Sihlabelelo 116

₁Ngiyamtsandza Simakadze,

ngobe ulivile livi lami nekuncusa kwami.

₂Ngobe ubekile indlebe yakhe kimi,

ngako-ke sengiyawukhuleka kuye

imphilo yami yonkhe.

₃Tingibe tekufa tangitungeleta,

iminjunju yekufa yangihlasela,

ngabandzetelwa tinhlupheko nelusizi.

₄Ngase ngibita libito laSimakadze, ngatsi:

“Awu, Simakadze,

ngiyakuncenga, ngisindzise.”

₅Simakadze unemusa nekulunga;

Nkulunkulu wetfu unesihe.

₆Simakadze uyamlondvolota londzindzako;

ngangisengotini wangisindzisa.

₇Mphefumulo wami,

ake uphindze uphumule,

ngobe Simakadze ukuphetse ngemusa.

₈Wena, Simakadze, uwephulile

umphefumulo wami ekufeni,

wephula emehlo ami etinyembetini

netinyawo tami ekuweni.

₉Ngiko nje ngihamba ebukhoneni baSimakadze

kulelive lalabaphilako.

₁₀Ngachubeka ngakholwa,

nome sengitsi:

“Maye, ngiphelile tinhlupheko!”

₁₁Ngajabha, ngadzimate ngatsi:

“Bonkhe bantfu banemanga!”

₁₂Ngiyawumentelani Simakadze,

ngimbonge ngako konkhe lokuhle

langentela kona?

₁₃Ngiyawuphakamisa indzebe yensindziso,

ngikhuleke kuSimakadze,

ngibonga libito lakhe.

₁₄Tifungo tami ngiyawutifeza kuSimakadze,

embikwabo bonkhe bantfu bakhe.

₁₅Kuligugu emehlweni aSimakadze

kufa kwalabangcwele bakhe.

₁₆Awu, Simakadze!

Mine ngiyinceku yakho,

indvodzana letalwa yincekukati yakho.

Utfukulule tibopho lebengiboshwe ngato.

₁₇Ngiyawunikela kuwe ngemhlatjelo wekubonga,

ngikhuleke kuSimakadze,

ngibonga libito lakhe.

₁₈Tifungo tami ngitatifeza kuSimakadze

embikwabo bonkhe bantfu bakhe,

₁₉ngisetibuyeni tendlu yaSimakadze,

ekhatsi nawe, Jerusalema.

Haleluya, dvumisani Simakadze!