Levithikusi 1

₁Simakadze asethendeni lekuhlangana, wabita Mosi wakhuluma kuye watsi: ₂“Tjela sive sema-Israyeli imitsetfo lekufanele siyigcine nasiletsa imihlatjelo yekushiswa kuSimakadze.

“Nangabe umuntfu anikela ngesilwane kutsi sibe ngumhlatjelo, kufanele kube yinkunzana nome yimvu nome yimbuti. ₃Nangabe anikela ngesilwane kutsi sibe ngumnikelo wekushiswa, kufanele aletse inkunzana lengenasiyela. Kufanele ayinikelele ekungeneni kwelithende lekuhlangana, khona Simakadze atewumemukela. ₄Lowo muntfu uyawubeka sandla sakhe etikwenhloko yalomnikelo wekushiswa, khona-ke utawube sewuyemukelwa egameni lakhe kutsi umentele inhlawulo yekubuyisana. ₅Lenkunzana utawube sewuyayihlaba embikwaSimakadze, bese-ke baphristi labangemadvodzana a-Aroni, batsatsa lengati bayinikela kuSimakadze bayifafate yonkhe emngcengcemeni welilati ndzawo tonkhe lapha ekungeneni kwelithende lekuhlangana. ₆Utawube sewuyayihlinza lenkunzana, bese uyayihlahlela ibe ngemacatsa. ₇Emadvodzana a-Aroni, umphristi, alungise tinkhuni letisetikwelilati bese ayatokhela. ₈Emadvodzana a-Aroni, baphristi, babowahlela lamacatsa kanye nenhloko nemanoni alomhlatjelo etikwetinkhuni letisetikwelilati. ₉Lomuntfu kufanele ageze loku kwangekhatsi nemilente; umphristi bese ushisa wonkhe lomhlatjelo etikwelilati. Loku kungumnikelo wekushiswa, umnikelo lowentiwa ngemlilo, liphunga lelinuka lusi lolumnandzi kuSimakadze.

₁₀“Nangabe anikela ngemvu nome ngembuti kutsi ibe ngumnikelo wekushiswa, kufanele kube sihhanca nome siwewe lesingenasiyela. ₁₁Utawube sewusibulalela ngasenyakatfo yelilati embikwaSimakadze; emadvodzana a-Aroni, baphristi, lengati atawube asayifafata emngcengcemeni welilati ndzawo tonkhe. ₁₂Lomuntfu utawutsi angayibulala ayihlahlele, umphristi bese uhlela onkhe lamacatsa, nenhloko kanye nemanoni ayo etikwetinkhuni letivutsako letiselatini. ₁₃Lomuntfu kufanele ageze loku kwangekhatsi kwayo nemilente yayo; umphristi bese ushisa wonkhe lomhlatjelo etikwelilati. Loku kungumnikelo wekushiswa, umnikelo lowentiwa ngemlilo, liphunga lelinuka lusi lolumnandzi kuSimakadze.

₁₄“Nangabe umuntfu anikela ngetinyoni kutsi tibe ngumhlatjelo wekushiswa, kufanele kube lituba nome lizini lelivukutfu. ₁₅Umphristi utalinikela elatini ngekutsi ashwile lenhloko yalo bese uyishisela etikwelilati. Lengati yalo ayiphomphisele eceleni kwelilati. ₁₆Abosusa ingingila nekwangekhatsi kwayo akulahle ngasemphumalanga nelilati, lapho kulahlwa khona umlotsa. ₁₇Utalibamba ngetimphiko totimbili alidzabule ekhatsi ngaphandle kwekuhluphula timphiko talo, bese ulishisa lonkhe etikwetinkhuni letivutsako letiselatini. Loku kungumnikelo wekushiswa, umnikelo lowentiwa ngemlilo, liphunga lelinuka lusi lolumnandzi kuSimakadze.”