Matewu 24

₁Jesu abephuma ethempelini; abesahamba ngesikhatsi bafundzi bakhe beta kuye batemkhombisa takhiwo telithempeli. ₂Kepha waphendvula watsi: “Angitsi, niyakubona konkhe loku? Nginitjela ngitsi: Kute ngisho nalinye litje leliyawusala lihleti etikwalelinye lingakadzilitelwa phansi.”

₃Watsi Jesu asehleti eNtsabeni Yemincumo, bafundzi bakhe beta kuye ngasense, batsi: “Sitjele kutsi letintfo tiyakwenteka nini, kuyakwentekani lokuyawukhombisa kutsi sesikhatsi sekubuya kwakho nekutsi sekuphela kwetikhatsi?”

₄Jesu waphendvula watsi: “Caphelani, kutsi kubete umuntfu lonedukisako. ₅Ngobe bantfu labanyenti bayawuta ngelibito lami, befike batsi: ‘NginguKhristu!’ bedukise labanyenti. ₆Niyawuva ngetimphi nangemahemuhemu etimphi; caphelani ningetfuki, ngobe loko kufanele kwenteke, kodvwa umhla wekuphela uyawube ungakefiki. ₇Ngobe sive siyawuvukela lesinye sive, nembuso uyawuvukela lomunye umbuso. Kuyawuba khona tindlala nekutamatama kwemhlaba tindzawo ngetindzawo. ₈Konkhe loku kukucala kwemihelo.

₉“Lapho-ke bayawuninikela etinhlungwini, banibulale. Tonkhe tive tiyawunitondza ngenca yelibito lami. ₁₀Labanyenti bayawuhlubuka, batsengisane bodvwana, batondzane. ₁₁Kuyakuvela baprofethi bemanga labanyenti, bedukise bantfu labanyenti. ₁₂Ngekwandza kwekona kuyawuphola lutsandvo kulabanyenti. ₁₃Kodvwa lowo loyawubambelela kuze kube ngusekupheleni, uyawusindziswa. ₁₄LeliVangeli ngembuso liyawushunyayelwa emhlabeni wonkhe, kuze kube bufakazi etiveni tonkhe, bese-ke kuyefika kuphela.”

₁₅“Ngako-ke nanibona sinengisoncitsakalo sime endzaweni lengcwele, njengobe asho umphrofethi Danyela,” (lofundzako akacaphele inchazelo yaloku), ₁₆“labo labaseJudiya ababalekele etintsabeni. ₁₇Umuntfu losetikwendlu angabe asehla kuyawutsatsa lutfo lolusendlini yakhe, ₁₈nalowo losensimini angabuyeli endlini kuyawutsatsa kwekwembatsa. ₁₉Kepha maye kulabayawube batetfwele nakulabayawube bamunyisa ngaleto tikhatsi! ₂₀Thandazelani kutsi kubaleka kwenu kungabi kusebusika nome ngeliSabatha! ₂₁Ngobe lapho kuyawuba khona kuhlupheka lokukhulu lokungazange sekube khona kusukela seloku kwasekelwa umhlaba, kuze kube ngulamuhla, futsi akuseyiwuba khona. ₂₂Kube lawo malanga akafinyetwanga bekuyakubate longasindziswa; kepha ngenca yalabakhetsiwe lawo malanga ayawufinyetwa.

₂₃“Nome umuntfu asatsi kini: ‘Bukani, nangu Khristu,’ nome: ‘Nanguya lapho akhona,’ ningamkholwa! ₂₄Ngobe kuyawuvela bokhristumbumbulu, nebaphrofethi bemanga, bente tibonakaliso letinkhulu netimangaliso, kuze kudukiswe nalabakhetsiwe nakunekwenteka. ₂₅Bukani-ke, senginitjele ngaphambili kungakenteki.

