Taga 2

₁Ndvodzana yami, yemukela loku lengikufundzisa kona, uyigcine imiyalo yami. ₂Lalela ubambisise kuhlakanipha; inhlitiyo yakho ibe nekucondza. ₃Yebo cela lwati, ucele nekucondza; ₄kufunisise njengesiliva, ukumbe njengemcebo lofihliwe. ₅Nangabe ukwenta konkhe loko, utawucondzisisa kutsi kuyini kwesaba Simakadze, utfole nekutsi kuyini kwati Nkulunkulu. ₆NguSimakadze lowephana ngekuhlakanipha; emlonyeni wakhe kuphuma lwati nekucondza. ₇Labacotfo ubabekele kuhlakanipha; ulihawu kulabo labatiphatsa ngekwetsembeka. ₈Ugadza tindlela talabo labaphatsa labanye ngekungakhetsi, alindze indlela yalabangcwele bakhe.

₉Ngako, wena utakucondza kulunga, nebumsulwa, nebucotfo, ukwati nalokufanele. ₁₀Kuhlakanipha kutawungena enhlitiyweni yakho, nelwati lube yinjabulo emphefumulweni wakho. ₁₁Kucophelela kutakugadza, nekucondzisisa kutakwelusa, ₁₂kukuphephise endleleni yebubi nakubantfu bemanga, ₁₃labalahla tindlela tekulunga bahambe etindleleni tebumnyama, ₁₄labajabula ngekwenta lokubi, bajatjuliswe kwandza kwemacebo, ₁₅labatindlela tabo tigwegwile, nalabahamba ngetindlela tekweduka.

₁₆Kucophelela nekucondzisisa kutakusindzisa kulomsikati loyingwadla, umfati walenye indvodza, lonelulwimi lolushelelako, ₁₇lowala lowo lashade naye ebusheni bakhe, wakhohlwa sivumelwane sakhe kuNkulunkulu wakhe. ₁₈Indlu yakhe ibishela ekufeni, netindlela takhe tigcina endzaweni yalabafile. ₁₉Kuye akuyi lolubuyako; lowo loke wangena kuye akaphindzi futsi abuyele etindleleni tekuphila. ₂₀Ngako kufanele utsatse sibonelo kubantfu labalungile; uhambe etindleleni tekulunga. ₂₁Bantfu labacotfo labatawukwakha kulelive; ngulabetsembekile bodvwa labayawuhlala kulo. ₂₂Kodvwa lababi bayawususwa eveni, nalabanemacebo bayawusishulwa kulo.