Ta ku hluriwa ka Vafilista, ni Vamowabu, ni Vasiriya, ni Vaedomu.
1Endzhaku ka sweswo, Davhida a hlula Vafilista, a va tsongahata, a teka Gati emavokweni ya Vafilista, ni miti ya wona. 2A hlula ni Vamowabu, kutani Vamowabu va va ehansi ka Davhida, va n'wi humesela ndzuvo.
3Davhida a hlula Hadadi-Esere hosi ya Soba, ekusuhi na Hamata, loko a ha yile ku tiyisa ku fuma ka yena enambyeni wa Yufrata. 4Davhida a n'wi tekela tigolonyi ta khume ra madzana ni vakhandziyi va tihanci va 7 000, ni lava fambaka hi milenge va 20 000; kutani Davhida a tsema misiha ya milenge ya tihanci ta tigolonyi hinkwato a tihlayisela tigolonyi ta dzana ntsena.
5Vasiriya va Damaska va ta pfuna Hadadi-Esere, hosi ya Soba, kutani Davhida a dlaya vanhu va Siriya va 22 000. 6Davhida a veka valanguteri etikweni ra Siriya ra Damaska, kutani Vasiriya va fumiwa hi Davhida, va n'wi humesela ndzuvo. Yehovha a a ponisa Davhida hinkwako laha a yaka kona. 7Davhida a teka switlhangu swa nsuku leswi ngi swi ri swa malandza ya Hadadi-Esere, a swi yisa eYerusalema. 8Davhida a teka emitini ya Tibihata na Kuni ya Hadadi-Esere koporo ya ku tala ngopfu. Hi koporo leyi, Solomoni u endlile lwandle ra koporo, ni timhandze ni swigotso swa koporo.
9Tohu hosi ya Hamata, kuteloko a swi twile leswaku Davhida a hlurile tinyimpi hinkwato ta Hadadi-Esere, hosi ya Soba, 10a rhuma Hadorama n'wana wa yena, eka hosi Davhida ku n'wi rungula ni ku tlangela hikuva a lwile na Hadadi-Esere, a va a n'wi hlula; hikuva Hadadi-Esere a a tshama a lwa na Tohu. Hadorama a tisa timbita ta nsuku ni ta silivhere ni ta koporo ta tinxaka to tala. 11Kutani hosi Davhida a swi hlawulela Yehovha, swin'we ni silivhere ni nsuku leswi a swi tekeke ematikweni hinkwawo, ya Edomu, ni ya Mowabu, ni ya vana va Amoni, ni ya Vafilista, ni ya Vaamaleke.
12Abixayi, n'wana Seruya, a hlula Vaedomu va 18 000 enkoveni wa Munyu. 13Kutani a veka valanguteri etikweni ra Edomu; Vaedomu hinkwavo va fumiwa hi Davhida. Yehovha a tshama a ponisa Davhida hinkwako laha a yaka kona.
14Davhida a fuma Vaisraele hinkwavo, a avanyisa hi ku lulama timhaka ta tiko ra yena hinkwaro. 15Yowabu, n'wana Seruya, a a ri ndhuna ya nyimpi; na Yoxafati, n'wana Ahiludi, a a ri muhlayisi wa matsalwa; 16Sadoki, n'wana Ahituba, na Ahimeleke n'wana Abiyatara, a va ri vaprista, Xavixa, yena, a a ri mutsari; 17Benaya, n'wana Yehoyada, a a ri ndhuna ya Vakereti ni ya Vapeleti; kambe vana va Davhida a va ri lavo rhanga, ekusuhi ni hosi.
