Sihlabelelo 91

₁Lowo lohlala ekusitsekeni

kuLosetikwako Konkhe

ukhosele ekhwapheni laSomandla.

₂Angasho kuSimakadze atsi:

“Wena usiphephelo sami

nenqaba yami,

unguNkulunkulu wami

lengetsembele kuye.”

₃Nguye-ke Simakadze

lotakwephula elugibeni lwebacuphi,

akuvikele nasetifeni letitsatselwanako.

₄Uyawukusibekela ngetimphiko takhe,

uphephele ngaphansi kwemaphiko akhe,

kwetsembeka kwakhe kulihawu lekukuvikela.

₅Awudzingi kwesaba tingoti tasebusuku,

nemicibisholo lentjuzako emini,

₆nengoti lenkhulu levumbuka ebumnyameni,

namashayacotfule wesifo

lobhubhisako emini.

₇Labatinkhulungwane bangawa eceleni kwakho,

nalabatinkhulungwane letilishumi

bawele ngasesandleni sakho sekudla,

kodvwa wena usale ungenamyocu.

₈Uyawubuka nje kuphela ngemehlo akho,

ubone kujeziswa kwalababi.

₉Ngobe wena Simakadze

umente waba siphephelo sakho,

Losetikwako Konkhe umente inqaba yakho.

₁₀Ungeke wehlelwe ngemashwa,

nesifo singeke sisondzele ekhaya lakho.

₁₁Ngobe Nkulunkulu

uyawuyala tingilosi takhe ngawe

tikulondvolote ekuhambeni kwakho konkhe.

₁₂Tiyawukutsatsa

tikwetfwale ngetandla,

kuze lunyawo lwakho

lungete lwakhutjwa etjeni.

₁₃Uyawuhamba etikwemabhubesi netinyoka,

ugcobagcobe etikwemawundlu emabhubesi

kanye nasetikwetinyoka.

₁₄Nkulunkulu yena utsi:

“Njengobe naku

ubambelele kimi ngelutsandvo,

ngitamephula

ngimbeke endzaweni lephakeme,

ngimvikele ngobe alati libito lami.

₁₅Uyawungibita ngiphendvule

ngibe naye ekuhluphekeni,

ngimuphe kuphepha nekuhlonipheka.

₁₆Ngiyawumesutsisa

ngebudze bemalanga akhe

ngimkhombise

emandla ensindziso yami.”