Sihlabelelo 89

₁Yebo, Simakadze!

Ngiyawuhlabela kuze kube phakadze

ngemisebenti yemusa wakho.

Kwetsembeka kwakho

ngiyawukumemetela ngemlomo wami

etitukulwaneni nasetitukulwaneni.

₂Ngobe ngitsite:

Umusa wakho utawuma

kuze kube phakadze,

nekwetsembeka kwakho utakumisa ezulwini.

₃Wena ukhulume watsi:

“Sengente sivumelwane nalokhetsiwe wami,

ngafunga kuDavide inceku yami ngatsi:

₄‘Ngiyawumisa intalo yakho

phakadze naphakadze,

ngikwakhele sihlalo sakho sebukhosi

etitukulwaneni ngetitukulwane.’ ” Cabanga.

₅Yebo, Simakadze!

Shangatsi emazulu angadvumisa

timanga takho nekwetsembeka kwakho

enhlanganweni yalabangcwele!

₆Ngubani nje losesibhakabhakeni

longalinganiswa nawe, Simakadze?

Ngubani nje,

emkhatsini wemadvodzana aNkulunkulu,

longafananiswa naSimakadze?

₇UnguNkulunkulu lowesatjwa

emikhandlwini yalabangcwele.

Umkhulu, futsi wesabeka

ngetulu kwabo bonkhe labakuhacile.

₈Yebo, Simakadze!

Nkulunkulu wemabandla!

Ngubani nje lofanana nawe,

wena lonemandla, Simakadze?

Kwetsembeka kwakho kuyakuhaca.

₉Nguwe lobusa kutichenya kwelwandle

nakaphakama emagagasi alo,

wena uyawabindzisa.

₁₀Nguwe lowapitjita Rahabi, wambulala.

Titsa takho watisakata

ngesandla sakho lesinemandla.

₁₁Emazulu ngewakho,

nemhlaba wakho,

umhlaba nako konkhe lokukuwo

kwadalwa nguwe.

₁₂Inyakatfo neningizimu kwadalwa nguwe.

Intsaba iThabhori nentsaba iHemoni

kudvumisa libito lakho ngenjabulo.

₁₃Unengalo lenemandla,

nesandla sakho sinemandla,

nesandla sakho sekudla siphakeme.

₁₄Kulunga nebucotfo tisekelo

tesihlalo sakho sebukhosi,

umusa nekwetsembeka

kungemavulandlela lahamba embikwakho.

₁₅Yebo, Simakadze!

Sibusisiwe sive lesati kahle

kutsi kuyini kumpompoloza ngenjabulo,

sihambe ekukhanyeni kwebuso bakho.

₁₆Lesive sijabula njalo nje egameni lakho,

siphakanyiswe ngenca yekulunga kwakho.

₁₇Ngobe wena uludvumo lwemandla aso,

ngekusikhetsa kwakho

luphondvo lwemandla etfu luyaphakanyiswa.

₁₈Sihlangu setfu sakho, Simakadze,

siyinkhosi yetfu lesayinikwa

nguLongcwele waka-Israyeli.

₁₉Endvulo wase wakhuluma embonweni,

kuye lowetsembekile wakho, watsi:

“Ngimsitile, ngambeka lolichawe,

ngamphakamisa lotsandzekako wami.

₂₀Ngimtfolile Davide, inceku yami,

sengimgcobe ngemafutsa ami langcwele.

₂₁Sandla sami siyawuma naye njalo simcinise,

ngempela ingalo yami iyawumcinisa.

₂₂Sitsa singeke simphocelele

kutsi etfule kuso,

nalomubi angeke amhluphe.

₂₃Ngiyawupitjita titsa takhe embikwakhe,

ngibacitse labo labamtondzako.

₂₄Kwetsembeka kwami nemusa wami

kuyawuhlala naye;

ngelibito lami

kuyawuphakanyiswa luphondvo lwakhe.

₂₅Ngiyawumenta abuse etikwelwandle

nasetikwemifula kanyekanye.

