Sihlabelelo 44

₁Yebo, Nkulunkulu!

Sivile ngetindlebe tetfu

bokhokho nabasitekela,

tintfo lewawutenta ngemalanga abo,

ngemalanga asendvulo.

₂Nguwe lowacitsa tive ngesandla sakho,

wahlanyela bokhokho eveni lato;

tive watidvungulula,

wahlumisa bobabe betfu.

₃Ngobe live abalichwaganga ngenkemba yabo

ngisho nekuncoba abancobanga

ngetikhwepha tabo;

kodvwa bancoba

ngesandla sakho sekudla,

nangengalo yakho,

nangekukhanya kwebuso bakho,

ngobe wena wawubatsandza.

₄Yebo, Nkulunkulu,

wena uyiNkhosi yami,

yelekelela bakaJakobe

ubente bancobe.

₅Labaphambene natsi sitawubehlula

sibagicite ngawe,

labasivukelako sitabapitjita

ngelibito lakho.

₆Angiketsembeli ebutjokini bami,

nenkemba yami ayisiyo lengangisindzisa.

₇Kodvwa wena usisindzisile

kulabamelene natsi,

wabajabhisa labo labasitondzako.

₈Sitincoma ngaNkulunkulu lilanga lonkhe,

libito lakho siyawulidvumisa

phakadze naphakadze. Cabanga.

₉Noko sewusilahlile wasihlazisa,

awusaphumi kanye nemabutfo etfu.

₁₀Usicoshise ngetitsa tetfu,

nalabamelene natsi

bayatitapela nje lapha kitsi.

₁₁Usente saba njengetimvu tekuhlatjwa,

wasisakatela etiveni tonkhe.

₁₂Sive sakho usitsengise ngelinani lelincane,

wangete walizuza linani lelikhulu.

₁₃Usente saba yinhlekisa kubomakhelwane betfu,

wasenta sihhala nakulabo labasihacile.

₁₄Usente siga emkhatsini wetive,

wasenta saba yintfo yekubukelwa phansi.

₁₅Ngihlala ngihlazekile sonkhe sikhatsi,

sengize ngidliwa ngemahloni,

₁₆ngenca yekutsi

ngiva bayangihhalatisa bangetfuke,

nangenca yekubona sitsa

nemphindziseli wami.

₁₇Konkhe loku kusehlele,

kodvwa asikakukhohlwa wena,

futsi asikasephuli sivumelwane sakho.

₁₈Inhlitiyo yetfu ayikakuhlubuki,

kantsi netinyawo tetfu atikaphambuki

endleleni yakho,

₁₉noko usipitjitele ehlane letimpungutja,

wasembesa ngelitfunti lekufa.

₂₀Kube bese silikhohliwe

libito laNkulunkulu wetfu,

safuna lusito kulabanye bonkulunkulu,

₂₁Nkulunkulu abengeke akwati yini loko?

Ngobe yena wati timfihlo tenhlitiyo.

₂₂Yebo, ngenca yakho

sibulawa lonkhe lilanga,

sitsatfwe njengetimvu timele kuhlatjwa.

₂₃Hhawu, Simakadze, phaphama! Ulaleleni?

Vuka, ungasiyekeleli kokuphela.

₂₄Ubufihleleni buso bakho?

Ukukhohlweleni kuhlushwa

nekucindzetelwa kwetfu?

₂₅Sidzicilelwe phansi elutfulini,

tisu tetfu tinamatsele emhlabatsini.

₂₆Sukuma utewusisita!

Sihlenge ngenca yemusa wakho.