Numeri 33

₁Leti-ke tigaba teluhambo lwesive sema-Israyeli, nasiphuma eGibhithe ngetive taso ngaphansi kwesandla saboMosi na-Aroni. ₂Ngekuyala kwaSimakadze Mosi wabhala onkhe emabito etindzawo lapho babefike bemise khona. Nalu-ke luhambo lwaso ngetigaba talo:

₃Sive sema-Israyeli sesuka eRamsesi ngelilanga leli-15 lenyanga yekucala emnyakeni, lilanga lelilandzela liPhasika, ngenyanga yekucala. Baphuma ngesibindzi nangetigi emehlweni awo onkhe emaGibhithe abuka. ₄EmaGibhithe abengcwaba ematubulo awo onkhe labeshaywe nguSimakadze emkhatsini wawo; ngobe Simakadze abebehlulele bonkhe bonkulunkulu bawo.

₅Ema-Israyeli esuka eRamsesi emisa eSukhothi. ₆Esuka eSukhothi ayawumisa e-Ethamu, emnyeleni welihlane. ₇Esuka e-Ethamu ancandzeka aya ePhi Hahirothi, ngasemphumalanga kweBhali Sefoni, emisa embikweMigdoli. ₈Esuka ePhi Hahirothi, adzabula lwandle ekhatsi ewelela ehlane, atsi kube ahambe emalanga lamatsatfu eHlane lase-Ethamu, emisa eMara. ₉Esuka eMara aya e-Elimu, lapho bekunemitfombo leli-12 netihlahla temasundvu letatingema-70, emisa khona lapho.

₁₀Esuka e-Elimu emisa ngaseLwandle Lolubovu. ₁₁Esuka ngaseLwandle Lolubovu emisa eHlane laseSini. ₁₂Esuka eHlane laseSini emisa eDofkha. ₁₃Esuka eDofkha emisa e-Alushi. ₁₄Esuka e-Alushi emisa eRefidimu, lapho kwakute khona emanti ekunatfwa bantfu.

₁₅Esuka eRefidimu emisa eHlane laseSinayi. ₁₆Esuka eHlane laseSinayi emisa eKhibrothi Hathava. ₁₇Esuka eKhibrothi Hathava emisa eHaserothi. ₁₈Esuka eHaserothi emisa eRitma. ₁₉Esuka eRitma emisa eRimoni Pheresi. ₂₀Esuka eRimoni Pheresi emisa eLibna. ₂₁Esuka eLibna emisa eRisa. ₂₂Esuka eRisa emisa eKhehelatha. ₂₃Esuka eKhehelatha emisa eNtsabeni iSheferi. ₂₄Esuka eNtsabeni iSheferi emisa eHarada. ₂₅Esuka eHarada emisa eMakhelothi. ₂₆Esuka eMakhelothi emisa eThahathi. ₂₇Esuka eThahathi emisa eThera. ₂₈Esuka eThera emisa eMithka. ₂₉Esuka eMithka emisa eHashmona. ₃₀Esuka eHashmona emisa eMoserothi. ₃₁Esuka eMoserothi emisa eBhene Jakani. ₃₂Esuka eBhene Jakani emisa eHori Hagidigadi. ₃₃Esuka eHori Hagidigadi emisa eJotbatha. ₃₄Esuka eJotbatha emisa e-Abrona. ₃₅Esuka e-Abrona emisa e-Esiyoni Geberi. ₃₆Esuka e-Esiyoni Geberi emisa eKhadeshi, eHlane laseSini. ₃₇Esuka eKhadeshi emisa eNtsabeni iHori, emnyeleni we-Edomu.

₃₈Ngekuyala kwaSimakadze Aroni, umphristi, wenyukela eNtsabeni iHori, lapho wafike wafela khona ngelilanga lekucala enyangeni yesihlanu ngemnyaka wema-40 ema-Israyeli aphuma eGibhithe. ₃₉Aroni abesaneminyaka leli-123 budzala ngesikhatsi afela eNtsabeni iHori.

₄₀Inkhosi yase-Aradi leyayingumKhenani, ihlala eningizimu nelive laseKhenani, yeva kutsi sive sema-Israyeli siyeta.

₄₁Ema-Israyeli esuka eNtsabeni iHori emisa eSalmona. ₄₂Esuka eSalmona emisa ePhunoni. ₄₃Esuka ePhunoni emisa e-Obothi. ₄₄Esuka e-Obothi emisa e-Iye Abarimu, emnyeleni wakaMowabi. ₄₅Esuka e-Iyimu emisa eDiboni Gadi. ₄₆Esuka eDiboni Gadi emisa e-Alimoni Diblathayimu. ₄₇Esuka e-Alimoni Diblathayimu emisa etintsabeni tase-Abarimu, edvute neNebo. ₄₈Esuka etintsabeni tase-Abarimu, emisa ematsafeni akaMowabi, edvute nemfula iJordane malungana neJerikho. ₄₉Ematsafeni akaMowabi emisa edvute nemfula iJordane kusuka eBhethi Jeshimothi kuya e-Abela Shithimu.

₅₀Ematsafeni akaMowabi edvute nemfula iJordane malungana neJerikho, Simakadze wakhuluma kuMosi watsi: ₅₁“Khuluma kuma-Israyeli utsi: ‘Nanewela iJordane ningena eKhenani, ₅₂niboticosha nitikhiphe tonkhe letive lenitatikhandza khona. Nibotibhubhisa tonkhe letitfombe tato, netithico tato letibatiwe kanye netindzawo tato letiphakeme tekukhontela. ₅₃Lelive nibolidla libe lenu nihlale kulo, ngobe nginiphe lona kutsi libe lenu. ₅₄Lelive nibolabelana ngenkatho kulolo nakulolo lusendvo. Sive lesinebantfu labanyenti nibabele lifa lelikhulu, kanjalo nakulabo labasive lesincane nibabele lelincane. Nome ngabe yini labayitfole ngenkatho kuyawuba kwabo. Lelive nibolabelana ngekwetive tenu.

₅₅“ ‘Kodvwa nangabe letive lenitikhandze kulelo live anikaticoshi natikhipha, leto lenitivumele kutsi tihlale tiyawuba ngemazubela emehlweni enu tibe ngemanyeva emihlubulweni yenu. Tiyawuba luhlupho kini kulelo live leniyawuhlala kulo. ₅₆Mine ngiyawukwenta kini loko lengitimisele kukwenta kubo.’ ”