Joweli 2

₁Vutselani licilongo eSiyoni,

nilikhalise entsabeni yami lengcwele.

Bonkhe labahlala eveni abatfutfumele,

ngobe lilanga laSimakadze liyeta,

yebo, selisondzele.

₂Lelo lilanga lebumnyama nesigayegaye,

lilanga lemafu nebumnyama lobukhulu.

Njengekusa nakwendlaleka etintsabeni

kunjalo nekuta kwemphi lenkhulu nalenemandla,

lengazange seyibe khona nasendvulo,

futsi ingeke iphindze ibe khona nome ngunini.

₃Embikwaleso sive ngumlilo lokhotsako,

emvakwaso lilangabi lelilavukako.

Embikwaso live lifanana nensimi yase-Edeni,

emvakwaso lilihlane lelingenalutfo.

Kute lokusalako lapho sihambe khona.

₄Sibonakala sifanana nemahhashi,

siholobha njengemahhashi emphi lagitjelwe.

₅Ngemsindvo waso lofanana netincola temphi

sigalaja ticongo tetintsaba;

sisasamba njengemlilo nawushisa tibi,

sihleleke njengemphi lenemandla

levivela kuhlasela.

₆Kubonakala kwaso kutfutfumelisa tive,

kwente bonkhe buso buphaphatseke.

₇Sihlasela njengemabutfo

sicance tindvonga njengemasotja.

Sonkhe sihamba silandzelane ngemigca,

singaphambuki endleleni yaso.

₈Asivimbelani sodvwana endleleni,

leso naleso sihamba sicondze embili.

Sitseleka sifolokohlele emkhatsini wemabutfo

ngaphandle kwekutsi sehlukane ekhatsi.

₉Sitselekela lidolobha,

sigijime etikwelubondza.

Sikhwela singene etindlini,

njengemasela singene ngemafasitelo.

₁₀Embikwaso umhlaba uyatamatama,

kutsi sibhakabhaka sitfutfumele,

lilanga nenyanga kube mnyama,

kutsi tinkhanyeti tingabe tisakhanya.

₁₁Simakadze uyabhavumula embikwalemphi yakhe.

Emabutfo akhe manyenti ngalokungabaleki;

banemandla labo labalalela umyalo wakhe.

Lilanga laSimakadze likhulu, liyesabeka.

Ngubani nje longemelana nalo?

“Namanje phendvukani, nibuye kimi

ngenhlitiyo yenu yonkhe,

ngekuzila, nangekukhala kanye nangekulila.”

₁₃Dzabulani tinhlitiyo tenu,

hhayi tembatfo tenu.

Buyelani kuSimakadze Nkulunkulu wenu,

ngobe unemusa nesihawu,

uyephuta kutfukutsela,

unelutsandvo loluphuphumako,

atsambe, angete ayehlisa inhlekelele.

₁₄Ngubani lowatiko?

Mhlawumbe angaba nesihawu,

ashiye sibusiso,

bese kuba ngiminikelo yalokutinhlavu neyetinatfo

yaSimakadze Nkulunkulu wenu.

₁₅Vutselani licilongo eSiyoni,

nimemetele kuzila lokungcwele,

nibite umhlangano longcwele.

₁₆Hlanganisani sive sibe ndzawonye,

niwungcwelise lowo mhlangano;

hlanganisani baholi,

nihlanganise nebantfwana,

yebo, ngisho nalabamunyako imbala.

Umkhwenyane akashiye indlu yakhe,

namakoti ashiye indlu yakhe.

₁₇Baphristi labakhonta embikwaSimakadze

abakhale emkhatsini wemhubhe welithempeli nelilati.

Yebo, abakhale batsi:

“Awu, Simakadze,

hawukela sive sakho,

ungavumi kutsi lifa lakho lelingitsi

libe yinhlekisa nentfo yekweyiswa tive.

Asikho nesidzingo sekutsi letive tingaze titsi:

‘Uphi loNkulunkulu wabo?’ ”

₁₈Simakadze utawuba nenshisekelo ngelive lakhe,

asihawukele sive sakhe.

₁₉Simakadze utawuphendvula atsi kubo:

“Nginipha sivuno salokutinhlavu,

liwayini lelisha kanye nemafutsa,

lokwenele kutsi kunganesutsisa;

ngingeke ngiphindze nginente

nibe yinhlekisa etiveni.

₂₀“Imphi yesitsa sangasenyakatfo

ngitayicosha isuke kini,

ngiyivimbetele eveni lelilihlane.

Lingembili layo

licondze elwandle lwangasemphumalanga,

lingemuva layo

licondze elwandle lwangasenshonalanga.

Luboti lwayo luyawuphakama,

nekunuka kwayo kwenyuke.”

Ngempela wente tintfo letinkhulu.

₂₁Ungesabi, wena live, jabula utfokote.

Ngempela Simakadze wente tintfo letinkhulu.

₂₂Ningesabi, nani tilwane tesiganga,

ngobe emadlelo asaneluhlata,

tihlahla titsela titselo tato,

umkhiwa nemvini nako kutsela titselo tako.

₂₃Jabulani, nine sive saseSiyoni,

tfokotani kuSimakadze Nkulunkulu wenu,

ngobe sewuniphe umfundzisi wekulunga.

Unitfumela imvula lenyenti,

imvula yasekwindla neyasentfwasahlobo njengakucala.

₂₄Tindzawo tekubhulela emabele

titawugcwala tivuno talokutinhlavu;

imiphandza itawugcwala iphuphume

ngeliwayini lelisha nangemafutsa.

₂₅“Ngitanikhokhela kuloko

lokudliwe sikhonyane ngaleyo minyaka,

loko lokwadliwa tibotfo nesigegedlana,

nelifu letinkumbi,

imphi yami lengayitfumela emkhatsini wenu.

₂₆Nitawuba nenala, nidle nize nesutse,

nitalidvumisa Libito laSimakadze Nkulunkulu wenu,

lowente timangaliso emkhatsini wenu.

Sive sami singeke siphindze sihlazeke.

₂₇Niyawube seniyati kutsi ngika-Israyeli,

nekutsi nginguSimakadze Nkulunkulu wenu,

nekutsi futsi kute lomunye ngaphandle kwami.

Sive sami singeke siphindze sihlazeke.”

₂₈“Emvakwaloko ngiyawutfulula Moya wami

etikwabo bonkhe bantfu.

Emadvodzana nemadvodzakati enu ayawuphrofetha,

emakhehla enu ayawuphupha emaphupho,

nemajaha enu ayawubona imibono.

₂₉Yebo, kulawo malanga

ngiyawutfululela Moya wami

etincekwini nasetincekukatini tami.

₃₀Ngiyakwenta timangaliso

emazulwini nasemhlabeni:

ingati, nemlilo, nekushunca kwentfutfu.

₃₁Lilanga liyawuba mnyama,

inyanga ibe bovu njengengati,

lingakefiki lilanga lelikhulu

nalelesabekako laSimakadze.

₃₂Bonkhe labayakulibita Libito laSimakadze

bayawusindziswa,

ngobe entsabeni iSiyoni naseJerusalema,

kuyawuba nenkhululeko,

njengobe Simakadze asashito

emkhatsini waleyo nsali

lebitwa nguSimakadze.”