Jesu embikwaPhilatu
1Lonkhe lelo Liqoqo lasukuma latsatsa Jesu lamyisa kuPhilatu. 2Base batsi: “Lomuntfu simbambe edukisa sive sakitsi, asitjela kutsi singatseli kuKhesari, atigabatisa ngekutsi yena unguKhristu, iNkhosi.”
3Philatu wambuta watsi: “Ungiyo yini inkhosi yemaJuda?”
Jesu waphendvula watsi: “Usho kona.”
4Philatu watsi kubaphristi labakhulu naseticunjini tonkhe: “Angitfoli cala kulomuntfu.”
5Kodvwa baphikelela ngemandla batsi: “Lomuntfu ususa lutfutfuva emkhatsini webantfu ngalemfundziso yakhe! Wacala eGalile, wadzabula iJudiya yonkhe, manje sewuze wefika nalapha.”
Jesu embikwaHerodi
6Nakeva loko Philatu, wabuta watsi: “UngumGalile yini lomuntfu?” 7Watsi kube achazelwe kutsi lomuntfu abephuma esifundzeni lesasibuswa nguHerodi, wase umtfumela kuHerodi, naye lobekaseJerusalema ngaleso sikhatsi.
8Watfokota kakhulu Herodi nakabona Jesu, ngobe phela abesevile ngaye, futsi abesanesikhatsi lesidze afisa kumbona. Abebheke kutsi utambona enta simangaliso. 9Ngako-ke Herodi wabuta Jesu imibuzo leminyenti, kodvwa Jesu akazange atsi vu. 10Baphristi labakhulu netati temtsetfo tasondzela ngembili titfukutsele, tacindzetela Jesu ngemacala lamanyenti. 11Herodi nemabutfo akhe bahlekisa ngaJesu bamhhalatisa ngekwedzelela bamembesa umjiva wengubo, bambuyisela kuPhilatu.
12Bacala ngalelo langa boHerodi naPhilatu baba bangani; kantsi ngembili kwaloko bebatitsa.
Sincumo sitsi Jesu akafe
13Philatu wabita umhlangano webaphristi labakhulu, nebaholi, nebantfu. 14Wase utsi kubo: “Lomuntfu nimletse lapha kimi natsi wedukisa bantfu. Manje, kumangalelwa kwakhe sengikuhlolisisile khona la embikwenu, ngimtfole ate licala ngaletintfo lenimmangalele ngato. 15NaHerodi umtfole angenacala, ngobe naku umbuyise la kitsi. Kute lokubi lokwentiwe ngulomuntfu lokungenta kutsi aze ajeziswe ngekubulawa. 16Noko-ke ngitamshaya ngimbhambabule, bese ngiyamkhulula.”
17[Njalo nje ngesikhatsi semkhosi Philatu kwakufanele abakhululele sinye siboshwa.]
18Sonkhe sicumbi samemeta satsi: “Msuse loJesu! Sikhululele Bharaba!”
19Bharaba abeboshelwe kubulala kanye nekususa lutfutfuva kulelo dolobha.
20Njengobe Philatu abefuna kukhulula Jesu, waphindze wamemeta kulesicumbi sebantfu; 21kodvwa saphendvula ngekumemeta satsi: “Mbetsele! Mbetsele esiphambanweni!”
22Philatu waphindza kwesitsatfu watsi kubo:
“Kodvwa cala lini lalentile? Kute lengikhandze kutsi ukwentile lokungaze kwente kutsi adzimate abulawe. Ngako-ke ngitamshaya ngimbhambabule, bese ngiyamkhulula.”
23Kodvwa bajinge bachubeka bamemeta kakhulu batsi Jesu kufanele abetselwe esiphambanweni. Ekugcineni kumemeta kwabo kwaphumelela. 24Ngako Philatu wakhipha sigwebo lababeloku basicela ngaJesu. 25Wakhulula lendvodza lababeyifuna, lena leyayisejele ngekuboshelwa lutfutfuva nekubulala, wabanika Jesu kutsi bente labakutsandzako ngaye.
Jesu ubetselwa esiphambanweni
26Batsi basahamba naye Jesu, bahlangana nendvodza yaseSirene, libito layo lalinguSimoni, abephuma emaphandleni ete edolobheni. Bambamba, bametfwesa siphambano batsi akalandzele Jesu.
