Sihlabelelo 113

₁Haleluya, dvumisani Simakadze!

Dvumisani nine tinceku taSimakadze,

dvumisani libito laSimakadze.

₂Alibongwe libito laSimakadze,

manje kuze kube phakadze!

₃Kusukela ekuphumeni kwelilanga,

lize liyewushona,

libito laSimakadze liyabongeka.

₄Simakadze ungetulu kwato tonkhe tive,

nenkhatimulo yakhe idlondlobele

ngetulu kwemazulu.

₅Ngubani nje lofana naSimakadze,

Nkulunkulu wetfu,

lotsi ahleti ekuphakameni

₆agobondzele abuke phansi

emazulwini nasemhlabeni?

₇Uphakamisa luphuya elutfulini,

aphakamise loswele etaleni lemlotsa,

₈amtsatse amhlalise netikhulu,

yebo, tikhulu tesive sakhe.

₉Inyumba uyipha umuti wayo,

ayente ijabule ibe ngunina webantfwana.

Haleluya, dvumisani Simakadze!