Sihlabelelo 105

₁Bongani Simakadze,

nibite libito lakhe,

nimemetele tento takhe

emkhatsini wetive.

₂Hlabelani kuye, nimdvumise,

nibalise ngetimangaliso takhe tonkhe.

₃Tibongeni ngelibito lakhe lelingcwele,

atijabule tinhlitiyo talabafuna Simakadze.

₄Funani kwati Simakadze nemandla akhe,

nifunisise buso bakhe

onkhe emalanga.

₅Khumbulani timangaliso takhe latentile,

nikhumbule tibonakaliso takhe,

kanye netehlulelo temlomo wakhe,

₆nine situkulwane sa-Abrahama,

inceku yakhe,

nine madvodzana aJakobe,

labakhetsiwe bakhe.

₇Yena Simakadze unguNkulunkulu wetfu,

tehlulelo takhe tisemhlabeni wonkhe.

₈Uyasikhumbula sivumelwane sakhe

phakadze naphakadze;

livi layala ngalo uyalikhumbula

titukulwane ngetitukulwane.

₉Sivumelwane lasenta na-Abrahama,

nesifungo sakhe ku-Isaka,

₁₀wasicinisa kuJakobe, saba ngumtsetfo,

ku-Israyeli saba sivumelwane saphakadze.

₁₁Watsi: “Wena ngiyakupha live laseKhenani

leliyawuba sabelo lesilifa lakho.”

₁₂Babesembalwa ngesibalo,

yebo, babeyingcosana,

batihambi kulelo live.

₁₃Bazula bandzindza etiveni ngetive,

basuka kulomunye umbuso baya kulomunye,

₁₄kodvwa akavumelanga muntfu

kutsi abahluphe,

ngenca yabo wajezisa ngisho emakhosi.

₁₅Watsi: “Ningabatsintsi labagcotjiwe bami,

ningacali nilimate baphrofethi bami.”

₁₆Watfumela indlala kulelo live,

kwaphela kudla, kati walala etiko.

₁₇Watfuma indvodza yahamba kucala kunabo,

Josefa, lowatsengiswa waba sigcili.

₁₈Tinyawo takhe batibopha ngetinketane,

naye lucobo lwakhe waboshwa ngetinsimbi,

₁₉kwaze kwaba sikhatsi

lekwagcwaliseka ngaso livi lakhe,

nelivi laSimakadze lamvivinya

lamtfola kutsi ucinisile.

₂₀Faro, inkhosi, watfumela kutsi akhululwe,

yebo, umbusi wetive wamkhulula.

₂₁Wamenta waba sikhulu semuti wakhe,

waba ngundvunankhulu welive lonkhe,

₂₂kuze acondzise tikhulu takhe;

nebaholi bakhe wabafundzisa kuhlakanipha.

₂₃Israyeli wase uyefika eGibhithe,

Jakobe wakhonta eveni lakaHhamu.

₂₄Simakadze wasandzisa kakhulu sive sakhe,

wasenta sandza saba nemandla kunetitsa taso.

₂₅Wayigucula inhlitiyo yebaseGibhithe,

kuze itondze bantfu bakhe,

babaphatsa ngebucili.

₂₆Watfumela Mosi, inceku yakhe,

wahamba na-Aroni labekhetfwe nguSimakadze.

₂₇Benta tibonakaliso taSimakadze

emkhatsini wabo,

netimangaliso eveni lakaHhamu.

₂₈Watfumela bumnyama,

wenta live laba mnyama,

kepha bemelana nemavi akhe.

₂₉Wagucula emanti abo aba yingati,

wabhubhisa tinhlanti tabo.

₃₀Live labo lanyakatela tigogodvolo,

taphetfuka ngisho nasemakamelweni emakhosi.

₃₁Wakhuluma,

kwavela emabulo etibawu,

kanye netimphungane eveni labo lonkhe.

₃₂Wabapha sangcotfo,

saba yimvula yabo,

kwaklwebha imibane eveni labo lonkhe.

₃₃Wavitsita imivini nemakhiwane abo,

washaya netihlahla eveni labo.

₃₄Wakhuluma, kwavela sikhonyane,

kwavela inkhasa lengeke ibaleke,

₃₅kwadla yonkhe intfo lemilako eveni,

kwacedza sitselo semhlaba emasimini abo.

₃₆Wabulala onkhe ematubulo abo eveni,

lababetibone ngawo kutsi sebakhulile.

₃₇Wase uyabakhipha baka-Israyeli eGibhithe,

bahamba sebanesiliva negolide;

kute nome munye lowawa emindenini yabo.

₃₈EmaGibhithe ajabula ekuphumeni kwabo

ngobe abesafile kubesaba.

₃₉Wendlala lifu,

laba ngumpheme wekubambonya,

wabentela umlilo wekubakhanyisela ebusuku.

₄₀Bacela, wabapha tigwaca,

wabesutsisa ngesinkhwa lesivela ezulwini.

₄₁Wavula lidvwala,

kwampompota emanti,

ageleta ehlane njengemfula.

₄₂Ngobe wakhumbula livi lakhe lelingcwele,

lalikhuluma ku-Abrahama, inceku yakhe.

₄₃Wase ukhipha sive sakhe ngenjabulo,

labakhetsiwe bakhe bahamba ngekutfokota.

₄₄Wabapha emave ebetive,

badla lifa lelititfukutfuku tebetive,

₄₅kuze bacaphele timiso takhe,

bagcine imitsetfo yakhe.

Haleluya, dvumisani Simakadze!