Timhaka ta ku tekana, ni ta ku tshika nsati, ni ta vavasati va tinoni.
1Loko ti ri timhaka leti mi ndzi tsaleleke tona, ndzi nga ku: Swi lulamile loko munhu a nga khumbi wansati. 2Kambe, hikwalaho ka vuoswi, wanuna un'wana ni un'wana a a ve ni nsati wa yena, ni wansati un'wana ni un'wana a a ve ni nuna wa yena. 3Wanuna a a nyike nsati leswi faneleke, ni wansati a endlise sweswo eka nuna wa yena. 4Miri wa nsati a wu le ku fumeni ka yena, kambe wu le ku fumeni ka nuna; ni miri wanuna a wu le ku fumeni ka yena, kambe wu le ku fumeni ka nsati wa yena. 5Mi nga tshuki mi tsonana, loko ku nga ri hi ku pfumelelana, hi nkarhi wun'wana, loko mi rhandza ku titsona swakudya ni ku khongela, kutani ndzhaku, mi tlhela mi hlangana, Satana a nga ti tshuka a mi ringa hi ku navela ka n'wina loku mi hlulaka. 6Ndzi vula sweswo hi ku mi twela vusiwana, ku nga ri hi ku lerisa; 7hikuva ndzi nga rhandza leswaku vanhu hinkwavo va fana na mina; kambe munhu un'wana ni un'wana u ni ku nyikiwa ka yena loku ku n'wi lulameleke, loku ku humaka eka Xikwembu; un'wana hi mukhuva lowo karhi, un'wana hi mukhuva wun'wana.
8Loko ti ri tinghwendza, ni vavasati va tinoni, ndzi ri eka vona: Swi nga va swinene eka vona ku tshama kukotisa mina. 9Kambe loko va hluleka ku tiya, a va teke ni ku tekiwa hikuva loko ku ri ku teka hambi ku tekiwa ni ku tshwa, i swinene ku teka.
10Loko va ri lava tekaneke, ndza va lerisa, ndzi nga ri mina, kambe i Hosi, ndzi ri: Wansati a nga tshuki a tshika nuna wa yena. 11Ni loko a n'wi tshikile, a a titshamele a nga tekiwi, kumbe a vuyelana ni nuna wa yena; na yena wanuna, a nga tshuki a tshika nsati wa yena.
12Kambe loko va ri van'wana, ndza va byela ndzi ri mina, yi nga ri Hosi, ndzi ri: Loko un'wana makwerhu a ri ni nsati la nga pfumeriki, a nga tshuki a n'wi tshika, loko wansati a rhandza ku tshama na yena; 13kambe wansati la nga ni nuna la nga pfumeriki, loko a pfumela ku tshama na yena, a nga tshuki a n'wi tshika. 14Hikuva nuna la nga pfumeriki u kwetsimisiwa hi nsati, ni nsati la nga pfumeriki u kwetsimisiwa hi nuna; loko swi nga ri tano vana va n'wina va ta va vana va thyaka, kasi sweswi, va kwetsimile. 15Kambe la nga pfumeriki, loko a tshika la pfumeleke, u fanele ku n'wi tshika; loko swi ri tano makwerhu wa wanuna, kumbe wa wansati, a nga ka a nga bohiwi. Kambe Xikwembu xi hi vitanele ku rhuleni. 16Hikuva wena wansati, u swi tiva ha yini leswaku u ta ponisa nuna wa wena xana? Na wena, wanuna, u swi tiva ha yini leswaku u ta ponisa nsati wa wena xana? 17Ntsena munhu un'wana ni un'wana a a hanye hilaha Hosi yi n'wi aveleke hakona, ni hilaha Xikwembu xi n'wi vitaneke hakona. Ndzi lerisa tikereke hinkwato xisweswo.
