Saretani. 47Solomoni a va tshika va endla swingolongondzwana hinkwaswo leswi, ku nga lavisiwanga ku tika ka koporo, hikuva a swi ri leswo tala ngopfu.
48Solomoni a endla swingolongondzwana hinkwaswo leswi nga eNdlwini ya Yehovha, yi ri alitari ya nsuku, ni tafula ra nsuku, leri swinkwa swa xikombiso swi vekiwaka ehenhla ka rona; 49ni tikandelari ta nsuku lowo saseka; leta ntlhanu a ti ri exineneni, leta ntlhanu tin'wana a ti ri eximatsini, emahlweni ka vukwetsimelo bya le xikarhi; ni swiluva, ni mavoningo, ni xigere, swi ri swa nsuku; 50ni mikwana, ni mikambana ni mindzheko, ni swimbitana swa mirhi ya risuna, swa nsuku lowo saseka; ni swikhuleketo swa nsuku swa timbanti ta Yindlu, endzeni, exikwetsimisisweni, ni ya timbanti ta Yindlu leyi nga Tempele.
51Ntirho hinkwawo lowu hosi Solomoni yi wu endleleke Yindlu ya Yehovha wu hela hinkwawo. Kutani Solomoni a tisa silivhere ni nsuku ni swingolongondzwana leswi hlawuriweke hi tata wa yena, a swi veka evuhlayiselweni bya Yindlu ya Yehovha.