₂₆“Ngako-ke nabatsi: ‘Bukani usehlane,’ ningayi khona; nome batsi: ‘Bukani usendlini,’ ningakholwa! ₂₇Ngobe iNdvodzana yeMuntfu iyawufika njengembane umanyata esibhakabhakeni kusukela emphumalanga kuye enshonalanga.

₂₈“Nome ngukuphi lapho kunesidvumbu khona emangce abutsana khona.”

₂₉“Kepha masinyane nje emvakwaleto tinhlupheko,

₃₀“Lapho-ke kuyawubonakala sibonakaliso seNdvodzana yeMuntfu esibhakabhakeni; tonkhe tive temhlaba tiyawukhala natibona iNdvodzana yeMuntfu ita ngemafu elizulu, ngemandla, nangenkhatimulo lenkhulu. ₃₁Iyawutfumela tingilosi tayo ngekukhala lokukhulu kwelicilongo, tibutse bonkhe labakhetsiwe bayo emagumbini omane emhlaba, kusukela emkhawulweni lomunye welizulu kuze kube kulomunye.”

₃₂“Ase nifundze sifundvo ngesihlahla semkhiwa. Ngesikhatsi emagala aso advumba, nemacembe ahluma, niyaye nati kutsi lihlobo selidvutane. ₃₃Kanjalo-ke nani, nanibona konkhe loku kwenteka, nibokwati kutsi sekusedvute ngasemnyango. ₃₄Ngicinisile, ngitsi kini: Lesitukulwane ngeke sendlule kungakenteki konkhe loku. ₃₅Lizulu nemhlaba kuyakwendlula, kodvwa emavi ami wona angeke endlule.”

₃₆“Noko kute lowatiko kutsi lelo langa nemzuzu kuyawufika nini, ngisho netingilosi ezulwini neNdvodzana ayati, lowatiko nguBabe kuphela. ₃₇Njengasemalangeni aNowa kuyawuba njalo nekufika kweNdvodzana yeMuntfu. ₃₈Njengemalanga labengembili kwazamcolo, bantfu babedla banatsa, labadvuna nalabasikati batsatsana, kwaze kwaba lilanga langena ngalo Nowa emkhunjini; ₃₉abazange bati, kwaze kwefika zamcolo wabacedza, kuyawuba njalo nekufika kweNdvodzana yeMuntfu. ₄₀Ngaleso sikhatsi emadvodza lamabili ayawube asebenta ensimini; lenye iyawutsatfwa, lenye isale. ₄₁Bafati lababili bayawube basila; lomunye uyawutsatfwa, lomunye asale. ₄₂Ngako-ke caphelani, ngobe anilati lilanga iNkhosi yenu leyawubuya ngalo. ₄₃Nibokwati kutsi kube umniyo wendlu abesati sikhatsi sekufika kwelisela, abengeke alale, entele kuvimbela lelisela lingayigcekezi lendlu yakhe.

₄₄“Ngako-ke nani hlalani nilindzele, ngobe iNdvodzana yeMuntfu iyawufika ngesikhatsi leningakasibheki.”

₄₅“Pho, ngubani losisebenti lesetsembekile nalesihlakaniphile, inkhosi yaso lesimise etikwebendlu yayo, kutsi sibanike kudla ngesikhatsi lesifanele? ₄₆Sibusisiwe leso sisebenti lesiyawukhandvwa yinkhosi yaso senta njalo. ₄₇Ngicinisile, ngitsi kini: Iyawusimisa ngetulu kwako konkhe lenako lenkhosi. ₄₈Kodvwa nangabe leso sisebenti lesibi sicabanga enhlitiyweni yaso sitsi: ‘Inkhosi yami isalibele,’ ₄₉bese sicala kushaya letisebenti letikanye naso, sidle sinatse naletinye tidzakwa, ₅₀inkhosi yaleso sisebenti iyawufika ngalelo langa, leso sisebenti singakayibheki, nangesikhatsi lesingasati. ₅₁Iyawusijezisa kakhulu kanye nebatentisi. Lapho kuyawuba khona kukhala nekugedletelisa ematinyo.”