Sihlabelelo 2

₁Kwentiwa yini kutsi tive tisuse lutfutfuva?

Bantfu-ke bona balivungamelelani lite?

₂Emakhosi emhlaba asukume phansi ahloma,

nebabusi bahlangene bemelana naSimakadze,

bemelana neMgcotjwa wakhe batsi:

₃“Asidzabule letibopho tabo

labasibophe ngato,

sitilahle phansi letintsambo

lesiboshwe ngato.”

₄Losesihlalweni sebukhosi ezulwini

ubahleka bulima;

yebo, Simakadze ubenta inhlekisa.

₅Wase ukhuluma kubo

ngentfukutselo yakhe,

ubakhahla ngelulaka lwakhe, utsi:

₆“Ngimi loyibekile inkhosi eSiyoni,

inkhosi lengiyikhetsile ngiyibeke eSiyoni,

intsaba yami lengcwele.”

₇Angimemetele umyalo

lowashiwo nguSimakadze kimi, nakatsi:

“Wena uyindvodzana yami,

lamuhla ngikutele.

₈Cela kimi,

mine ngiyawukunika tive

tibe lifa lakho,

nemhlaba wonkhe ube yingcebo yakho;

₉ubaphahlate ngentfonga yensimbi,

ubaphihlite njengeludziwo lwembumbi.”

₁₀Ngako-ke nine makhosi, hlakaniphani;

nifundze sifundvo,

nine babusi bemhlaba.

₁₁Khontani Simakadze ngekwesaba,

nijabule ngekutfutfumela.

₁₂Khotsamani etinyaweni tendvodzana,

ingadzimate initfukutselele,

nifele endleleni,

ngobe lulaka lwayo luvutsa masinyane.

Babusisiwe bonkhe lababalekela kuyo.