Ta Valevhi: ntsengo wa vona ni mitirho ya vona.
1Davhida, kuteloko a dyuhele, a taleriwe hi masiku, a veka Solomoni, n'wana wa yena, hosi ya Israele.
2A hlengeleta tihosana hinkwato ta Israele, ni vaprista, ni Valevhi. 3Kutani ku hlayiwa Valevhi, ku sungula hi va malembe ya makume manharhu, ni le henhla ka wona; ntsengo wa vona, hi tinhloko ta vona, a va ri vavanuna va 38 000. 4Kutani Davhida a ku: “Va 24 000 a va langutele ntirho wa yindlu ya Yehovha; va 6 000 a va ve etihubyeni ni vaavanyisi, 5va 4 000 a va ve valanguteri va tinyangwa, ni va 4 000 a va dzunise Yehovha hi timbila leti ndzi ti endleke ku n'wi dzunisa.”
6Davhida a va avanyisa hi mitlawa hi tinyimba ta vana va Levhi, Gerixoni, Kohata na Merari. 7Va Gerixoni: Ladani na Ximeyi. 8Vana va Ladani: hosana Yeyiele, na Zetamu, na Yuwele, vanharhu. 9Vana va Ximeyi: Xelomoto, na Haziele, na Harana, vanharhu; hi tona tihosana ta tindlu ta Ladani. 10Vana va Ximeyi: Yahata, na Zina na Yewuxi, na Beriya; hi vona vana va Ximeyi, mune. 11Yahata a a ri hosana, na Zina wa vumbirhi; loko a ri Yewuxi na Beriya, a va kumanga vana va vavanuna lavo tala, va endla yindlu yin'we ntsena ya vatatana entsengweni.
12Vana va Kohata: Amirama, Yisihara, Hebroni, Uziele, mune. 13Vana va Amirama: Aroni na Muxe. Aroni a hlayiwa hitlhelo leswaku a hlawuriwa, a va loyi a kwetsimisiweke ngopfu, yena ni vana va yena hi masiku, ku humesa mirhi ya risuna emahlweni ka Yehovha, ku n'wi tirhela ni ku katekisa tiko hi vito ra yena hi masiku. 14Loko a ri Muxe, munhu wa Xikwembu, vana va yena va hlayiwile enyimbeni ya Levhi. 15Vana va Muxe: Gerixomu na Eliezere. 16Vana va Gerixomu: Xebuwele, hosana. 17Vana va Eliezere, a a ri Rehabiya hosana. Eliezere a nga vanga na vana va vavanuna van'wana, kambe vana va Rehabiya a va ri lavo tala ngopfu. 18Vana va Yisihara Xelomiti, hosana. 19Vana va Hebroni: Yeriya, hosana; Amariya, wa vumbirhi, Yahaziele, wa vunharhu, Yekameyamu, wa vumune. 20Vana va Uziele: Mika, hosana, na Yixiya, wa vumbirhi.
21Vana va Merari: Maheli na Muxi. Vana va Maheli: Eliyazara na Kixi. 22Eliyazara, loko a fa, a nga vanga na vana va xinuna, kambe a a ri ni vanhwanyana lava tekiweke hi vana va Kixi, vamakwavo. 23Vana va Muxi: Maheli na Edere, na Yeremoto, vanharhu.
24Hi vona vana va xinuna Valevhi, hi tindlu ta vatata wa vona, ti ri tihosana ta tindlu ta vatatana, hilaha va tsariweke hakona loko va hlaya mavito ya vona hi tinhloko. A va tirha ntirho wa yindlu ya Yehovha, ku sungula hi va malembe ya makume mambirhi, ni le henhla ka wona. Hikuva Davhida a a ku: 25“Yehovha, Xikwembu xa Israele, u nyikile tiko ra yena ku wisa kutani u ta aka eYerusalema, hi masiku. 26Sweswo vana va Levhi va nga ha rhwali Tabernakela ni swigotso hinkwaswo swa ntirho wa yona.” 27Ku hlayiwa ka vana va xinuna Valevhi, ku sungula hi va malembe ya makume mambirhi, ni le henhla ka wona, ku endliwile hi ku lerisa ka ku hetelela ka Davhida. 28“Hikuva va vekiwile ekusuhi ni vana va Aroni ku tirha ntirho wa yindlu ya Yehovha a va ri valanguteri va swivava ni makamara; va basisa swilo hinkwaswo leswi hlawuriweke va tirha ntirho wa yindlu ya Xikwembu; 29va hlayisa swinkwa leswi vekiwaka emahlweni ka Xikwembu, ni mapa layo saseka ya tinyiko, ni swimbhundzwana leswi nga riki na comela, ni leswi katingiweke ni leswi oxiweke; ni mimpimo hinkwayo ya leswi chuluriwaka, ni ya leswo leha; 30ehandle ka swona, a va fanela ku yima emahlweni ka Xikwembu siku rin'wana ni rin'wana, nimixo ni madyambu, ku vonga ni ku dzunisa Yehovha; 31va fanele ku humesela Yehovha tiholokosta hinkwato, hi Tisavata, ni le mikarhini ya n'weti leyintshwa, ni ya tinhlengeletano hi ntsengo wa tona, hilaha ku lerisiweke hakona, hi mikarhi hinkwayo emahlweni ka Yehovha. 32Va fanele ku hlayisa Tabernakela ya nhlengeletano, ni vukwetsimelo, ni ku pfuna vana va Aroni, vamakwavo, entirhweni wa Yindlu va Yehovha.”
