1 VAKORINTO 13

₁Hambiloko ndzi nga vulavula tindzimi ta vanhu ni ta tintsumi, kambe ndzi nga ri na rirhandzu; ndzi kotisa nanga leyi yimbaka, hambi swi ri swiphambati leswi pfumaka. ₂Kutani hambi ndzi nga nyikiwa vuprofeta, ni loko ndzi tiva swihundla hinkwaswo ni vutlhari hinkwabyo; hambi ndzi ri ni ku pfumela hinkwako, ndzi ko ndzi tlakusa tintshava; kambe ndzi nga ri na rirhandzu, a ndzi nchumu. ₃Hambi ndzi avela rifuwo ra mina hinkwaro, ndzi phamela swisiwana, kumbe ndzi nyiketa miri wa mina leswaku wu hisiwa, kambe ndzi nga ri na rirhandzu, leswo a swi ndzi pfuni nchumu.

₄Rirhandzu ri ni ku yingisela, ri tele vunene, rirhandzu a ri na mona; rirhandzu a ri na ku tinyungubyisa; a ri tikukumuxi, ₅a ri khomisi tingana; a ri tilaveleri swa rona ntsena; a ri karihi; a ri ehleketi swo biha; ₆a ri tsakeri ku homboloka, kambe ri tsakelana ni ntiyiso; ₇ri yingisela hinkwaswo, ri pfumela hinkwaswo, ri tshemba hinkwaswo, ri rhwala hinkwaswo.

₈Rirhandzu ri nga ka ri nga heri, ni siku ni rin'we. Kasi loko byi ri vuprofeta byi ta hela, na tona tindzimi ti ta tshika ku va kona, ni ku tiva ku ta hela. ₉Hikuva ha tiva hitlhelo rin'we, kambe ha profeta hitlhelo rin'we ntsena; ₁₀kambe siku ku fikaka ku hetiseka, hilaha leswi nga swa tlhelo rin'we swi nga ta herisiwa. ₁₁Loko ndza ha ri xihlangi, a ndzi vulavula kukota xihlangi, a ndzi anakanya kukota xihlangi, a ndzi ringanyeta kukota xihlangi; kambe siku ndzi hundzukeke wanuna, ndzi tshikile swa vuhlangi. ₁₂Sweswi, hi vona hi xivonivoni, hi ritsandze; enkarhini wolowo hi ta vona hi mahlo lama langutanaka; sweswi ndzi tiva tlhelo rin'wana ntsena; enkarhini wolowo ndzi ta tiva kukota loko ndzi tiviwile na mina.

₁₃Sweswi ku tiyile swinharhu leswi: ku pfumela, ni ku langutela, ni rirhandzu; kambe lexikulu eka swona, i rirhandzu.