Ingoma Yetingoma 4

₁Maye, umuhle, sitsandvwa sami! Maye, umuhle bo!

Emehlo akho ngaphansi kweveyili yakho

afanana nematuba.

Tinwele takho tifanana nemhlambi wetimbuti,

yebo, wetimbuti natehla eNtsabeni iGileyadi.

₂Ematinyo akho afanana nemhlambi wetimvu

letisandza kuhhulwa, natikhuphuka ekugezweni.

Nguleyo ihamba naleyo leliphahla kanye nayo,

kute nayinye lehamba ngayodvwa.

₃Tindzebe temlomo wakho tinjengetincotfo

letiboshiwe letibovu,

umlomo wakho uyatsandzeka.

Tinhlafuno takho ngaphansi kweveyili yakho

tinjengetincetu temahananandza.

₄Intsamo yakho injengembhoshongo waDavide,

lowakhiwe ngemihlobiso, uyindingilizi,

kuwo kulenga emahawu layinkhulungwane,

onkhe angemahawu etingwazi tasemphini.

₅Emabele akho lamabili anjengemazinyane lamabili,

yebo, njengemazinyane langemaphahla emphala,

ladla emkhatsini weminduze.

₆Kudzimate kudzabuke kusa, titfunti tibaleka,

ngiyawukhuphukela entsabeni yemure

nasegcumeni lemphepho.

₇Umuhle wonkhe, sitsandvwa sami;

kute nalesincane sici kuwe.

₈Wota nami sisuke eLebanoni, makoti wami,

wota sambe nawe lapha eLebanoni.

Yehla esicongweni sase-Amana,

esicongweni saseSeniri,

ingcongwane yeHemoni,

sisuke emhumeni wemabhubesi,

nakuso sidleke sekudlalela tingwe.

₉Uyitfumbile inhlitiyo yami,

dzadzewetfu, makoti wami.

Uyitfumbile inhlitiyo yami

ngekungikha kanye nje ngemehlo akho,

ngelucu lunye nje lwengcibe yentsamo yakho.

₁₀Maye, lumnandzi bo lutsandvo lwakho,

dzadzewetfu, makoti wami.

Lujabulisa kangakanani-ke lutsandvo

lwakho kuneliwayini,

neliphunga lemakha akho limnandzi kunelesinongo!

₁₁Tindzebe temlomo wakho tintfontsa kunongotela

lokunjengekweluju lwetinyosi, makoti wami.

Lubisi neluju kungaphansi kwelulwimi lwakho.

Kutsaphuka kwemakha etingubo takho

kunjengalokwa kwaseLebanoni.

₁₂Utungeletwe ngelutsango njengengadze,

dzadzewetfu, makoti wami.

Usiyalu lesakhelwe lutsango,

umtfombo lobekwe luphawu.

₁₃Tilimo takho tilihlatsi lemahananandza

lanetitselo telikhetselo, nehena, nenadi,

₁₄inadi nesafroni, ikalamu nesinamoni,

nayo yonkhe inhlobo yesihlahla semphepho,

nesemure, nesenhlaba,

nato tonkhe tinandzisi leticolisakele.

₁₅Ngingumtfombo wasengadzeni,

siyalu semanti lagobhotako,

lageleta ehla esuka eLebanoni.

₁₆Vuka, moya wasenyakatfo,

ute nawe, moya waseningizimu!

Hhusha etikwengadze yami,

kuze kutsaphuka kwemakha ayo kwandze kabanti.

Longitsandzako akete engadzeni yakhe

atewunambitsa titselo tayo telikhetselo.