Sihlabelelo 108

₁Yebo, Nkulunkulu,

ngitimisele ngenhlitiyo yami yonkhe!

Ngiyawuhlabela ngidvumise wena,

nawe mphefumulo wami, phaphama.

₂Vukani lugitali nehabhu!

Ngikunyakatisa ngivuse intsatsakusa.

₃Simakadze, ngiyawukubonga

emkhatsini webantfu,

ngihlabele ngekukudvumisa

emkhatsini wetive.

₄Ngobe umusa wakho mkhulu

ungetulu kwemazulu

nekwetsembeka kwakho

kuze kube ngusemafini.

₅Phakama, Nkulunkulu,

ube ngetulu kwemazulu,

ludvumo lwakho luwusibekele

umhlaba wonkhe jikelele.

₆Kuze kukhululwe labo labaligugu lakho,

ngisindzise ngesandla sakho sekudla,

ngive ungiphendvule.

₇Nkulunkulu ukhulume

endzaweni yakhe lengcwele, watsi:

“Ngiyakwetsaba ekuncobeni kwami,

ngiyawuyidzabula ngiyabe iShekhemu

ngiklaye Sigodzi saseSukhothi.

₈Wami Gileyadi, wami naManase,

Efrayimu usivikelo senhloko yami,

Juda yintfonga yami yekubusa.

₉Mowabi ngumgezelo wami,

etikwa-Edomu ngulapho ngijika khona sicatfulo sami,

etikweFilistiya ngiyetsaba ngidle siga.”

₁₀Ngubani lotangiyisa

kulelidolobha leliyinqaba?

Ngiyawuholwa ngubani kuya kulaka-Edomu?

₁₁Akusiwe yini Nkulunkulu losilahlile?

Awusaphumi netimphi tetfu.

₁₂Sisite uselekelele kulomelene natsi,

ngobe lusito lwemuntfu lulite.

₁₃Nangabe Nkulunkulu

eme ngakitsi, sitawuncoba,

ngobe nguye loyawugcobagcoba titsa tetfu.