Makho 9

₁Jesu waphindza watsi: “Ngicinisile, ngitsi kini: Bakhona labeme lapha emkhatsini wenu labangayikubona kufa bangakaboni Nkulunkulu abusa ngemandla.”

₂Emvakwemalanga lasitfupha Jesu watsatsa boPhetro, naJakobe, naJohane, wenyukela nabo entsabeni lendze, baba bodvwana. Wagucuka lesinye simo bambukile. ₃Tingubo takhe tacwebetela taba mhlophe nke, kwakungekho muntfu emhlabeni jikelele labengatenta tibe mhlophe njengato. ₄Kwabonakala kubo bo-Elija banaMosi, bakhuluma naJesu. ₅Phetro watsi kuJesu: “Mfundzisi, kuhle lokutsi sibe lapha. Asakhe emathende lamatsatfu, linye litawuba lakho, lelinye libe laMosi, lelinye libe la-Elija.” ₆Phela loko wakusho angasati kutsi utsini, ngobe base bafile luvalo.

₇Kwefika lifu labambonya, kwevakala livi liphuma efini litsi:

₈Batsi batsi cala cala, bangete babona muntfu ngaphandle kwaJesu yedvwa.

₉Basehla entsabeni Jesu wabayala kutsi bangacali batjele muntfu ngaloku labakubonile, iNdvodzana yeMuntfu ingakavuswa kulabafile.

₁₀Nangempela basigcina leseluleko, kodvwa babutana bodvwa batsi: “Kusho kutsini ‘kuvuka kulabafile’?” ₁₁Bambuta batsi: “Tisho ngani tati temtsetfo lokutsi: ‘Kufanele kufike Elija kucala’?”

₁₂Jesu wabaphendvula watsi: “Vele, Elija uyabuya kutawubuyisela tonkhe tintfo ngabolonina. Pho, isho kutsini imiBhalo nayitsi iNdvodzana yeMuntfu ifanele kuhlushwa ngetintfo letinyenti, yedzelelwe? ₁₃Kodvwa ngiyanitjela ngitsi: Elija sewefika, noko bantfu benta kuye konkhe labakutsandzako, njengaloku kubhaliwe ngaye.”

₁₄Batsi nabefika kubafundzi labanye, bakhandza sicumbi lesikhulu sibakakile netati temtsetfo tiphikisana nabo. ₁₅Masinyane nje sicuku satsi kube simbone Jesu, samangala kakhulu, sagijima saya kuye sayawumbingelela. ₁₆Wababuta watsi: “Niphikisana ngani nabo?”

₁₇Lomunye kulesicuku watsi kuye: “Mfundzisi, ngiletse nansi indvodzana yami kuwe, ngobe inelidimoni lelisimungulu. ₁₈Litsi lingambamba limlahle phansi, limkliklitise, akhihlite emagwebu, abhashe ematinyo, ome atsi nkhwa. Ngicele labafundzi bakho kutsi balikhiphe, kodvwa behlulekile.”

₁₉Wabaphendvula watsi: “Awu, situkulwane lesingakholwa, kuyawudzimate kube ngunini nginani? Kuyawudzimate kube ngunini nginibeketelela? Mletseni la kimi!” ₂₀Bamletsa kuJesu lomfana.

Lanelela kumbona nje lelidimoni, lamlahla phansi umfana, lamekhama, washumpha aphukuhla emagwebu emlonyeni. ₂₁Jesu wabuta uyise walomfana watsi: “Selinesikhatsi lesingakanani limphetse?”

Uyise wamphendvula watsi: “Kusukela ebuntfwaneni bakhe. ₂₂Belihle limjika nasemlilweni, nasemantini, lifuna kumbulala. Kodvwa nakukhona longakwenta, mane usihawukele usisite.”

₂₃Jesu watsi kuye: “Utsi: ‘Nakukhona longakwenta.’ Phela konkhe kuyenteka kulowo lokholwako.”

₂₄Masinyane uyise walomfana wakhala amemeta atsi: “Ngiyakholwa, sita kungakholwa kwami.”

₂₅Jesu watsi kube abone sicumbi sibutsana, wawekhuta lomoya lomubi watsi: “Moya webumungulu nebuhhulu! Ngiyakutjela ngitsi: Phuma kuye! Ungaphindzi futsi ubuye kuye!”

