Ta valanguteri va tinyangwa ta tempele.
1Hi yona mitlawa ya valanguteri va tinyangwa. Va Kora: Mexelemiya, n'wana Kore, wa vana va Asafa. 2Vana va Mexelemiya: Zakariya, mativula, Yediele, wa vumbirhi, Zebadiya wa vunharhu, Yatiniele, wa vumune, 3Elamu, wa vuntlhanu, Yohanani, wa ntlhanu na un'we, Eli-Howenayi, wa ntlhanu na vambirhi. 4Vana va Obede-Edomu: Xemaya, mativula, Yozabadi, wu vumbirhi, Yowa, wa vunharhu, Sakara, wa vumune, Netanele, wa vuntlhanu, 5Amiele, wa ntlhanu na un'we, Isakara wa ntlhanu na vambirhi, Pewuletayi, wa ntlhanu na vanharhu; hikuva Xikwembu a xi n'wi katekisile. 6Xemaya, n'wana wa yena, a velekeriwa vana lava nga fuma yindlu ya tata wa vona, hikuva a va ri vanhu va matimba. 7Vana va Xemaya: Otini, na Rafaele, na Obede, na Elizabada ni vamakwavo, vanhu va matimba Elihu na Semakiya. 8Hinkwavo lava a va ri vana va Obede-Edomu, vona ni vana va vona, ni vamakwavo, a va ri vanhu lava tiyeke va matimba lamakulu ku tirha ntirho: va ri vatukulu va 62 va Obede-Edomu. 9Mexelemiya a a ri ni vana va xinuna ni vamakwavo, vanhu va matimba va 18. 10Hosa, wa vana va Merari a a ri ni n'wana wa wanuna; vito ra yena a a ri Ximri, hosana, hikuva hambi a nga ri mativula, tata wa yena a n'wi vekile hosana; 11Hilkiya wa vumbirhi, Tebaliya wa vunharhu, Zakariya wa vumune; vana hinkwavo va Hosa, ni vamakwavo, a va ri 13.
12Ntirho wa ku langutela yindlu ya Yehovha wu vekiwile eka mitlawa leyi ya valanguteri ni le ka tihosana ta tindlu ta vona ni le ka vamakwavo. 13Va hlawuleriwa nyangwa yin'wana ni yin'wana hi vuhlolotwana, lavantshwa kukotisa va khale, hi tindlu ta vatata wa vona.
14Xelemiya a hlawuleriwa hi vuhlolotwana hitlhelo ra vuxa. Zakariya, n'wana wa yena, la ngi a ri munhu wa ku twisisa, a hlawuleriwa tlhelo ra n'walungu. 15Obede-Edomu a hlawuleriwa tlhelo ra dzonga, ni vana ti va yena yindlu ya xuma. 16Xupimi na Hosa va hlawuleriwa tlhelo ra vupeladyambu ni nyangwa ya Xalekete, endleleni leyi tlhandlukaka: mulanguteri un'wana a langutene ni un'wana. 17Evuxeni, Valevhi a va ri ntlhanu na un'we; en'walungwini, a va ri mune, hi siku rin'wana ni rin'wana; edzongeni, mune, hi siku rin'wana ni rin'wana; ni le ndlwini ya xuma, a va ri vambirhi; 18exivaveni xa le ndzhaku, evupeladyambu, a va ri mune endleleni, na vambirhi exivaveni xa le ndzhaku. 19Hi yona mitlawa ya valanguteri, va ri vana va Kora ni vana va Merari.
Mitirho yin'wana ya Valevhi.
20Exikarhi la Valevhi, Ahiya a a ri muhlayisi wa xuma xa yindlu ya Xikwembu, ni wa xuma xa swilo leswi hlawuriweke. 21Vana va Ladani, ni vana va Gerixoni, lava humeke eka Ladani, ni tihosana ta tindlu ta vatata wa Ladani, wa Gerixoni, a a ri Yehieli; 22ni vana va Yehieli, Zetamu na Yuwele, makwavo, a va ri vahlayisi va xuma xa yindlu ya Yehovha. 23Loko va ri va Amirama, ni va Yisihara, ni va Hebroni, ni va Uziele, 24Xebuwele, n'wana Gerixomu, n'wana Muxe, a a ri mulanguteri wa vahlayisi va xuma. 25Vamakwavo lava humeke eka Eliezere a a ri Rehabiya, n'wanakwe, na Yexaya, n'wanakwe, na Yoramu, n'wanakwe na Zikri, n'wanakwe, na Xelomoto, n'wanakwe. 26Xelomoto loyi, ni vamakwavo, a va ri vahlayisi va xuma hinkwaxo xa swilo leswi hlawuriweke leswi kwetsimisiweke hi hosi Davhida, ni tihosana ta tinyimba, ni tindhuna ta khume ra madzana, ni ta dzana, ni tindhuna ta nyimpi; 27va swi hlawulele yindlu ya Yehovha, swi huma exumeni lexi va xi kumeke enyimpini, 28ni hinkwaswo leswi hlawuriweke hi Samiele muvoni, na Sawulo, n'wana Kixi, na Abinere, n'wana Neri, na Yowabu, n'wana Seruya, hambi mani na mani la hlawuleke xilo, hinkwaswo swi vekiwa emavokweni ya Xelomoto, ni ya vamakwavo.
29Exikarhi ka va Yisihara, Kenaniya ni vana va yena va lerisiwa timhaka ta le handle ta Vaisraele, va ri valawuri va timhaka ni vaavanyisi. 30Exikarhi ka va Hebroni, Haxabiya ni vamakwavo, va ri vavanuna lava tiyeke va 1 700, va vekiwa valanguteri va Vaisraele, ehase ka Yordani, evupeladyambu, etimhakeni hinkwato ta Yehovha, ni le mitirhweni hinkwayo ya hosi. 31Loko va ri va Hebroni Yeriya a yi ri hosana ya vona; hi lembe ra mune wa makume ra ku fuma ka Davhida, va lavisisa etinxakeni ta vona ni le tinyimbeni ta vona, kutani va kuma exikarhi ka vona vavanuna va matimba emutini wa Yazere, wa Giliyadi. 32Vamakwavo va Yeriya a va ri 2 700, ti ri tinhenha ni tihosana ta tindlu ta vatata wa vona; hosi Davhida a va veka ehenhla ka va Rhuveni ni va Gadi, ni va hafu ya nyimba ya Manase, ku lunghisa timhaka hinkwato ta Xikwembu, ni timhaka ta hosi.
