Sihlabelelo 42

₁Njengendluzele yomele emanti emfula,

kanjalo nemphefumulo wami

ulangatelela wena, Nkulunkulu.

₂Umphefumulo wami womele Nkulunkulu,

yena lowo Nkulunkulu lophilako.

Ngiyawufika nini

ngibonakale embikwaNkulunkulu?

₃Tinyembeti tami tikudla kwami

busuku nemini,

ngobe lilanga lonkhe

bantfu bangichwephesha batsi:

“Kantsi ushonephi loNkulunkulu wakho?”

₄Nangikhumbula emuva,

inhlitiyo yami iyabibitseka

ngekhatsi kwami.

Ngangihamba nesicuku lesikhulu

ngisihola embili

ngiya endlini yaNkulunkulu

sihlabela ngekujabula lokukhulu.

₅Mphefumulo wami, udzabukeleni?

Uvungamelani ngekhatsi kimi?

Mani kuNkulunkulu,

ngobe ngisetawumdvumisa

uMsindzisi wami naNkulunkulu wami.

₆Umphefumulo wami udzabukile

ngekhatsi kwami,

ngako-ke ngiyawukukhumbula ngiseseJordane,

nasetintsabeni taseHemoni netaseMisari.

₇Ngiva umsindvo wemanti lageletako,

titiba nemabhudlo timemetana todvwana,

shangatsi ngigujetelwa ngemagagasi

netikhukhula temfula logcwele.

₈Shangatsi Simakadze

angakhombisa umusa wakhe kimi emini,

kuze kutsi ebusuku

ngihlabele ngimdvumise,

ngikhuleke kuNkulunkulu wekuphila kwami.

₉Ngikhuluma kuNkulunkulu ngitsi:

“Dvwala lami,

kwentiwa yini kutsi ungikhohlwe?

Kungani ngihambe ngilila

ngenca yekucindzetelwa sitsa?”

₁₀Shangatsi kufohloteka ematsambo ami

titsa natingihheletela

lilanga lonkhe, titsi:

“Kantsi uphi loNkulunkulu wakho?”

₁₁Mphefumulo wami, udzabukeleni?

Uvungamelani ngekhatsi kwami?

Mani kuNkulunkulu,

ngobe ngisetawumdvumisa

uMsindzisi wami naNkulunkulu wami.