1 TIHOSI 4

₁Hosi Solomoni a yi fuma Vaisraele hinkwavo.

₂Tindhuna ta yena a ti ri leti: Azariya, n'wana Sadoki, muprista; Elihorefe na Ahiya, vana va Xixa, a va ri vatsari; ₃Yoxafati n'wana Ahiludi a a ri mutsari wa timhaka; na Benaya n'wana Yehoyada, a a ri ndhuna ya nyimpi. ₄Sadoki na Abiyatara a va ri vaprista; ₅na Azariya n'wana Natani, ndhuna ya valanguteri; na Zabudu, n'wana Natani, muprista, ndhuna leyikulu ni nakulobye wa hosi; ₆Ahixara, a a ri muhlayisi wa yindlu ya hosi; na Adonirama, n'wana Abida, ndhuna ya xibalo.

₇Solomoni a a ri ni tindhuna ta khume na timbirhi leti vekiweke henhla ka Vaisraele hinkwavo; a va lavela hosi ni yindlu ya yona swakudya; yin'wana ni yin'wana swa n'hweti yin'we hi lembe. ₈Mavito ya tona hi lawa: N'wana Huru, entshaveni ya Efrayimi. ₉N'wana Dekera, a vekiwile ehenhla ka Makasa na Xaalabimi, na Beta-Xemexe, na Eloni-Beta-Hanana. ₁₀N'wana Hesede eka Aruboto, na Soko ni tiko hinkwaro ra Hefere. ₁₁N'wana Aminadaba eka mitsunga hinkwayo ya Dori. (Tafata, n'wana Solomoni a a ri nsati wa yena.) ₁₂Baana, n'wana Ahiludi a a ri ehenhla ka Taanaka, na Megido, ni tiko ra Beta-Xeyani hinkwaro leri nga ekusuhi na Saretani, ehansi ka Yizriele, ku suka eBeta-Xeyani, ku fika eAvele-Mehola, ku fika emahlweni ka Yokimeyama. ₁₃N'wana Gebere eka Ramoto wa Giliyadi: a a ri ni miti ya Yayiro, n'wana Manase, leyi nga eGiliyadi, ni tiko ra Arigobi, lowu nga eBaxani: yi ri miti leyikulu ya 60, yi ri ni rirhangu ni timhandze ta koporo. ₁₄Ahinadaba, n'wana Ido a a ri ehenhla ka Mahanayimi. ₁₅Ahimaasi a a ri etikweni ra Neftali (na yena a a tekile n'wana Solomoni, Basemati, a va nsati wa yena). ₁₆Baana, n'wana Huxayi, a a ri etikweni ra Asere na Beyaloto. ₁₇Yoxafati, n'wana Paruwaka, etikweni ra Isakara. ₁₈Ximeyi, n'wana Ela, etikweni ra Benjamini. ₁₉Gebere, n'wana Uri, etikweni ra Giliyadi, etikweni ra Sihoni, hosi ya Vaamori, ni ra Ogo, hosi ya Baxani. A ku ri ni ndhuna yin'we etikweni leri.

₂₀Va Yuda ni Vaisraele a va tele ngopfu, byi ri vunyingi lebyi fanaka ni sava leri nga eribuwini ra lwandle. A va dya, va nwa, va tsaka. ₂₁Solomoni a a fuma kambe ematikweni hinkwawo, ku suka enambyeni wa Yufrata ku fika etikweni ra Vafilista, ni ku fika endzilakaneni wa Egipta; a va luva eka Solomoni, va n'wi tirhela hi masiku hinkwawo ya ku hanya ka yena.

₂₂Swakudya swa Solomoni swa siku rin'wana ni rin'wana a swi ri swa tikore ta makume manharhu ya mapa layo saseka, ni tikore ta mapa ta ntlhanu wa makume ni khume rin'we, ₂₃ni tihomu leti noneke ta khume, ni tihomu ta mirhanga ta makume mambirhi ni tinyimpfu ta dzana, leswi a swi ri ehandle ka tinhlangu, ni timhunti, ni timbavala, ni tihuku leti nonisiweke. ₂₄Hikuva a a fuma etikweni hinkwaro leri nge halenu ka nambu, ku suka eTifisa ku fika eGaza, etihosini leti nge halenu ka nambu, kutani a ku ri ni ku rhula ematlhelweni hinkwawo. ₂₅Ku suka eDani ku fika eBerexeba va Yuda ni va Israele, a va akile va nga chavi nchumu, un'wana ni un'wana ehansi ka vhinya ya yena ni le hansi ka nkuwa wa yena, emasikwini hinkwawo ya Solomoni.

₂₆Solomoni a a ri ni switsengele swa tihanci swa 40 000, swi ri swa tihanci ta tigolonyi ta yena; a a ri ni vakhandziyi va tihanci va 12 000.

₂₇Tindhuna leti a ti phamela hosi Solomoni, ni hinkwavo lava dyaka etafuleni ra yena, yin'wana ni yin'wana en'hwetini ya yena, a ti endla leswaku va nga pfumari nchumu. ₂₈A ti tisa barley ni byanyi lebyi omeke, yin'wana ni yin'wana hi nawu wa yona, swi ri swa tihanci leti paniwaka, ni tihanci leti khandziyiwaka, lomu ingi hosi a yi ri kona.

₂₉Xikwembu xi nyika Solomoni vutlhari ni ku twisisa ngopfungopfu, ni mbilu leyi anameke ku fana ni sava ra le ribuwini ra lwandle. ₃₀Vutlhari bya Solomoni a byi tlula vutlhari bya vanhu hinkwavo va le vuxeni, ni vutlhari hinkwabyo bya Vaegipta. ₃₁A a tlharihile ku tlurisa mani na mani; a tlula Etani, wa ka Ezra, na Hemani, na Kalikolo, na Darda, vana va Maholi. Vito ra yena a ri tiviwa ematikweni hinkwawo ya le matlhelweni. ₃₂A thya swivuriso swa 3 000, ni tinsimu ta yena a ti ri ta 1 005. ₃₃A vula timhaka ta mirhi, ku suka eka wa kedari lowu nga ehenhla ka Lebanoni ku fika eka wa hisopa lowu humaka ekhumbini; a vula ni timhaka ta swifuwo, ni ta tinyanyana, ni ta swikokovi, ni ta tinhlampfi. ₃₄Vanhu a va ta hi le matikweni hinkwawo ku ta yingisa vutlhari bya Solomoni, va rhumiwa hi tihosi hinkwato ta misava leti yingiseke ta vutlhari bya yena.