₂₆Lidimoni latswilila, lamhlukumeta kamatima lomfana, laphuma kuye. Lomfana walala watsi dzalakaca, wafanana nesidvumbu. Labanyenti babo badzimate batsi: “Ufile.” ₂₇Kodvwa Jesu wambamba ngesandla; wamsukumisa, nembala wasukuma.

₂₈Jesu nasangene endlini nebafundzi bakhe babodvwa, bambuta batsi: “Kwentiwe yini kutsi tsine sehluleke kulikhipha lelidimoni?”

₂₉Wabaphendvula Jesu watsi: “Loluhlobo lolu aluphumi ngalutfo lolunye ngaphandle kwemkhuleko [nekuzila kudla].”

₃₀Jesu nebafundzi bakhe besuka lapho bachubekela embili, badzabula eGalile. Abengatsandzi kutsi bantfu bati kutsi ukuphi. ₃₁Jesu wabafundzisa bafundzi bakhe atsi: “INdvodzana yeMuntfu itawuniketwa etandleni tebantfu. Bona batayibulala. Nase bayibulele itawuvuka ngelilanga lesitsatfu.”

₃₂Kodvwa abazange bayive leyo nkhulumo, besaba nekumbuta.

₃₃Befika eKhaphanawume; batsi nase bangekhatsi endlini, Jesu wababuta watsi: “Beniphikisana ngani endleleni?”

₃₄Bathula batsi cwaka; ngobe endleleni bebabutana ngekutsi ngubani lomkhulu emkhatsini wabo. ₃₅Jesu wahlala phansi, wabita bafundzi bakhe labebali-12, watsi kubo: “Lofuna kuba mkhulu kunabo bonkhe, kufanele atitfobe ngaphansi kwabo bonkhe, abe sisebenti sabo bonkhe.” ₃₆Wasondzeta umntfwana wammisa emkhatsini wabo, wamgona ngemikhono yakhe, watsi kubo: ₃₇“Lowo lowemukela lomunye walabantfwana egameni lami, wemukela mine; nalowo lowemukela mine, akemukeli mine kuphela, kodvwa wemukela nalowo longitfumile.”

₃₈Johane watsi kuye: “Mfundzisi, sibone lomunye akhipha emadimoni egameni lakho; samalela tsine, ngobe akahambisani natsi.”

₃₉Kodvwa Jesu watsi: “Ningamaleli, ngobe kute longenta imisebenti yemandla egameni lami, longajika masinyane akhulume kabi ngami. ₄₀Ngobe lowo longakemelani natsi, ukanye natsi. ₄₁Ngicinisile, ngitsi kini: Lowo loyakuninatsisa nome yinkomishi yinye nje yemanti, ngobe ningebaKhristu, nakanjani uyakwemukela umvuzo wakhe.”

₄₂“Lowo lowenta munye nje walaba labancane labakholwa ngimi aphambuke endleleni yaNkulunkulu, bekuyakuba ncono kuye kutsi kunkinkelwe inguzanguza yelitje entsanyeni yakhe, agcumkiselwe elwandle, amite afe.

₄₃“Sandla sakho nasikonisa, sijube! Kuncono umane ungene ekuphileni uyingini, kunekutsi ube netandla totibili uyekungena esihogweni, emlilweni longacimeki. [ ₄₄‘Kuleyo ndzawo timphetfu takhona atifi, nemlilo wakhona awucimi.’] ₄₅Nangabe lunyawo lwakho lukonisa, lujube! Kuncono umane ungene ekuphileni uyinchute, kunekutsi ube netinyawo totimbili kodvwa uyewulahlwa esihogweni. [ ₄₆‘Kuleyo ndzawo timphetfu takhona atifi, nemlilo wakhona awucimi.’] ₄₇Nangabe liso lakho likonisa, likupulute ulilahle khashane! Kuncono umane ungene embusweni waNkulunkulu uneliso linye, kunekutsi ube nemehlo omabili kodvwa uyewulahlwa esihogweni. ₄₈‘Kuleyo ndzawo timphetfu takhona atifi, nemlilo wakhona awucimi.’

₄₉“Ngobe phela wonkhe umuntfu uyawuvangwa ngemlilo, njengobe kudla kuvangwa ngeluswayi.

₅₀“Luswayi lona luhle, kodvwa luswayi nase lulahlekelwe bunandzi balo, buyawubuyiselwa ngani?

“Banini neluswayi ngekhatsi kwenu, nibe nekuthula lomunye kulomunye, nivane.”