Sembulo 8

₁Latsi kube liWundlu licatulule luphawu lwesikhombisa, kwathula ezulwini kwatsi dvu, sikhashane. ₂Ngase ngibona tingilosi letisikhombisa time embikwaNkulunkulu, tanikwa emacilongo lasikhombisa.

₃Lenye ingilosi yeta yema ngaselatini iphetse sitja segolide semphepho, yanikwa imphepho lenyenti kutsi iyengete iyihlanganise nemithandazo yabo bonkhe labangcwele, inikele ngayo etikwelilati legolide lelalisembikwesihlalo sebukhosi. ₄Intfutfu yemphepho yenyukela kuNkulunkulu kanye nemithandazo yalabangcwele, isuka esandleni sengilosi. ₅Lengilosi yasitsatsa lesitja yasigcwalisa ngemlilo lowawuselatini, yawujikijela emhlabeni; kwase kuba khona kudvuma, nemavi, nemibane nekutamatama kwemhlaba.

₆Tingilosi letatisikhombisa letatiphetse emacilongo lasikhombisa tatilungiselela kuwashaya.

₇Ingilosi yekucala yalishaya licilongo layo, kwase kulandzela sangcotfo nemlilo kuhlangene nengati lokwawela emhlabeni; incenye yesitsatfu yemhlaba yasha yaphela, nencenye yesitsatfu yetihlahla yasha yaphela, kanye netjani bonkhe lobuluhlata basha baphela.

₈Ingilosi yesibili yalishaya licilongo layo. Kwabonakala intfo leyayinjengentsaba lenkhulu ivutsa umlilo, ijikijelwa ekhatsi elwandle. Incenye yesitsatfu yelwandle yaba yingati. ₉Kwafa incenye yesitsatfu yako konkhe lokuphilako elwandle, kwabhujiswa nencenye yesitsatfu yemikhumbi.

₁₀Ingilosi yesitsatfu yalishaya licilongo layo, kwase kuwa inkhanyeti lenkhulu ezulwini, ivutsisa kwesibane, yawela etikwencenye yesitsatfu yemifula nasetikwemitfombo yemifula. ₁₁Libito lalenkhanyeti bekunguMhlonyane. Incenye yesitsatfu yemanti yababa, kwafa bantfu labanyenti babulawa ngulamanti, ngobe abebaba.

₁₂Ingilosi yesine yalishaya licilongo layo; kwashaywa incenye yesitsatfu yelilanga, nencenye yesitsatfu yenyanga, nencenye yesitsatfu yetinkhanyeti, loko kwenta kutsi incenye yesitsatfu yekukhanya kwako ibe mnyama; nencenye yesitsatfu yemini yangete yakhanya, kanjalo futsi nencenye yesitsatfu yebusuku.

₁₃Kwatsi kusenjalo ngabona lusweti lundiza emkhatsini welizulu. Ngaluva lumemeta ngelivi lelikhulu lutsi: “Maye! Maye! Maye kulabakhile emhlabeni, nasekukhala emacilongo lasetawushaywa tingilosi letintsatfu!”