Makho 3

₁Waphindza Jesu wangena esinagogeni, bekunemuntfu labenesandla lesishwaphene. ₂Bekukhona lababefuna kubeka Jesu licala, ngako-ke bamcaphelisisa kutsi utawumphilisa yini lomuntfu, njengobe kwakuliSabatha nje. ₃Jesu watsi kulomuntfu labenesandla lesishwaphene: “Sukuma ute la ngembili.” ₄Wabuta kubo watsi: “Kulungile yini kwenta lokuhle ngeliSabatha, nome kwenta lokubi, kusita umuntfu nome kumyekelela aze afe?”

Kepha bathula. ₅Wabatsi cala cala, acansukile, wadzabuka ngobe tinhlitiyo tabo tatilukhuni, tinenkhani, wase utsi kulomuntfu: “Yelula sandla sakho!” Waselula, saphila.

₆Masinyane baFarisi baphuma esinagogeni, bayawuhlanganisa tinhloko nemaHerodi, bakha lisu lekubulala Jesu.

₇Jesu wahamba nebafundzi bakhe baya ngaseLwandle LwaseGalile. Ticumbi tebantfu letatiphuma eGalile naseJudiya tamlandzela. ₈Letinye ticumbi tatiphuma eJerusalema, nase-Idumiya, nangesheya kweJordane, nangasemadolobheni aseThire naseSidoni. Tonkhe leticumbi tatite kuye, ngobe tative ngaloko abekwenta.

₉Jesu watjela bafundzi bakhe kutsi bamlungisele sikebhe, hleze sicumbi sebantfu simminyetele. ₁₀Loko wakwenta emvakwekuphilisa labanyenti. Bonkhe lababenetifo babephangelana kuye batewumtsintsa. ₁₁Lababenemadimoni babetsi bangambona, baguce embikwakhe bamemete batsi: “Wena uyiNdvodzana yaNkulunkulu!”

₁₂Kepha Jesu wabadvonsa ngendlebe kutsi bangamhlakati ebantfwini.

₁₃Jesu wase ukhuphukela entsabeni. Wababita labo labefuna kubatfuma; beta kuye. ₁₄Wabamisa baba li-12, lababetawuba naye, [wabetsa watsi baphostoli,] wabatfuma kutsi bayewushumayela, ₁₅wabapha nemandla ekukhipha emadimoni.

₁₆Naba-ke laba labali-12 labakhetsa: Simoni, lametsa watsi nguPhetro; ₁₇boJakobe naJohane, emadvodzana aZebedi, labetsa watsi boBhowanegese, lokusho kutsi “Emadvodzana Ekudvuma Kwelitulu”; ₁₈na-Andreya, naFiliphu, naBhatalomewu, naMatewu, naTomasi, naJakobe, umsa wa-Alfiyose, naThadiyosi, naSimoni, wephathi yemaKhenani, ₁₉naJudasi Skariyothi labetamtsengisa.

₂₀Jesu wase uyesuka ubuyela ekhaya. Ticumbi taphindze tabutsana ngalokwengcile, kangangekutsi Jesu kanye nebafundzi bakhe badzimate baswela ngisho sikhatsi sekudla. ₂₁Bakubo batsi kube bakuve loko, baphutfuma bamlandza, ngobe kwase kutsiwa: “Usangene ingcondvo!”

₂₂Kepha tati temtsetfo letatichamuka eJerusalema tatsi: “UnaBhelzebule,” labanye batsi: “Yinkhosi yemadimoni lena lakhipha ngayo emadimoni.”

₂₃Jesu wababita, wakhuluma nabo ngemifanekiso atsi: “Kodvwa Sathane angamcosha njani Sathane? ₂₄Nangabe umbuso wehlukene ekhatsi, lowo mbuso ngeke ume. ₂₅Nangabe likhaya lehlukene ekhatsi, alichubi. ₂₆Nangabe umbuso waSathane wehlukene ekhatsi, sewuvukelana kwawona, ungeke ume, kodvwa uyakuwa uphele.

₂₇“Kute umuntfu longagcekeza indlu yesichwaga aphange timphahla taso, ngaphandle kwekutsi acale ngekubamba sona asibophe; emvakwaloko-ke angangena aphange timphahla endlini yaso.

₂₈“Ngiyacinisa ngitsi kini: Tonkhe tono tebantfu tiyawutsetselelwa, nome ngabe sebahlambalate kangakanani; ₂₉kodvwa umuntfu lohlambalata Moya Longcwele, ngeke atsetselelwe nanini, kepha unelicala laphakadze.”

₃₀Jesu wakusho loko, ngobe labanye bebatsi unelidimoni.

₃₁Kwase kufika unina waJesu nabomnakabo bema ngephandle, base batfumela livi kutsi abambite. ₃₂Bantfu babegcwele batungelete Jesu bahleti phansi, base bayambikela batsi: “Nangu unyoko la ngephandle nabomnakenu, [nabodzadzewenu] bafuna wena.”

₃₃Jesu wabaphendvula watsi: “Ngubani make? Bobani bomnaketfu?” ₃₄Wacalata ababuka bonkhe labebasedvute naye watsi: “Nangu make nabomnaketfu. ₃₅Ngobe wonkhe lowenta intsandvo yaNkulunkulu ngumnaketfu, nadzadzewetfu, namake.”