Sihlabelelo 49

₁Vanini loku, nonkhe nine tive!

Bekani indlebe, nonkhe

nine lenakhile emhlabeni.

₂Lalelani bantfukatana nani tikhulu,

nine tinjinga nani timphuya nonkhe!

₃Umlomo wami utawukhuluma lwati,

imicabango yenhlitiyo yami

ibonakalise kucondza.

₄Ngiyawubeka indlebe yami

ngilalele inkhulumo lenenhlakanipho,

ngiphenye imfihlakalo

ngekudlala lugubhu lwetintsambo.

₅Pho, ngitakwesabani

ngetikhatsi tekuhlupheka,

nangabe bubi bebatingeli bami

sebungitungeletile,

₆labatsembele badzimate bachosha

ngebunyenti bengcebo yabo?

₇Impela kute umuntfu longahlenga umnakabo,

nome-ke anike Nkulunkulu

intsengo yemphilo yakhe.

₈Ngobe phela

kuhlengwa kwemphefumulo wakhe

kubita kakhulu,

kute intsengo lengakwenela

₉kutsi angachubeka aphile

kuze kube phakadze,

angayi nekuya nje ethuneni.

₁₀Yebo, wonkhe umuntfu uyabona

kutsi netihlakaniphi tiyafa

njengobe tilima netiphukuphuku tifa,

tishiye ingcebo yato

kutsi idliwe ngulabanye.

₁₁Emathuna alikhaya labo

phakadze naphakadze;

bayawuhlala kuwo siphelane,

nome bake baba nemave

letsiwa ngemabito abo.

₁₂Umuntfu nome angaba netidvumo,

angeke ahlale angafi,

unjengetilwane letifa

kungabi ndzaba talutfo.

₁₃Bukani-ke siphetfo

salabo labatetsembako,

nesebalandzeli babo

labavumelana netinkhulumo tabo. Cabanga.

₁₄Banjengetimvu letimele kubulawa,

babhekene nekufa.

Labacotfo bayawubabusa ngemuso,

tidvumbu tabo tibole ethuneni,

balahlekelwe nangemakhaya abo.

₁₅Kodvwa, Nkulunkulu,

umphefumulo wami

uyakuwuhlenga emandleni ekufa

ngobe uyawungemukela. Cabanga.

₁₆Ungesabi lutfo, nakanjinga umuntfu,

lapho bunjinga bakhe sebandza;

₁₇ngobe nasafa, kute latawuhamba nako,

ngisho nebunjinga bakhe imbala.

₁₈Nome umuntfu angatidvumisa

abuse asaphila,

nome bantfu bangamdvumisa

ngebuciko bakhe,

₁₉utawuhamba aye kubakubo lase bafa,

lapho kunebumnyama baphakadze.

₂₀Umuntfu loyingcunga

kepha abe ate kucondza,

naye uyawufa njengetilwane

letifa kungabi ndzaba talutfo.