18Munhu loko a vitiwile a yimbile, a nga tshuki a tlhelela evukhuneni. Munhu loko a vitiwile a nga si yimba, a nga tshuki a yimba. 19Ku yimba a hi nchumu, ni vukhuna a hi nchumu, kambe mhaka i ku hlayisa milawu ya Xikwembu. 20Munhu un'wana ni un'wana a a tshame eku averiweni loku ngi a a ri na kona hi nkarhi a vitiwaka. 21Xana u vitiwile u ri la fuyiweke? U nga tshuki u vilela hakona; kambe loko u nga tshunxiwa, u tihlawulela swona. 22Hikuva la vitiweke hi Hosi a ri khumbi, i muntshunxiwa wa Hosi; na yena la vitiweke a nga ri khumbi, u fuyiwile hi Kriste. 23Mi xaviwile hi nxavo lowo nonon'hwa; mi nga tshuki mi hundzuka makhumbi ya vanhu. 24Vamakwerhu, munhu un'wana ni un'wana a a tshame emahlweni ka Xikwembu eku averiweni loku ngi a ri na kona hi nkarhi a vitiwaka.
25Loko yi ri mhaka ya vanhwana, kona, a ndzi na nawu wa Hosi, ntsena ndzi vula mhaka hilaha ndzi nga munhu la tsetseleriweke hi Hosi leswaku ndzi tshembiwa.
26Kutani sweswi loko ndzi ringanisa, ndzi ri: Swi nga va swinene eka munhu ku titshamela sweswo, hikwalaho ka makhombo ya nguva leyi. 27Loko u tibohile eka wansati, u nga tshuki u lava ku tshunxeka. Loko u nga tibohanga eka wansati, u nga tshuki u lava nsati. 28Kambe loko u teka, a ku dyohi; ni wanhwana loko a tekiwa, a nga dyohi; kambe lavo tano va ta va ni ku xaniseka enyameni, kutani mina ndzi mi twela vusiwana.
29Leswi ndzi swi vulaka, vamakwerhu, hileswaku sweswi, kutani, nkarhi wu komile; lava nga ni vasati, va va kukota loko ngi va nga ri na vona, 30lava rilaka va va kukota loko ngi va nga rili; lava tsakaka va va kukota loko ngi va nga tsakanga; ni lava xavaka va va kukota loko ngi va nga fuwanga nchumu; 31ni lava tipfunaka hi swa misava leyi, va va kukota loko va nga pfuniwi ha swona, hikuva maendlelo ya misava leyi, ma hela. 32Ndzi rhandza leswaku mi nga vi na ku vilela. La nga tekangiki u xiya leswi nga swa Hosi hilaha a nga yi tsakisaka hakona; 33kambe la tekeke u xiya swa misava leyi, hilaha a nga tsakisaka nsati wa yena hakona. 34Nsati la tekiweke a nga fani ni wanhwana: La nga tekiwangiki u xiya swa Hosi, u ta kwetsima emirini ni le moyeni; kambe la tekiweke u xiya swa misava leyi, ni hilaha a nga tsakisaka nuna wa yena hakona.
35Ndzi vurisa sweswo hi ku ringanisa leswinene eka n'wina, ku nga ri ku mi rhiya hi ntlhamu; kambe hileswaku mi endla hi ku xiya leswi lulameke, ni leswi mi bohelaka eka Hosi, mi nga hambukisiwi ha nchumu. 36Kambe loko munhu a anakanya leswaku yi nga va mhaka ya tingana loko wanhwana wa yena a hundza swiluva swa vuntshwa bya yena a nga si tekiwa, kutani swi fanele leswaku a tekiwa; a nga endla hilaha a rhandzaka hakona; a nga dyohi, wanhwana u fanele ku tekiwa. 37Kambe la tiyiselaka embilwini ya yena a nga byisiwi ha nchumu, kambe a tiendlela hi ku tirhandzela ka yena; loyi a kaneleke embilwini ya yena leswaku wanhwana wa yena a ta tshama eka yena, u endla swinene. 38Kutani sweswi, la tekisaka n'wana wa yena u endla swinene, kambe la nga n'wi tekisiki u endla swinene ku tlurisisa.
39Wansati u bohiwile eka nuna wa yena hi nawu, emikarhini hinkwayo ya ku hanya ka nuna wa yena; kambe loko nuna wa yena a file, u tshunxekile; a nga tekana ni loyi a n'wi rhandzaka, kambe a ku ve eHosini. 40Hambiswiritano, hi nomu wa mina, ndzi ri: Loko a titshamela ntsena, a nga tsaka ku tlurisa. Kambe ndzi ringanisa leswaku na mina ndzi ni Moya wa Xikwembu.
