Sihlabelelo 102

₁Awu, Simakadze!

Vani umthandazo wami.

Kukhala kwami akufinyelele kuwe.

₂Ungabufihli buso bakho kimi,

ngesikhatsi sekuhlupheka kwami!

Beka indlebe yakho kimi;

usheshe ungiphendvule

njalo nje nangikhala kuwe.

₃Emalanga ami endlula njengentfutfu,

ematsambo ami ashise njengemlilo.

₄Inhlitiyo yami ihashukile

yabuna njengetjani.

Angisadli, nekudla akusangeni,

ngobe inhlitiyo yami imnyama.

₅Sengondze ngingumbambotiyabalwa,

ngenca yekububula kwami kakhulu.

₆Sengifanana nelingce lasehlane,

ngifanane nesikhova setindzala.

₇Ngiyacwasha, butfongo abehli,

ngifanana nenyoni ledliwa situnge,

lehleti etikwendlu.

₈Titsa tami tingetfuka onkhe emalanga,

laba labangiphukutako

bacalekisa betfukane ngelibito lami.

₉Ngiyakhala, umlotsa sekudla kwami,

tinyembeti titfontsela esinatfweni sami,

₁₀ngenca yelulaka nekutfukutsela kwakho,

ngobe ungisundvutile wangilahla.

₁₁Emalanga ami

anjengesitfunti sentsambama,

ngiyabuna njengetjani.

₁₂Kodvwa wena, Simakadze,

uyawuba khona kuze kube phakadze.

Uyawukhunjulwa titukulwane ngetitukulwane.

₁₃Uyawusukuma uhawukele iSiyoni,

ngobe sengiso sikhatsi sekuyiphatsa ngemusa,

yebo, sikhatsi lesimiselwe loko sesifikile.

₁₄Tinceku takho tiyitsandza

ngisho nematje ayo;

tihawukela lutfuli lwayo.

₁₅Tive tiyawulesaba libito laSimakadze,

nemakhosi onkhe emhlaba

esabe bukhosi bakhe.

₁₆Ngobe Simakadze

utawube asayakhe kabusha iSiyoni,

asabonakele enkhatimulweni yakhe,

₁₇anake imikhuleko yalabangenabani,

angayibukeli phansi imithandazo yabo.

₁₈Loku akubhalwe phansi,

kugcinelwe situkulwane lesitako,

kuze naleso sive lesiyawuvela

naso sidvumise Simakadze.

₁₉Ngobe Simakadze wabuka phansi,

asendzaweni yakhe lephakeme lengcwele,

wabuka emhlabeni asezulwini,

₂₀kutsi atewuva kububula kwetiboshwa,

atewukhulula labo labagwetjelwe intsambo,

₂₁kuze bantfu bavakalise

libito laSimakadze eSiyoni,

neludvumo lwakhe eJerusalema,

₂₂ngesikhatsi sekuhlangene tive ndzawonye,

kanye nemibuso kutawukhonta Simakadze.

₂₃Wacedza emandla ami ngisesemkhatsini,

wafinyeta emalanga ekuphila kwami.

₂₄Ngitsi: “Hhawu, Nkulunkulu wami,

ungaphangisi ungitsatse ngisakhula.

Iminyaka yakho

yetitukulwane netitukulwane.

₂₅Emandvulo wabeka tisekelo temhlaba,

emazulu angumsebenti wetandla takho.

₂₆Kuyakwendlula konkhe,

wena uhlale unjalo nje,

konkhe kuyawuguga njengengubo.

Yebo, njengengubo

uyawukugucula kusakateke.

₂₇Kepha wena seloku unjalo nje,

iminyaka yakho ayinasiphetfo.

₂₈Bantfwana betinceku takho

bayawuhlala baphephile,

intalo yabo ihlale isimiswe embikwakho.”