Sihlabelelo 118

₁Bongani Simakadze, ngobe muhle,

umusa wakhe ume

kuze kube phakadze.

₂Baka-Israyeli abavume batsi:

“Umusa wakhe ume

kuze kube phakadze.”

₃Bendlu yaka-Aroni abatsi:

“Umusa wakhe ume

kuze kube phakadze.”

₄Labo labesaba Simakadze abatsi:

“Umusa wakhe ume

kuze kube phakadze.”

₅Ngakhala kuSimakadze

ngiselusizini lwami,

yena wangiphendvula ngekungikhulula.

₆Simakadze ungakimi

angesabi lutfo.

Umuntfu angangentani nje?

₇Simakadze ungakimi, ungumsiti wami,

labangitondzako ngiyawubabuka

ngibacoloshele.

₈Kuncono kuphephela kuSimakadze

kunekwetsembela kumuntfu.

₉Kuncono kuphephela kuSimakadze

kunekwetsembela emakhosini.

₁₀Tonkhe tive tangivimbetela ndzawo tonkhe,

kodvwa ngelibito laSimakadze

ngatishaya ngatibhuca.

₁₁Tangitungeleta,

tangicindzetela ndzawo tonkhe,

kodvwa ngelibito laSimakadze

ngatishaya ngatibhuca.

₁₂Tangibunganyela njengelibulo letinyosi,

tasha njengemlilo wemanyeva;

kodvwa ngelibito laSimakadze

ngatishaya ngatibhuca.

₁₃Ngafucwa matima ngacishe ngawa;

kodvwa Simakadze wangisita.

₁₄Simakadze ungemandla ami nengoma yami,

sewuyinsindziso yami.

₁₅Kuvakala emaphimbo ekwetsaba

laphuma etindlini talabangcwele atsi:

“Sandla sekudla saSimakadze

sisebenta ngemandla.

₁₆Sandla sekudla saSimakadze

siphakanyiselwe etulu.

Sandla sekudla saSimakadze

sisebenta ngemandla.”

₁₇Ngingeke ngife,

kodvwa ngitawuphila,

ngibalise ngemisebenti yaSimakadze.

₁₈Simakadze wangishaya kabuhlungu kabi,

kodvwa akazange anginikele ekufeni.

₁₉Ngivuleleni emasango ekulunga,

kuze ngingene ngawo

ngibonge Simakadze.

₂₀Ngilo leli lisango laSimakadze,

labalungile bangena ngalo.

₂₁Ngiyawukubonga

ngobe ungiphendvulile,

waba yinsindziso yami.

₂₂Litje lekwakha lelaliwa bakhi,

ngobe batsi alinamsebenti,

seligucuke laba litje lekusimisa indlu.

₂₃Loku kwentiwe nguSimakadze,

kuyamangalisa kitsi.

₂₄Leli lilanga lelentiwe nguSimakadze,

asijabule setsabe kulo.

₂₅Awu, Simakadze,

sisindzise, siyakuncenga!

Awu, Nkhosi,

siphumelelise, siyakuncenga!

₂₆Ubusisiwe lotako egameni laSimakadze.

Sinibusisa sisendlini yaSimakadze.

₂₇Simakadze nguNkulunkulu,

wasipha kukhanya, wasikhanyisela.

Hlabani lihele leMkhosi,

niphatse emacembe ngetandla tenu,

nize nifike etimphondvweni telilati.

₂₈Wena unguNkulunkulu wami,

ngiyakubonga;

wena unguNkulunkulu wami,

ngiyakudvumisa.

₂₉Bongani Simakadze, ngobe muhle,

nemusa wakhe ume

kuze kube phakadze.