27Sicumbi lesikhulu sebantfu sasimlandzela; emkhatsini waso kwakunebafati labebadzatimula bamkhalela. 28Jesu wagucukela kubo watsi: “Bomake baseJerusalema, ningangikhaleli mine, kodvwa tikhaleleni nine nebantfwana benu. 29Ngobe ayeta emalanga lapho bayawutsi: ‘Maye, baba nenhlanhla labo bafati labangazange batale bantfwana, nalawo mabele langazange amunyise.’
30“Ngaleso sikhatsi bayakutsi etintsabeni:
“ ‘Welani etikwetfu!’
Nasemagcumeni batsi:
‘Simbonyeni!’
31“Ngobe tintfo letinje natentiwa esihlahleni lesiseluhlata, kuyaba njani-ke kulesomile?”
32Bebatsatse tigelekece letimbili letatiyawubulawa kanye naJesu.
33Batsi kube befike endzaweni leyayibitwa ngekutsi “Sikobho” bambetsela loJesu, kanye naletigelekece letimbili, lesinye ngesekudla nalesinye ngesancele. 34[Jesu watsi: “Batsetselele, Babe; abakwati labakwentako.”]
Behlukaniselana timphahla takhe ngekwenta inkatho.
35Bantfu bema babukela, kodvwa baholi bemaJuda bamhhalatisa, bamphukuta, bahlekisa ngaye, batsi: “Wabasindzisa labanye; ake atisindzise naye, nangabe anguKhristu lokhetfwe nguNkulunkulu!”
36Nemasotja amphukuta nawo eta kuye amnika liwayini lelimunyu, 37adzimate atsi: “Tisindzise, nawuyiNkhosi yemaJuda!”
38Emagama labebhalwe ngetulu kwakhe abetsi: “LONA YINKHOSI YEMAJUDA.” 39Lesinye saletigelekece letatilengisiwe setfuka Jesu satsi kuye: “Awusiye yini Khristu? Tisindzise wena kanye natsi!”
40Lesi lesinye sasekhuta, satsi: “Awumesabi yini Nkulunkulu? Naku silapha sonkhe ngesigwebo lesifanako. 41Noko, setfu silungile, ngobe sitfola loko lokusifanele ngalesikwentile; kodvwa yena kute lakonile.” 42Wase utsi kuJesu: “Ungikhumbule, Jesu, nase ufikile ebukhosini bakho.”
43Jesu watsi kuso: “Ngikutjela kutsi: Lamuhla utakuba nami ePharadisi.”
Kufa kwaJesu
44Kwatsi kungusemini lenkhulu, ngensimbi yeli-12, lilanga lafiphala, bumnyama bembesa live lonkhe, kwaze kwaba ngesikhatsi santsambama, ngensimbi yesitsatfu, 45nendvwangu leyayilenga ethempelini yaklebhuka emkhatsini taba timbili. 46Jesu wakhala ngelivi lelikhulu watsi: “Babe! Ngibeka umoya wami etandleni takho!”
Wakusho loko wase uyafa.
47Indvuna yelibutfo nayibona loko kwenteka, yabonga Nkulunkulu, yatsi: “Impela abelungile lomuntfu!”
48Bonkhe labantfu babetewubukela nabakubona loko kwenteka, babuyela emakhaya kuceka emadvolo. 49Bonkhe lababemati Jesu, kanye nebafati lababemlandzela kusukela eGalile, bema khashane batibona tonkhe letintfo natenteka.
Kungcwatjwa kwaJesu
50-51Kwakukhona indvodza leyayinguJosefa ngekutalwa awase-Arimathiya, lidolobha lemaJuda. Abelilunga leLiqoqo, alungile, atsembekile, alindzele kufika kwembuso waNkulunkulu.
Nome abelilunga lalelo Liqoqo kodvwa akazange avumelane nesincumo nekwenta kwabo, 52waya kuPhilatu, wafike wacela sidvumbu saJesu. 53Wasetfula lesidvumbu wasigocota ngendvwangu lenhle, wasifaka ethuneni labelimbe kahle edvwaleni, lalingazange selisetjentiswe ngembili. 54KwakunguLesihlanu, lilanga Lemalungiselelo; liSabatha lase litawucala.
55Bafati lababelandzela Jesu kusukela eGalile, bahamba naJosefa, balibona lelithuna nekutsi sidvumbu saJesu sasingcwatjwe kanjani. 56Base babuyela ekhaya bayawulungisa emakha nemafutsa ekugcobisa sidvumbu.
Baphumula ngeliSabatha, njengobe kusho umtsetfo.
