Sihlabelelo 112

₁Haleluya, dvumisani Simakadze!

Ubusisiwe umuntfu lowesaba Simakadze,

lotijabulisa ngekugcina imiyalo yakhe.

₂Intalo yakhe iyawuba nemandla emhlabeni;

situkulwane salabacotfo siyakubusiswa.

₃Ingcebo nemfuyo kusendlini yakhe,

kulunga kwakhe kume

kuze kube phakadze.

₄Labacotfo batfola kukhanya ebumnyameni.

Simakadze unemusa, nesihe, nekulunga.

₅Ubusisiwe umuntfu lowephanako,

ebolekise ngesihle,

lowenta tonkhe tintfo ngekwetsembeka.

₆Lolungile angeke anyakatiswe;

uyawuhlala akhunjulwa

phakadze naphakadze.

₇Imibiko lemibi ayimesabisi,

inhlitiyo yakhe icinile,

yetsembele kuSimakadze.

₈Unesibindzi, angeke esabe,

aze abone kujabhiswa kwetitsa takhe.

₉Labamphofu ubapha ngekukhululeka;

kulunga kwakhe kuyawuma

kuze kube phakadze.

Uyawuba nemandla, ahlonipheke.

₁₀Lomubi uyawubona loku acanuke,

acucudze ematinyo, ahusheke,

adzimate aphele.

Tinhloso talomubi tiyawushabalala.