₂₆Uyawukhala kimi atsi:

‘Wena unguBabe,

unguNkulunkulu wami,

nelidvwala lensindziso yami.’

₂₇Ngiyawumenta abe litubulo,

abe yinkhosi lephakeme kunemakhosi emhlaba.

₂₈Ngiyawumgcinela umusa wami

kuze kube phakadze.

Sivumelwane sami naye siyawuhlala simile.

₂₉Ngiyawumisa intalo yakhe,

kuze kube phakadze,

nesihlalo sakhe sebukhosi sisime,

yingci nakusekhona sibhakabhaka etulu.

₃₀“Nangabe bantfwabakhe

bawulahla umtsetfo wami,

bangahambi ngendlela yetincumo tami,

₃₁bedzelela timiso tami,

bangayigcini imiyalo yami,

₃₂ngiyawube sengibafaka luswati,

ngibajezise ngenca yekona kwabo,

ngibanike imivimba ngenca yebubi babo.

₃₃Kodvwa

ngingeke ngiwususe umusa wami kuye,

ngingeke futsi

ngikuphikise kwetsembeka kwami.

₃₄Sivumelwane sami

ngingeke ngisephule;

nemavi lese ngiwakhulumile

ngingeke ngiwagucule.

₃₅“Ngifunge kwaba kanye

ebungcweleni bami,

ngingeke ngiwacale emanga kuDavide.

₃₆Intalo yakhe iyawuma

kuze kube phakadze,

nesihlalo sakhe sebukhosi asiyiwugucuka,

siyawuma njengelilanga lelisembikwami.

₃₇Uyawumiswa siphelane, njengenyanga,

ngobe yona ingufakazi lowetsembekile

losemafini.” Cabanga.

₃₈Kodvwa manje sewumlahlile wamala,

wamtfukutselela logcotjiwe wakho.

₃₉Sewusicitsile sivumelwane senceku yakho,

umchele wayo uwutsele ngelihlazo,

wawudzicela phansi.

₄₀Utidzilitele phansi

tonkhe tindvonga,

tinqaba tasala titindvundvuma.

₄₁Bonkhe labendlula ngendlela

bayatikhwanyela kuyo.

Seyigucuke yaba yinhlekisa

kubomakhelwane bayo.

₄₂Uyente yancotjwa ngulabamelene nayo,

wajabulisa tonkhe titsa tayo.

₄₃Nenkemba yayo ayikadli enyameni,

wayenta yehluleka

ngisho nekubhekana nemphi.

₄₄Uyemuke indvuku yebukhosi esandleni sayo,

wasidzaceka phansi sihlalo sayo sebukhosi.

₄₅Uwafinyetile emalanga ebusha bayo,

wayembesa ngemahloni. Cabanga.

₄₆Kuyawuze kube ngunini, Simakadze,

utifihla siphelane ngingakuboni?

Kuyawuze kube ngunini

lulaka lwakho luvutsa

njengemalangabi emlilo?

₄₇Khumbula-ke kutsi sikhatsi sami

singakanani emhlabeni.

Bonkhe bantfu lowabadala

bendlula njengemoya kulomhlaba.

₄₈Ngubani nje umuntfu loyawuphila angafi?

Ngubani nje longatigodla yena

angayi ethuneni? Cabanga.

₄₉Awu, Nkhosi yami!

Uphi kantsi umusa wakho lomkhulu

lowawubonakalisa endvulo,

wenta sifungo ngawo kuDavide

ngekwetsembeka kwakho?

₅₀Awu, Nkhosi yami!

Khumbula kuphukutwa kwenceku yakho,

nekutsi tive tingibhaceka ngetinhlamba.

₅₁Awu, Simakadze!

Titsa takho tiyayihhalatisa

lenkhosi loyigcobile,

tiyayilandzela tiyibambe,

tiyibhaceke ngetinhlamba.

₅₂Simakadze akabongwe nini nanini!

Amen! Yebo, Amen!