Sihlabelelo 139

₁Simakadze ungihlolisisile, uyangati.

₂Uyakwati kuhlala kwami nekuvuka kwami,

imicabango yami uyati ingakaveli.

₃Uhlolisisa kuhamba kwami nekulala kwami,

uyatati tonkhe tindlela tami.

₄Livi litsi liselulwimini lwami,

wena, Simakadze,

ube sewulati ngalokuphelele.

₅Ungitungeletile ngemuva nangembili,

wangivikela ngesandla sakho.

₆Indlela longati ngayo iyangimangalisa,

iphakeme, ngingeke ngifinyelele kuyo.

₇Ngingayaphi ngisuke kuMoya wakho?

Ngingashona kuphi

ngibaleke ebusweni bakho?

₈Nangikhuphukela emazulwini,

wena ulapho,

nangendlala licansi lami

endzaweni yalabafile, wena ulapho.

₉Nangingandiza ngetimphiko tentsatsakusa,

ngiye ngihlale emikhawulweni yelwandle,

₁₀nakhona lapho sandla sakho besiyawungihola,

sekudla sakho singibambe singicinise.

₁₁Nome bengingatsi:

“Bumnyama abungisibekele,

kukhanya kugucuke

kube busuku lobungitungeletile,”

₁₂bumnyama bebungeke bube mnyama kuwe,

busuku bebuyawukhanya njengemini,

ngobe bumnyama bufanana nekukhanya kuwe.

₁₃Ngobe nguwe lowadala imibilini yami,

wangeluka esiswini samake.

₁₄Ngiyakudvumisa ngobe ngentiwe

ngendlela leyesabekako nalemangalisako.

Imisebenti yakho iyamangalisa,

loko ngikwati kahle kamhlophe.

₁₅Ematsambo ami

abengakafihlakali kuwe,

ngesikhatsi ngibunjwa ekusitsekeni

ngelukwa esiswini samake.

₁₆Wangibona ngiselihlwili.

Onkhe emalanga ami

abhalwa encwadzini yakho,

ajutjwa, lisengakefiki nalinye lawo.

₁₇Imicabango yakho ijulile, Nkulunkulu!

Maye, bukhulu bunyenti bayo!

₁₈Nangingayibala, ingaba minyenti

kwendlula tinhlavu tesihlabatsi.

Nangivuka, wena usenami.

₁₉Shangatsi wena, Nkulunkulu,

ungababhubhisa lababi.

Ngako-ke sukani kimi,

nine bantfu bengati.

₂₀Bayakuhlambalata,

laba labatitsa takho

bakhuluma kabi ngelibito lakho.

₂₁Simakadze, angibatondzi yini

labo labatondza wena?

Anginengwa yini

ngulabo labakuvukelako?

₂₂Ngibazonda ngenzondo lephelele.

Ngibatsatsa njengetitsa tami.

₂₃Ngihlolisise, Nkulunkulu,

wati inhlitiyo yami!

Ngilinge, wati imicabango yami,

₂₄ubone kutsi kute yini

lokubi ekuhambeni kwami,

bese ungiholela endleleni yaphakadze.