Sihlabelelo 96

₁Hlabelani ingoma lensha kuSimakadze,

hlabelani kuSimakadze,

mhlaba wonkhe!

₂Hlabelani kuSimakadze,

nidvumise libito lakhe,

memetelani insindziso yakhe

imihla ngemihla.

₃Vakalisani bukhosi bakhe etiveni,

nitjele tonkhe tive ngetimanga takhe.

₄Simakadze mkhulu,

ufanele kudvunyiswa kakhulu,

ufanele kwesatjwa kunabo bonkhe bonkulunkulu.

₅Ngobe bonkhe bonkulunkulu betive batithico,

kantsi nguSimakadze lowenta emazulu.

₆Ludvumo nebukhosi kusembikwakhe,

emandla nenkhatimulo

kusendlini yakhe lengcwele.

₇Phakamisani Simakadze

esikhundleni sakhe,

nine mindeni yetive.

Nikani Simakadze ludvumo nemandla.

₈Nikani Simakadze

lolufanele ludvumo libito lakhe.

Ngenani emabaleni endlu yakhe,

niletse kuye umnikelo.

₉Khotsamani nikhuleke kuSimakadze,

nembatse bungcwele,

nitfutfumele embikwakhe,

mhlaba wonkhe.

₁₀Memetelani emkhatsini wetive nitsi:

“Simakadze yiNkhosi, uyabusa!

Yebo, umhlaba usinyisiwe,

ungeke utanyatanyiswe,

nguye loyakwehlulela tive ngebucotfo.”

₁₁Jabulani mazulu,

tsakasa nawe mhlaba,

kubhodle lwandle

nako konkhe lokukulo.

₁₂Emadlelo, nako konkhe lokukuwo,

akujabule,

tonkhe tihlahla tesiganga atijabule

₁₃embikwaSimakadze, ngobe uyeta,

yebo, uyeta kutakwehlulela umhlaba.

Uyakwehlulela umhlaba ngekulunga,

yebo, ehlulele tive ngekwetsembeka kwakhe.