Sihlabelelo 104

₁Mphefumulo wami,

dvumisa Simakadze!

Yebo, Simakadze, Nkulunkulu wami,

wena umkhulu kakhulu!

Wembetse ludvumo nebukhosi.

₂Kukhanya kuyingubo lotembese ngayo,

weneke emazulu

njengekumiswa kwelithende;

₃indlu yakho yebukhosi,

uyakhe etikwemanti lasetulu.

Emafu lamnyama lahlomile ayincola yakho,

ugibele emaphiko emoya.

₄Nguwe lowenta titfunywa takho

tibe ngimimoya,

wente tinceku takho tibe ngimibane.

₅Wasimisa umhlaba etikwetisekelo tawo,

kuze ungatanyatanyiswa,

phakadze naphakadze,

₆wawembesa ngemanti lamanyenti,

njengekwembeswa ngengubo,

emanti agcwala adzimate acwilisa tintsaba.

₇Wawekhuta abaleka,

ngekubhonga kwelivi lakho

asubatsa ngematubane abaleka,

₈adzilika etintsabeni ehlela etigodzini,

aphutfuma endzaweni lowawuyimisele wona.

₉Wawabekela iminyele langeke ayengce,

angete asabuyela kuyakwembesa

umhlaba wonkhe.

₁₀Wenta tiyalu tigelete etihosheni,

ageletise imifula emkhatsini wetintsaba.

₁₁Kunatsa kuyo tonkhe tilwane tesiganga,

netimbongolo tesiganga

ngulapho tikucima khona koma kwato.

₁₂Tinyoni tesiganga takhela ngakuyo,

tintjilote emkhatsini wemagala.

₁₃Unisela tintsaba ngemvula utihlalele etulu,

nemhlaba weneliswe sitselo semsebenti wakho:

₁₄Uhlumisa tjani, kuze kudle imfuyo,

uhlumise lokumilako kusitakale bantfu,

kuze kuvele kudla emhlabeni,

₁₅neliwayini lelijabulisa tinhlitiyo tabo,

nemafutsa ekugcobisa buso bakhe

buze bucwebetele,

nekudla lokuyinsika yemphilo yemuntfu.

₁₆Tihlahla taSimakadze tiniselwe ngalokwenele,

imisedari yaseLebanoni layihlanyelile,

₁₇tinyoni letakhele tidleke tato kuyo,

gilonki wakhela etulu emagaleni ato.

₁₈Tintsaba letindze tiyinkhundla yemagoga,

emadvwala asiphephelo setimbila.

₁₉Wenta inyanga kutsi yehlukanise tikhatsi,

lilanga liyasati sikhatsi salo sekuya kunina.

₂₀Wenta bumnyama bube busuku,

bese kweluka tonkhe tilwane temahlatsi.

₂₁Emabhubesi ayabhodla atamule,

atingele tinyamatane,

afuna kudla kwawo kuNkulunkulu.

₂₂Naliphumako lilanga ayahoshoba,

abange emihumeni yawo,

afike alale phansi.

₂₃Umuntfu uyaphuma aye emsebentini wakhe,

akhandleke kudzimate kushone lilanga.

₂₄Awu, Simakadze!

Maye, minyenti imisebenti yakho!

Yonkhe uyente ngekuhlakanipha;

umhlaba ugcwele tidalwa takho.

₂₅Naluya lwandle lolukhulu, nalolubanti,

loluphetfuka tintfo

umuntfu langeke akhone kutibala,

tintfo letiphilako letincane naletinkhulu.

₂₆Nansiya imikhumbi intjweza kulo

nemikhoma lowayenta yatjakadvula kulo.

₂₇Tonkhe letidalwa tibheke wena,

kutsi utiphe kudla kwato

ngesikhatsi lesifanele.

₂₈Utipha kudla tidle,

nawuvula sandla sakho,

teneliswa ngetintfo letinhle.

₂₉Nawufihla buso bakho, tiyetfuka,

nawutsatsa kuphefumula kwato, tiyafa,

tibuyele elutfulini.

₃₀Nawutfumela Moya wakho, tiyadaleka,

uhlumise kabusha imvelo yemhlaba.

₃₁Shangatsi ludvumo lwaSimakadze lungema

kuze kube ngunaphakadze.

Shangatsi Simakadze angatfokota

ngemisebenti yakhe,

₃₂yena lotsi nakabuka umhlaba utfutfumele,

atsintse tintsaba tibhunye.

₃₃Simakadze ngiyawumhlabelela,

yingci nangisaphila.

Ngiyawudvumisa Nkulunkulu wami,

ngisaphila lapha emhlabeni.

₃₄Shangatsi kuzindla kwami kungamjabulisa,

ngiyawutfokota kuSimakadze.

₃₅Shangatsi toni tingasishulwa emhlabeni,

lababi bangabe basaphushwa nakuphushwa.

Mphefumulo wami,

dvumisa Simakadze!

Dvumisa Simakadze!