Sembulo 13

₁Ngabona silo siphuma elwandle, sasinetimphondvo letilishumi, netinhloko letisikhombisa, kuleyo nakuleyo nhloko kwakuneligama lelihlambalatako. ₂Lesilo sasifanana nengwe, tinyawo taso tatifanana netelibhele, umlomo waso wawufanana newelibhubesi. Nyokangwenya wasinika emandla akhe, nesihlalo sakhe sebukhosi, nemagunya akhe lamakhulu. ₃Lenye yetinhloko taso yayilinyatwe yakhehletwa sakufa, kodvwa lelinceba laso lekufa lelashwa laphola, wonkhe umhlaba wamangala wasilandzela lesilo. ₄Bantfu bakhonta lonyokangwenya, ngobe emandla akhe abewanike lesilo; lesilo basikhonta batsi: “Ngubani longalwa naso?”

₅ Lesilo saphiwa umlomo wekukhuluma emavi lamakhulu lasinengiso newekuhlambalata. Savunyelwa kutsi sisebentise emandla aso tinyanga letingema-42. ₆Sahlambalata Nkulunkulu, sihlambalata libito lakhe, nalapho ahlala khona, nabo bonkhe labahlala khona ezulwini. ₇Savunyelwa nekutsi silwe nalabangcwele sibehlule, sanikwa nemandla etikwayo yonkhe imindeni, nebantfu, netilimi, netive. ₈Bonkhe labahlala emhlabeni bayawusikhonta, bokhe labo lekwatsi umhlaba ungakasekelwa emabito abo angete abhalwa encwadzini yekuphila yeliWundlu lelahlatjwa.

₉Lowo lonendlebe akeve!

₁₀Nakukhona lofanele kutfunjwa, akatfunjwe; nakukhona lofanele kubulawa ngenkemba, akabulawe ngayo. Loku kubita kucinisela nekukholwa kwalabangcwele.

₁₁Ngase ngibona lesinye silo lesaphuma emhlabatsini, sasinetimphondvo letimbili letatifanana netelizinyane lemvu, sakhuluma njenganyokangwenya. ₁₂Sasebentisa onkhe emandla esilo sekucala ngeligunya laso; saphocelela umhlaba nabo bonkhe labahlala kuwo kutsi bakhonte lesilo sekucala leselashwa saphiliswa encebeni laso lekufa. ₁₃Senta tibonakaliso letinkhulu, ngisho nekwehlisa umlilo ezulwini wehlele emhlabeni embikwebantfu bonkhe babuka. ₁₄Silo sesibili savunyelwa kutsi sikhohlise bonkhe bantfu labahlala emhlabeni ngaletibonakaliso lesasitenta ngeligunya lesilo sekucala. Lesilo sesibili sabatjela kutsi bakhe umfanekiso, bakhele lesilo sekucala lesasinelinceba lenkemba lelelashwa laphiliswa. ₁₅Silo sesibili sanikwa emandla ekuphefumulela lomfanekiso wesilo, kuze kutsi ukhulume, sente nekutsi labo labangawukhonti lomfanekiso babulawe. ₁₆Lesilo saphocelela bonkhe labancane nalabakhulu, ticebi netimphuya, labakhululekile netigcili, kutsi babekwe luphawu ngulowo nalowo esandleni sakhe sangesekudla nome ebuntini. ₁₇Loko kwentelwa kutsi kubete lotsengako nome lotsengisako ngaphandle kwekutsi abe neluphawu lekulibito lesilo nome inombolo yelibito laso.

₁₈Loku-ke kubita kuhlakanipha: Lowo lonekucondza akabale inombolo yalesilo; ngobe lenombolo imele umuntfu. Lenombolo ingema-666.